1.ກອງປະຊຸມ ສະແດງຄວາມຊົມເຊີຍ ແລະ ເຫັນດີເປັນເອກະພາບຕໍ່ການຈັດຕັ້ງປະຕິບັດແຜນການ 6 ເດືອນຕົ້ນປີ 2025 ຂອງລັດຖະບານ ສະແດງອອກໃນຜົນງານທີ່ຍາດມາໄດ້ ເປັນຕົ້ນ ອັດຕາການເຕີບໂຕເສດຖະກິດ (GDP)ຄາດວ່າຈະສາມາດປະຕິບັດໄດ້ 4.5%, ການເຕີບໂຕຂອງບາງຂະແໜງການມີທ່າອ່ຽງທີ່ດີ ໃນນັ້ນ ອຸດສາຫະກໍາ ເຕີບໂຕ 4.7%, ອັດຕາເງິນເຟີ້ມີທ່າອ່ຽງຫຼຸດລົງ, ການປະຕິບັດ ບັນດາຄາດໝາຍດ້ານວັດທະນະທໍາ-ສັງຄົມ, ຊັບພະຍາກອນທໍາມະຊາດ ແລະ ສິ່ງແວດລ້ອມ ກໍມີຄວາມຄືບໜ້າທີ່ດີ;2. ແຕ່ເຖິງຢ່າງໃດກໍຕາມ, ກອງປະຊຸມຍັງສະແດງຄວາມເປັນຫ່ວງຕໍ່ການປະຕິບັດບາງຄາດໝາຍຂອງແຜນການ ປະຈໍາປີ 2025 ເປັນຕົ້ນ ສະພາບການຜະລິດທົດແທນການນໍາເຂົ້າ ແລະ ການປຸງແຕ່ງເປັນສິນຄ້າສົ່ງອອກ ຍັງບໍ່ທັນໄດ້ດີ, ລາຄາສິນຄ້າບາງໝວດລາຍການສິນຄ້າ ລວມທັງໄຟຟ້າຍັງເພີ່ມຂຶ້ນສູງ, ຊຶ່ງໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ, ພະນັກງານ-ລັດຖະກອນ, ທະຫານ-ຕໍາຫຼວດ ແລະ ພາກທຸລະກິດ, ການສ້ອມແປງເສັ້ນທາງທີ່ເປ່ເພ ຍັງຊັກຊ້າ, ການຄຸ້ມຄອງໂຄງການສໍາຫຼວດຂຸດຄົ້ນແຮ່ທາດ ຍັງບໍ່ທັນມີປະສິດທິພາບ ແລະ ປະສິດທິຜົນ, ການອອກໃບຕາດິນຍັງມີຄວາມຄືບໜ້າໜ້ອຍ, ກອງປະຊຸມ ຈຶ່ງສະເໜີໃຫ້ ລັດຖະບານຄົ້ນຄວ້າວິທີການແກ້ໄຂບັນຫາດັ່ງກ່າວຕື່ມ ແລະ ສືບຕໍ່ຈັດຕັ້ງປະຕິບັດບັນດາຄາດໝາຍດັ່ງກ່າວ ໃນໄລຍະ 6 ເດືອນ ທ້າຍປີ ໃຫ້ບັນລຸຕາມແຜນການ;3.ເພື່ອຮັບປະກັນການບັນລຸຄາດໝາຍ ການເຕີບໂຕເສດຖະກິດ(GDP)ຢູ່ໃນລະດັບ4.8% ໃນ 6 ເດືອນທ້າຍປີ 2025, ສະເໜີໃຫ້ລັດຖະບານເອົາໃຈໃສ່ການຂຸດຄົ້ນທ່າແຮງບົ່ມຊ້ອນທາງດ້ານເສດຖະກິດ, ສ້າງຖານລາຍຮັບທີ່ມີຄວາມໝັ້ນຄົງ, ການສົ່ງເສີມການຜະລິດ ແລະ ການປຸ່ງແຕ່ງສິນຄ້າ ກ່ອນການສົ່ງອອກ, ຈັດສັນເຂດການຜະລິດ, ເຂດປູກ, ເຂດລ້ຽງ ໃຫ້ເປັນກຸ່ມ, ເປັນສະຫະກອນແບບໃໝ່ ເພື່ອສາມາດເຂົ້າເຖິງແຫຼ່ງທຶນ ແລະ ຕະຫຼາດ;4.