ສະຫາຍ ສົມສະອາດ ອຸ່ນສີດາ ກໍາມະການພັກແຂວງ ຮອງເຈົ້າແຂວງຄໍາມ່ວນ ໄດ້ລາຍງານຕໍ່ກອງປະຊຸມໃຫຍ່ ຜູ້ແທນອົງຄະນະພັກ ແຂວງຄັ້ງທີ XI ໃນວັນທີ 29 ກັນຍາ ນີ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໄລຍະ 2021-2025 ຜ່ານມາ ໄດ້ດໍາເນີນໄປໃນສະພາບແວດລ້ອມ ພາກພື້ນ ແລະ ສາກົນ ມີການຜັນແປໄປຢ່າງໄວວາ, ໂດຍສະເພາະ ແມ່ນ ສະພາບວິກິດການດ້ານເສດຖະກິດ-ການເງິນຂອງໂລກ, ຂໍ້ຂັດແຍ່ງຂອງບັນດາປະເທດມະຫາອຳນາດ, ບັນຫາໄພພິບັດທາງທຳມະຊາດ ແລະ ການລະບາດຂອງພະຍາດໂຄວິດ-19 ບວກກັບຄວາມຫຍຸ້ງຍາກດ້ານເສດຖະກິດ-ການເງິນ ພາຍໃນປະເທດ ໄດ້ສົ່ງຜົນກະທົບໂດຍກົງ ແລະ ທາງອ້ອມຕໍ່ການພັດທະນາເສດຖະກິດ-ສັງຄົມ ຂອງແຂວງ.
ພາຍໃຕ້ການນໍາພາ-ຊີ້ນໍາ ຂອງອົງຄະນະພັກແຂວງ, ດ້ວຍຄວາມເປັນເອກະພາບ ຄວາມສາມັກຄີ ເປັນປຶກແຜ່ນ ແລະ ຄວາມຮັບຜິດຊອບໜ້າທີ່ການເມືອງຂອງທຸກພາກສ່ວນຂະແໜງການຂັ້ນແຂວງ ແລະ ເມືອງ, ພາກທຸລະກິດ, ປະຊາຊົນບັນດາເຜົ່າ, ພວກເຮົາຈຶ່ງສາມາດຍາດໄດ້ຜົນສຳເລັດໃນການຈັດຕັ້ງ ປະຕິບັດບັນດາແຜນງານ, ຈຸດສຸມຕ່າງໆ ທີ່ກຳນົດໄວ້ໃນແຜນພັດທະນາເສດຖະກິດ-ສັງຄົມ 5 ປີ ຕາມ 6 ເປົ້າໝາຍ ແລະ 25 ແຜນວຽກຈຸດສຸມ.
ດ້ານການຈັດເກັບລາຍຮັບງົບປະມານ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ເຮັດໃຫ້ການຈັດເກັບລາຍຮັບງົບປະມານບັນລຸຕາມແຜນ ແລະ ເກີນແຜນເພີ່ມຂຶ້ນໃນແຕ່ລະປີ ຊຶ່ງສະແດງອອກຄື: ການຈັດເກັບລາຍຮັບລວມທັງໝົດເຂົ້າງົບປະມານບັນລຸໄດ້ 12,632 ຕື້ກີບ ລື່ນແຜນການ 28%. ໃນນີ້, ພົ້ນເດັ່ນແມ່ນການເກັບລາຍຮັບພູດທ້ອງຖິ່ນເກີນແຜນທຸກປີ ແລະ ມີລັກສະນະເພີ່ມຂຶ້ນຢ່າງຕັ້ງໜ້າ ປີ 2021 ເກີນແຜນ 82.01 ຕື້ກີບ, ປີ 2022 ເກີນແຜນ 153.97 ຕື້ກີບ. ປີ 2023 ເກີນແຜນ 791.45 ຕື້ກີບ. ປີ 2024 ເກີນແຜນ 1,413,64 ຕື້ກີບ. ຮອດເດືອນ ກັນຍາ ປີ 2025 ຈັດເກັບລາຍຮັບງົບປະມານໄດ້ທັງໝົດ 4,276 ຕື້ກີບ ເທົ່າກັບ 108% ຂອງ ແຜນການປີ, ການຄຸ້ມຄອງລາຍຈ່າຍ ປະຕິບັດໄດ້ 4,539 ຕື້ກີບ ເທົ່າກັບ 99%, ເຮັດໃຫ້ແຂວງກາຍເປັນແຂວງທີ່ມີລາຍຮັບກຸ້ມລາຍຈ່າຍ ແລະ ມີລາຍຮັບເກີນດຸນໃນແຕ່ລະປີ.
ສໍາລັບແຜນທິດທາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X 2026-2030 ພາຍໃຕ້ຄໍາຂວັນ “ພັດທະນາແຂວງຄໍາມ່ວນໃຫ້ເປັນແຫຼ່ງຜະລິດສະບຽງອາຫານ, ອຸດສາຫະກໍາ, ການບໍລິການ ແລະ ການທ່ອງທ່ຽວ ໜັກແໜ້ນ, ສີຂຽວ ແລະ ຍືນຍົງ” ຊຶ່ງໄດ້ກໍານົດ 6 ທິດທາງລວມດ 6 ເປົ້າໝາຍໃຫຍ່ ແລະ 26 ແຜນວຽກຈຸດສຸມ. ແຂວງ ຄໍາມ່ວນຈະສູ້ຊົນໃຫ້ເສດຖະກິດຂະຫຍາຍຕົວໃຫ້ໄດ້ 7% ຂຶ້ນໄປ, ສະເລ່ຍລາຍຮັບຕໍ່ຫົວຄົນ 80 ລ້ານກີບ ຫື 3,882 ໂດລາສະຫະລັດ/ຄົນ/ປີ.
(ຂ່າວ: ມະນີວັນ, ພາບ: ກອງຄໍາ)
ຄໍາເຫັນ