ສະພາ ສະເໜີໃຫ້ລັດຖະບານເອົາໃຈໃສ່ຫຼາຍບັນຫາ ຕໍ່ນະໂຍບາຍຊຸກຍູ້ສົ່ງເສີມການກໍ່ສ້າງ ແລະ ສ້ອມແປງທາງໃນໄລຍະໃໝ່

ທ່ານ ນາງ ປິ່ງຄໍາ ລາຊະສິມມາ ກ່າວວ່າ: ເພື່ອຮັບປະກັນໃຫ້ແກ່ການຈັດຕັ້ງປະຕິບັດນະໂຍ ບາຍຊຸກຍູ້ສົ່ງເສີມການກໍ່ສ້າງ ແລະ ສ້ອມແປງທາງໃນໄລຍະໃໝ່ ໃຫ້ມີປະສິດທິພາບ, ປະສິດທິຜົນສູງ ແລະ ຮັບປະກັນຜົນປະໂຫຍດສູງສຸດໃຫ້ແກ່ປະເທດຊາດ ສະເໜີໃຫ້ລັດຖະບານ ຊີ້ນໍາກະຊວງໂຍທາທິການ ແລະ ຂົນສົ່ງ (ຍທຂ), ກະຊວງການເງິນ, ກະຊວງອຸດສາຫະກຳ ແລະ ການຄ້າ, ກະຊວງກະສິກຳ ແລະ ສິ່ງແວດລ້ອມ ແລະ ພາກສ່ວນທີ່ກ່ຽວຂ້ອງ ຮີບຮ້ອນຄົ້ນຄວ້າອອກນິຕິກຳ ກຳນົດ ຫຼັກການແຕ່ລະໜ້າວຽກ ໃຫ້ມີຄວາມລະອຽດ, ຊັດເຈນ ແລະ ຮັດກຸມ ເພື່ອເປັນບ່ອນອີງໃຫ້ແກ່ທຸກຂະແໜງການ ໃນການຄຸ້ມຄອງ ແລະ ຕິດຕາມກວດກາ ໃນການຈັດຕັ້ງປະຕິບັດແຕ່ລະໂຄງການ; ໃຫ້ລັດຖະບານຈັດລຽງບູລິມະສິດຂອງໂຄງການ ທີ່ຈະໄດ້ຮັບນະໂຍບາຍຊຸກຍູ້ສົ່ງເສີມ, ຈຳກັດໂຄງການທີ່ເປັນເປົ້າໝາຍເຮັດທົດລອງ ໂດຍສະເພາະທາງຫຼວງແຫ່ງຊາດທີ່ເປ່ເພໜັກໜ່ວງ ແລະ ມີການຂົນສົ່ງໂດຍສານ ແລະ ສິນຄ້າຈໍານວນຫຼາຍ ອີງໃສ່ຄວາມສາມາດຕົວຈິງສະໜອງງົບປະມານຂອງລັດ. ພ້ອມກັນນັ້ນ, ກໍຊຸກຍູ້ສົ່ງເສີມໃຫ້ພາກທຸລະກິດ ເຂົ້າຮ່ວມໃນການຟື້ນຟູ ແລະ ສ້ອມແປງເສັ້ນທາງ ໃຫ້ກັບສູ່ສະພາບປົກກະຕິ, ພາຍຫຼັງໄດ້ຟື້ນຟູເສັ້ນທາງໃຫ້ການສັນຈອນໂລ່ງລ່ຽນແລ້ວ ຕ້ອງໄດ້ລະດົມໃຫ້ຜູ້ປະກອບການທີ່ນໍາໃຊ້ເສັ້ນທາງເຮັດການຂົນສົ່ງ ໂດຍສານ ແລະ ຂົນສົ່ງສິນຄ້າ ທີ່ມີນໍ້າໜັກ 12 ໂຕນຂຶ້ນໄປ ປະກອບສ່ວນເສຍຄ່າຜ່ານທາງຕາມອັດຕາທີ່ເໝາະສົມ ດ້ວຍວິທີການເກັບຄ່າຜ່ານທາງດ້ວຍລະບົບທັນສະໄໝ (ລັດເກັບ) ເພື່ອເຮັດໃຫ້ລັດເຮົາມີລາຍຮັບ ແລະ ສະສົມທຶນ ໃນການກໍ່ສ້າງ ແລະ ສ້ອມແປງເສັ້ນທາງ ໃຫ້ເຂົ້າສູ່ສະພາບປົກກະຕິ; ສ່ວນລົດບັນທຸກທີ່ໃຫ້ການບໍລິການສາທາລະນະ ແລະ ປະເພດລົດເບົາບໍ່ຄວນເກັບ ເພື່ອບໍ່ໃຫ້ມີຜົນກະທົບຕໍ່ການດໍາລົງຊີວິດຂອງປະຊາຊົນ; ສະເໜີໃຫ້ລັດຖະບານຊີ້ນໍາ ກະຊວງ ຍທຂ ສໍາຫຼວດເສັ້ນທາງສາຍຫຼັກຄືນທັງໝົດ ເພື່ອກຳນົດມາດຕະຖານເຕັກນິກ ປັບປຸງໂຄງສ້າງທາງໃຫ້ຖືກຕ້ອງ ໂດຍເລັ່ງໃສ່ການນໍາໃຊ້ວັດສະດຸກໍ່ສ້າງທີ່ພວກເຮົາສາມາດຜະລິດ ແລະ ສະໜອງໄດ້ຢູ່ພາຍໃນໃຫ້ຫຼາຍຂຶ້ນ ເປັນຕົ້ນຊີມັງ, ເຫຼັກເສັ້ນ ເພື່ອເປັນການສົ່ງເສີມການຜະລິດພາຍໃນ, ທົດແທນການນໍາເຂົ້າ ແລະ ຫຼຸດຜ່ອນການນໍາເຂົ້າຢາງໝາກຕອຍ ຈໍານວນຫຼາຍ.

ການກໍ່ສ້າງຕະຝັ່ງເຈື່ອນຕາມແຄມທາງ ແລະ ແຄມແມ່ນໍ້າ ກໍຕ້ອງໄດ້ທົບທວນການອອກແບບໃຫ້ເໝາະສົມ ຄົ້ນຄວ້າການນໍາໃຊ້ວັດສະດຸພາຍໃນໃຫ້ຫຼາຍຂຶ້ນ, ໃຫ້ທົບທວນຄວາມຈໍາເປັນການນໍາໃຊ້ຕາໜ່າງຫີນ (Box & Mattress Gabion) ເພື່ອຮັບປະກັນບໍ່ໃຫ້ມູນຄ່າການກໍ່ສ້າງສູງເກີນກວ່າຄວາມຈໍາເປັນ; ສະເໜີໃຫ້ລັດຖະບານພິຈາລະນາຢ່າງຖີ່ຖ້ວນຕໍ່ບັນດາໂຄງການກໍ່ສ້າງ ແລະ ສ້ອມແປງທົ່ວໄປ ທີ່ຂັ້ນສູນກາງ ແລະ ທ້ອງຖິ່ນຈັດຕັ້ງປະຕິບັດຕາມການແບ່ງຂັ້ນຄຸ້ມຄອງນັ້ນ ເຫັນວ່າມີຈໍານວນຫຼາຍ ແລະ ແຫຼ່ງທຶນຈາກການນໍາໃຊ້ ງົບປະມານລົງທຶນຂອງລັດໃນແຕ່ລະປີ ຖ້າຈະປະຕິບັດນະໂຍບາຍໃໝ່ຕ້ອງໄດ້ຄົ້ນຄວ້າຢ່າງຖີ່ຖ້ວນ ກໍານົດກົນໄກທີ່ແນ່ນອນ ເພື່ອບໍ່ໃຫ້ເກີດຊ່ອງຫວ່າງ ແລະ ທັງບໍ່ສ້າງຜົນກະທົບຮ້າຍແຮງຕໍ່ການເກັບລາຍຮັບປະຈຳແຕ່ລະປີຂອງ ລັດຖະບານ.