ມອບໃຫ້ລັດຖະບານສືບຕໍ່ຜັນຂະຫຍາຍມະຕິຂອງກົມການເມືອງສູນກາງພັກວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງຄົ້ນຄວ້າສຸມການລົງທຶນຂອງລັດ ເຂົ້າໃສ່ການຟື້ນຟູກໍ່ສ້າງພື້ນຖານໂຄງລ່າງໃຫ້ມີຈຸດສຸມ, ໂດຍສະເພາະການຟື້ນຟູກໍ່ສ້າງສ້ອມແປງເສັ້ນທາງໃນເຂດຫ່າງໄກສອກຫຼີກ, ເສັ້ນທາງຍຸດທະສາດປ້ອງກັນຊາດ-ປ້ອງກັນຄວາມສະຫງົບຕາມແລວຊາຍແດນຕ່າງໆ, ເສັ້ນທາງຫຼວງແຫ່ງຊາດ ໂດຍສະເພາະ ເສັ້ນທາງເລກທີ 13 ເໜືອ ແລະ ເສັ້ນທາງໃນບັນດາແຂວງເຂດພາກເໜືອ, ໂຄງການຟື້ນຟູໄພພິບັດສຸກເສີນ,ໂຄງການພັດທະນາຊົນນະບົດ ແລະ ແກ້ໄຂຄວາມທຸກຍາກຢູ່ຊົນນະບົດ, ການກໍ່ສ້າງຕ້ານເຈື່ອນຕາມແມ່ນໍ້າຊາຍແດນ. ມອບໃຫ້ລັດຖະບານ ສຸມງົບປະມານໃສ່ການກໍ່ສ້າງບັນດາໂຄງການດັ່ງກ່າວ ພ້ອມກັບການຊໍາລະໜີ້ສິນ ໃຫ້ແກ່ໂຄງການກໍ່ສ້າງທີ່ສໍາເລັດ ແລ້ວ 100%, ໂຄງການສືບຕໍ່ທີ່ໃກ້ຈະສໍາເລັດ ແລະ ຈຳກັດໂຄງການສະເໜີໃໝ່; ພ້ອມດຽວກັນນັ້ນ,ໃຫ້ເອົາໃຈໃສ່ຄຸ້ມຄອງນໍ້າໜັກລົດບັນທຸກສິນຄ້າ, ມີມາດຕະການທີ່ເຂັ້ມງວດ ແລະ ເດັດຂາດ ຕໍ່ການບັນທຸກນໍ້າໜັກເກີນ, ແບ່ງລາຍຮັບທີ່ໄດ້ຈາກຄ່າປັບໃໝບັນທຸກນໍ້າໜັກເກີນໃຫ້ທ້ອງຖິ່ນ ເພື່ອນໍາມາໃຊ້ຈ່າຍສ້ອມແປງເສັ້ນທາງທີ່ເປ່ເພ;5.ເອົາໃຈໃສ່ສົ່ງເສີມການຜະລິດທົດແທນການນໍາເຂົ້າ ແລະ ເປັນສິນຄ້າສົ່ງອອກ ຕາມແຜນວຽກຈຸດສຸມຂອງວາລະແຫ່ງຊາດ, ກຸ່ມຜະລິດຂະໜາດນ້ອຍ ແລະ ກາງ ຕາມກົດໝາຍ ເພື່ອສ້າງຄວາມເຂັ້ມແຂງໃຫ້ຊາວກະສິກອນ, ຍູ້ແຮງການຜະລິດກະສິກໍາໃຫ້ຫຼາຍຂຶ້ນ, ພ້ອມທັງຍົກລະດັບເຕັກນິກ-ວິຊາການ, ເຕັກໂນໂລຊີ ແລະ ຫັນເປັນທັນສະໄໝ ເພື່ອຍົກລະດັບຜົນຜະລິດໃຫ້ສູງຂຶ້ນກວ່າເກົ່າ ແລະ ມີໂຄງການຕົວແບບໃນການຜະລິດ, ຈັດສັນເຂດປູກ, ເຂດລ້ຽງ ໃຫ້ຊັດເຈນ ແລະ ຈໍາກັດການນໍາເຂົ້າສິນຄ້າທີ່ສາມາດຜະລິດໄດ້ພາຍໃນຢ່າງເຂັ້ມງວດ; ເອົາໃຈໃສ່ປັບປຸງ ແລະ ກະກຽມຄວາມພ້ອມດ້ານຊົນລະປະທານຮັບໃຊ້ການຜະລິດໃນລະດູແລ້ງ ໃຫ້ໄດ້ຕາມຄາດໝາຍ;6.ຮີບຮ້ອນປະເມີນຜົນໂຄງການ ເຊົ່າ ແລະ ສຳປະທານທີ່ດິນຂອງລັດ ທີ່ໄດ້ຮັບອະນຸຍາດ ໂດຍສະເພາະ ໂຄງການທີ່ບໍ່ມີປະສິດຜົນ,ບໍ່ປະຕິບັດພັນທະຕາມສັນຍາ,ດຳເນີນການຊັກຊ້າ ແລະ ຍັງເປັນການຈັບຈອງໄວ້, ມອບໃຫ້ລັດຖະບານ ມີມາດຕະການແກ້ໄຂຢ່າງເຂັ້ມງວດ ເພື່ອບໍ່ໃຫ້ລັດເສຍຜົນປະໂຫຍດ ແລະ ເສຍໂອກາດໃນການພັດທະນາ;7.