ລາຍລະອຽດຄວາມຕ້ອງການ ຊີ້ນ, ໄຂ່ ແລະ ປາ ມີຄື: ຊີ້ນງົວ ມີຄວາມຕ້ອງການທັງໝົດ 32,446 ໂຕນ, ຄວາມອາດສາມາດສະໜອງໄດ້ທັງໝົດ 39,485 ໂຕນ, ເຫັນວ່າ ເກີນຄວາມຕ້ອງການ 7,039 ໂຕນ ເທົ່າກັບ 21.69%ຍັງມີ 10 ແຂວງຍັງຈໍາເປັນຕ້ອງໄດ້ດຸ່ນດ່ຽງຈາກແຂວງໃກ້ຄຽງ; ຊີ້ນຄວາຍ ມີຄວາມຕ້ອງການທັງໝົດ 18,616 ໂຕນ, ຄວາມອາດສາມາດສະໜອງຕໍ່ການບໍລິໂພກໄດ້ 19,874 ໂຕນ, ເຫັນວ່າ ເກີນຄວາມຕ້ອງການບໍລິໂພກ 1,258 ໂຕນ ເທົ່າກັບ 6.76% ຍັງມີ 9 ແຂວງ ຍັງຈໍາເປັນຕ້ອງໄດ້ດຸ່ນດ່ຽງ ຈາກແຂວງໃກ້ຄຽງ; ຊີ້ນໝູ ມີຄວາມຕ້ອງການທັງໝົດ 129,251 ໂຕນ, ຄວາມອາດສາມາດສະໜອງຕໍ່ການບໍລິໂພກ ໄດ້ 137,908 ໂຕນ, ເຫັນວ່າ ເກີນຄວາມຕ້ອງການ 8,657 ໂຕນ, ເທົ່າກັບ 6.7% ຍັງມີ 7 ແຂວງຍັງຈໍາ ເປັນຕ້ອງໄດ້ດຸ່ນດ່ຽງ ຈາກແຂວງໃກ້ຄຽງ.
ຂະນະທີ່ ຊີ້ນສັດປີກມີຄວາມຕ້ອງການທັງໝົດ 67,574 ໂຕນ, ຄວາມອາດສາມາດສະໜອງຕໍ່ການບໍລິໂພກໄດ້ 134,081 ໂຕນ, ເກີນຄວາມຕ້ອງການ 66,508 ໂຕນ ຄິດເປັນເປີເຊັນ ເທົ່າກັບ 98.42% ຍັງມີ 6 ແຂວງຍັງຈໍາເປັນຕ້ອງໄດ້ດຸ່ນດ່ຽງ ຈາກແຂວງໃກ້ຄຽງ; ຄວາມຕ້ອງການໄຂ່ ແມ່ນມີຄວາມຕ້ອງການທັງໝົດ 46,075 ໂຕນ, ຄວາມອາດສາມາດສະໜອງຕໍ່ການບໍລິໂພກ ໄດ້ 43,554 ໂຕນ, ນອກຈາກນັ້ນແມ່ນຍັງມີການຜະລິດຂອງຄົວເຮືອນ ເພື່ອບໍລິໂພກເອງ ໂດຍສະເພາະເຂດຊົນນະບົດສະນັ້ນເຫັນວ່າສາມາດສະໜອງໄດ້ໂດຍພື້ນຖານ, ແຕ່ກໍຍັງມີ 12 ແຂວງຍັງຈໍາເປັນ ຕ້ອງໄດ້ດຸ່ນດ່ຽງ ຈາກແຂວງໃກ້ຄຽງ; ຊີ້ນປາ ເເລະ ສັດນໍ້າ ມີຄວາມຕ້ອງການທັງໝົດ 205,267 ໂຕນ, ຄວາມອາດສາມາດສະໜອງຕໍ່ການບໍລິໂພກໄດ້ 408,642 ໂຕນ, ເກີນຄວາມຕ້ອງການ 203,374 ໂຕນ ເທົ່າກັບ 99.08% ແຕ່ກໍຍັງມີ 6 ແຂວງ ຍັງຈໍາເປັນຕ້ອງໄດ້ດຸ່ນດ່ຽງ ຈາກແຂວງໃກ້ຄຽງ.
ສຳລັບປີ 2025 ນີ້, ກໍມີຫຼາຍແຜນການເພື່ອໃຫ້ບັນລຸການສະໜອງຄວາມຕ້ອງການຊີ້ນ, ໄຂ່, ປາ ໃຫ້ພຽງພໍກັບຄາວມຕ້ອງການບໍລິໂພກພາຍໃນ ຈະຕ້ອງສູ້ຊົນຜະລິດໃຫ້ໄດ້ 577,000 ໂຕນ ຊຶ່ງໃນນີ້ ຕ້ອງຜະລິດຊີ້ນໃຫ້ໄດ້ 284,600 ໂຕນ, ໄຂ່ 55,400 ໂຕນ ແລະ ປາ 237,000 ໂຕນ ເພື່ອຄໍ້າປະກັນເຮັດໃຫ້ອັດຕາບໍລິໂພກຊີ້ນ, ໄຂ່, ປາ ໂດຍສະເລ່ຍໃຫ້ໄດ້ 73 ກິໂລກຣາມ/ຄົນ/ປີ ພວກສ່ວນກ່ຽວຂ້ອງ ກໍຄືກົມລ້ຽງສັດ ແລະ ການປະມົງ ກໍກຳລັງສຸມໃສ່ຜັນຂະຫຍາຍ ແລະ ຈັດຕັ້ງປະຕິບັດ 8 ນະໂຍບາຍດ້ານການລ້ຽງສັດ ໃນຂອບເຂດທົ່ວປະເທດ ໃຫ້ປະກົດຜົນເປັນຈິງ ແລະ ວຽກງານອື່ນໆ ທີ່ກ່ຽວຂ້ອງ.
ຄໍາເຫັນ