ສໍາລັບການໃຫ້ນະໂຍບາຍ ຕໍ່ການລົງທຶນການກໍ່ສ້າງທາງ ດ້ວຍທຶນຂອງພາກທຸລະກິດໃນຮູບແບບ BOT ຫລື ຮູບແບບອື່ນ ຕາມທີ່ກຳນົດໄວ້ໃນມາດຕາ 11 ຂອງດໍາລັດ ວ່າດ້ວຍການລົງທຶນຮ່ວມ ລະຫວ່າງ ພາກລັດ ແລະ ພາກເອກະຊົນ ສະບັບເລກທີ 624/ລບ, ລົງວັນທີ 21 ທັນວາ 2020 ສະເໜີໃຫ້ພິຈາລະນາຫຼຸດຜ່ອນ ຫຼື ຍົກເວັ້ນການປະຕິບັດກົດໝາຍ ແລະ ນິຕິກຳໃຕ້ກົດໝາຍ ຕາມແຕ່ກໍລະນີ; ໃຫ້ລັດຖະບານ ຊີ້ນໍາກະຊວງການເງິນ ກຳນົດກົນໄກການຄຸ້ມຄອງ ແລະ ຕິດຕາມກວດກາ ການນໍາເຂົ້າວັດສະດຸກໍ່ສ້າງ ແລະ ກົນຈັກ ຢ່າງເຄັ່ງຄັດ ເພື່ອບໍ່ໃຫ້ມີການສວຍໃຊ້ໂອກາດ ແລະ ເປັນຊ່ອງຫວ່າງ ໃນການນໍາເຂົ້າວັດສະດຸ ແລະ ກົນຈັກ ມານໍາໃຊ້ເຂົ້າວຽກທີ່ບໍ່ຖືກຕ້ອງເປົ້າໝາຍ. ພາຍຫຼັງທີ່ໂຄງການກໍ່ສ້າງ ແລະ ສ້ອມແປງທາງ ຈັດຕັ້ງປະຕິບັດສໍາເລັດແລ້ວ ຕ້ອງມີການສະຫຼຸບ ແລະ ກວດກາຈໍານວນການນໍາເຂົ້າທີ່ນໍາໃຊ້ໃນໂຄງການຄືນໃໝ່ ຕາມນິຕິກຳທີ່ກຳນົດ ຢ່າງລະອຽດ ແລະ ຈະແຈ້ງ; ໃຫ້ລັດຖະບານ ຄົ້ນຄວ້າພິຈາລະນາແບ່ງຄວາມຮັບຜິດຊອບໃຫ້ອົງການປົກຄອງທ້ອງຖິ່ນ ເປັນເຈົ້າການໃນ ການຄຸ້ມຄອງ, ຕິດຕາມ ກວດກາ. ພ້ອມທັງ, ມີກົນໄກການປະສານງານ ຂອງຂະແໜງການດຽວກັນ ຫຼື ຂະແໜງການທີ່ກ່ຽວຂ້ອງ ລະຫວ່າງຂັ້ນສູນກາງ ແລະ ທ້ອງຖິ່ນ ໃຫ້ມີຄວາມກົມກຽວໄປລວງດຽວກັນ ຫຼີກລຽງເພື່ອບໍ່ໃຫ້ ຖິ້ມຄວາມຮັບຜິດຊອບ ຊຶ່ງກັນ ແລະ ກັນ; ຕ້ອງມີມາດຕະການທີ່ເຂັ້ມງວດ ໃນການຄວບຄຸມຄຸນນະພາບ, ມາດຕະຖານເຕັກນິກ ການກໍ່ສ້າງ ແລະ ສ້ອມແປງເສັ້ນທາງ; ເຂັ້ມງວດການຄຸ້ມຄອງ ແລະ ກວດກາ ເສັ້ນທາງໃນການຂົນສົ່ງ, ປະເພດລົດບັນທຸກ, ນໍ້າໜັກ ລົດບັນທຸກ, ແລະ ມີຄວາມພ້ອມຮອບດ້ານໃນການປະຕິບັດມາດຕະການທີ່ເຂັ້ມງວດ ແລະ ເດັດຂາດ ຕໍ່ຜູ້ບັນທຸກນໍ້າໜັກເກີນ.

 (ຂ່າວ: ວັນເພັງ, ພາບ: ສຸກສະຫວັນ)