ກອງປະຊຸມໄດ້ມອບໃຫ້ລັດຖະບານ ຕິດຕາມກວດກາ ແລະ ປະເມີນໂຄງການສໍາຫຼວດ, ຂຸດຄົ້ນແຮ່ທາດທີ່ໄດ້ຮັບອະນຸຍາດຜ່ານມາ, ໂຄງການມີຄວາມຄືບໜ້າຊ້າ, ບໍ່ປະຕິບັດຕາມສັນຍາ, ສົ່ງຜົນກະທົບດ້ານລົບຕໍ່ສິ່ງແວດລ້ອມ ສັງຄົມ ແລະ ທໍາມະຊາດ ຕ້ອງນໍາໃຊ້ມາດຕະການຕາມກົດໝາຍ ຢ່າງເດັດຂາດ, ພິຈາລະນາໂຈະໂຄງການແຮ່ທາດໃໝ່ທຸກປະເພດ (ແຮ່ໂລຫະ, ແຮ່ອະໂລຫະ ແລະ ແຮ່ຫີນທຸກຊະນິດທີ່ບໍ່ແມ່ນຫີນຮັບໃຊ້ໃນການກໍ່ສ້າງ);8.ຕໍ່ກັບວຽກງານວັດທະນະທໍາ-ສັງຄົມ ມອບໃຫ້ໃຫ້ລັດຖະບານ ເພີ່ມທະວີຄວາມເອົາໃຈໃສ່ ໃນການແກ້ໄຂບັນຫາຕ່າງໆ ຂອງຂະແໜງການສຶກສາ ທີ່ຕິດພັນກັບບັນຫາການປະລະການຮຽນ, ການຂາດແຄນຄູສອນ, ການສອນຫ້ອງຄວບ, ການອຸດໜູນຄູສອນ ແລະ ແພດໝໍ ໃຫ້ສາມາດຕອບສະໜອງກັບ ຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່, ຄົ້ນຄວ້າຈັດສັນງົບປະມານ ໃຫ້ແກ່ຂົງເຂດການສຶກສາ, ສາທາລະນະສຸກ ໃຫ້ສົມຄູ່ກັບຄວາມສໍາຄັນຂອງວຽກງານ, ເອົາໃຈໃສ່ການບໍລິການດ້ານສາທາລະນະສຸກ ໃຫ້ແກ່ພໍ່ແມ່ປະຊາຊົນ ໃຫ້ມີຄຸນນະພາບສູງຂຶ້ນກວ່າເກົ່າ, ໂດຍສະເພາະແກ້ໄຂໜີ້ສິນ, ເພີ່ມທະວີຄວາມເຂັ້ມງວດຕາມກົດໝາຍ ໃນການຄຸ້ມຄອງຮ້ານບັນເທີງ;9.ສືບຕໍ່ນໍາໃຊ້ເຄື່ອງມືແລະລະບົບທັນສະໄໝໃນການເກັບລາຍຮັບເຂົ້າງົບປະມານໃຫ້ໄດ້ ໃນລະດັບ 20% ຕໍ່ GDPຂຶ້ນໄປ ໂດຍສະເພາະຈາກຖານລາຍຮັບທີ່ມີໃຫ້ຄົບຖ້ວນແລະຈາກສັນຍາການລົງທຶນ,ການເຊົ່າ-ສໍາປະທານ ເປັນຕົ້ນ ພາສີ-ອາກອນ ແຮ່ທາດ, ນໍ້າມັນ,ລາຍຮັບທຸລະກິດຈາກທຸກພາກສ່ວນເສດຖະກິດ, ຄ່າເຊົ່າທີ່ດິນ,ການທ່ອງທ່ຽວ, ການຄ້າດິຈິຕອນ, ຄ່າທໍານຽມ ແລະ ບໍລິການຕ່າງໆພ້ອມທັງຫຼຸດຜ່ອນ ແລະ ຜ່ອນຜັນພາສີ-ອາກອນ ໃຫ້ໄດ້ຢ່າງເດັດຂາດ;10.ເອົາໃຈໃສ່ຈັດສັນງົບປະມານການຊົດເຊີຍເວນຄືນ ໃຫ້ແກ່ບັນດາໂຄງການລົງທຶນຂອງລັດ ທີ່ມີຜົນກະທົບໂດຍໄວ ໂດຍສະເພາະ ການຊົດເຊີຍໃຫ້ແກ່ປະຊາຊົນທີ່ຖືກຜົນກະທົບຈາກໂຄງການກໍ່ສ້າງ ຊົນລະປະທານ, ເສັ້ນທາງ, ຕ້ານເຈື່ອນ ແລະ ອື່ນໆ;11.ພິຈາລະນາຄົ້ນຄວ້ານະໂຍບາຍ ແລະ ໂຄງສ້າງລາຄາໄຟຟ້າທີ່ເຫັນວ່າ ມີລາຄາສູງເກີນໄປ ເຮັດໃຫ້ມີຜົນກະທົບຕໍ່ຊີວິດການເປັນຢູ່ຂອງປະຊາຊົນ, ພະນັກງານ-ລັດຖະກອນ, ທະຫານ-ຕໍາຫຼວດ ແລະ ພາກທຸລະກິດ ເພື່ອສົ່ງເສີມການຜະລິດພາຍໃນ ແລະ ຮັກສາທຸລະກິດ, ໂຮງຈັກໂຮງງານຕ່າງໆ ບໍ່ໃຫ້ປິດຕົວລົງ; 12.ກອງປະຊຸມມອບໃຫ້ລັດຖະບານ ຄົ້ນຄວ້າເພີ່ມເງິນເດືອນ, ເງິນອຸດໜູນຂອງພະນັກງານ, ລັດຖະກອນ, ທະຫານ-ຕໍາຫຼວດໃຫ້ແທດເໝາະກັບສະພາບເສດຖະກິດໃນປັດຈຸບັນ, ເພື່ອກະຕຸກຊຸກຍູ້ຄວາມຫ້າວຫັນ ໃນການປະຕິບັດໜ້າທີ່ວຽກງານ;13.ໃນຕອນບ່າຍຂອງວັນທີ 11 ມິຖຸນາ 2025 ໄດ້ຮັບຟັງການລາຍງານຂອງລັດຖະບານ ແລະ ກອງປະຊຸມຍັງໄດ້ປະກອບຄໍາເຫັນຕໍ່ ບົດລາຍງານຂອງລັດຖະບານ ກ່ຽວກັບການທາບທາມຮ່າງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ X (2026-2030), ຊຶ່ງເຫັນດີເປັນເອກະພາບໂດຍພື້ນຖານຕໍ່ການສະຫຼຸບຕີລາຄາການຈັດຕັ້ງປະຕິບັດແຜນການ 5 ປີ ຄັ້ງທີ IX (2021-2025);14.ກອງປະຊຸມໄດ້ມີຄໍາເຫັນຕໍ່ກັບພາກທິດທາງແຜນ 5 ປີ ຄັ້ງທີ X (2026-2030) ໄດ້ມອບໃຫ້ລັດຖະບານຄົ້ນຄ້ວາຕື່ມ ວິໄສທັດ, ຍຸດທະສາດການພັດທະນາ, ບັນດາເປົ້າໝາຍ, ຄາດໝາຍ, ຕົວຊີ້ບອກຂອງແຕ່ລະແຜນວຽກຈຸດສຸມ,ກົນໄກ, ວິທີການ ແລະ ມາດຕະການຈັດຕັ້ງປະຕິບັດແຜນການ 5 ປີ ຄັ້ງທີ X ໃຫ້ຈະແຈ້ງ, ຊັດເຈນ ແລະ ເປັນລະບົບ, ໂດຍສະເພາະໄດ້ຂະຫາຍແນວທາງການສ້າງເສດຖະກິດເອກະລາດເປັນເຈົ້າຕົນເອງ ອີງຕາມທ່າແຮງບົ່ມຊ້ອນ ຂອງປະເທດເຮົາ ໂດຍຖືເອົາ ຂະແໜງກະສິກຳ ແລະ ປຸງແຕ່ງ ເປັນບູລິມະສິດພື້ນຖານ ເພື່ອເຮັດໃຫ້ການພັດທະນາໄປຕາມທິດສີຂຽວ ແລະ ຍືນຍົງ, ສຸມໃສ່ການຫັນເປັນດິຈິຕອນ ໃຫ້ສອດຄ່ອງຕາມຍຸກສະໄໝ ຕິດພັນກັບເສດຖະກິດດິຈິຕອນ, ເສດຖະກິດ 4.0 (AI) ເຂົ້າໃນແຜນການ 5 ປີ ຄັ້ງທີ X ໃຫ້ຈະແຈ້ງຊັດເຈນ;15.ກອງປະຊຸມມອບໃຫ້ລັດຖະບານສືບຕໍ່ຄົ້ນຄວ້າປັບປຸງແຜນການ 5 ປີ ໃຫ້ມີເນື້ອໃນຄົບຖ້ວນ, ສົມບູນ ເພື່ອກະກຽມສະເໜີຮັບຮອງໃນກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ X.
(ຂ່າວ:ສຳນານ; ພາບ: ວັນເພັງ)
ຄໍາເຫັນ