 |
ທ່ານ ເພັງນາ ຈັນທະພອນ ເລຂາພັກເມືອງດັກຈຶງ ໃຫ້ສໍາພາດເມື່ອບໍດົນຜ່ານມານີ້ວ່າ: ການນຳພາ-ຊີ້ນໍາການຈັດຕັ້ງປະຕິບັດວຽກງານທີ່ພົ້ນເດັ່ນທົ່ວເມືອງ ໂດຍຖືສຳຄັນການຈັດຕັ້ງເຜີຍແຜ່ເຊື່ອມຊຶມມະຕິສຳຄັນຂອງພັກ, ນິຕິກໍາ ຕິດພັນກັບການໂຄສະນາປາຖະກະຖາມູນເຊື້ອວັນສໍາຄັນຂອງຊາດ ຂອງສາກົນ ສາມາດເຮັດໃຫ້ທົ່ວເມືອງ ມີຄວາມສະຫງົບ, ພະນັກງານສຸມໃສ່ເຮັດໜ້າທີ່ວຽກງານຕາມການມອບໝາຍ, ຊຶ່ງໃນ 6 ເດືອນຕົ້ນປີ 2025 ເສດຖະກິດທົ່ວເມືອງ ມີການຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ ແລະ ຖືກທິດ ສາມາດຈັດເກັບລາຍຮັບເຂົ້າງົບປະມານບວກກັບງົບປະມານທີ່ແຂວງດຸ່ນໃຫ້ ບັນລຸໄດ້ 23 ຕື້ກວ່າກີບ, ເມືອງເກັບລາຍຮັບເຂົ້າງົບປະມານໄດ້ 7 ຕື້ ກວ່າກີບ ແລະ ສາມາດຄຸ້ມຄອງລາຍຈ່າຍທັງໝົດ 17 ຕື້ກວ່າກີບ, ໄດ້ຊຸກຍູ້ ສົ່ງເສີມການສ້າງເສດຖະກິດເອກະລາດ ຕາມທ່າແຮງຂອງເມືອງຫຼາຍຂຶ້ນ ເພື່ອຫຼີກລຽງສິນຄ້ານຳເຂົ້າທີ່ບໍ່ຈຳເປັນພາຍໃນເມືອງ ດ້ວຍການສົ່ງເສີມການປູກເຂົ້ານາແຊງ-ນາປີ ຕາມບ້ານທີ່ມີເງື່ອນໄຂ ໃຫ້ກຸ້ມກິນ, ປູກພືດຜັກ, ປູກໂສມ ແລະ ກາເຟໃຫ້ກາຍເປັນສິນຄ້າສູ່ຕະຫຼາດ ແລະຊຸກຍູ້ສົ່ງເສີມບັນດາຫົວໜ່ວຍທຸລະກິດຂະໜາດກາງ-ຂະໜາດນ້ອຍ ໃຫ້ດຳເນີນການແປຮູບຜົນຜະລິດກະສິກຳພາຍໃນເມືອງຫຼາຍຂຶ້ນ ເພື່ອສ້າງມູນຄ່າເພີ່ມໃຫັປະຊາຊົນ ຫຼື ຜູ້ປະກອບການ ໂດຍສະເພາະ ການແປຮູບກາເຟ, ນຳເຜີ້ງ, ໂສມ ແລະ ຕໍ່າແຜ່ນແພຊົນເຜົ່າ ລວມທັງສິນຄ້າອື່ນໆ ຂອງທອງຖິ່ນ ສາມາດສົ່ງອອກໄດ້ 300 ລ້ານກີບ; ສໍາລັບວຽກງານແກ້ໄຂຄວາມທຸກຍາກ ແມ່ນໄດ້ສຳເລັດປະເມີນຄວາມທຸກຍາກ ໃນ 59 ບ້ານ, ມີຄອບຄົວທັງໝົດ 5,188 ຄອບຄົວ ມີ 27,796 ຄົນ ຍິງ 13,904 ຄົນ, ປະເມີນຄອບຄົວພົ້ນທຸກ ໄດ້ 1,698 ຄອບຄົວ, ປະເມີນຄອບຄົວພັດທະນາ ໄດ້ 411 ຄອບຄົວ, ມີບ້ານພົ້ນທຸກ 13 ບ້ານ, ບ້ານພັດທະນາ 3 ບ້ານ. ນອກນັ້ນແລ້ວ, ຄະນະບໍລິຫານງານພັກເມືອງ ຍັງໄດ້ເປັນເຈົ້າການຊຸກຍູ້ ປຸກລະດົມ ບັນດາຫ້ອງການອ້ອມຂ້າງເມືອງ. ປະຊາຊົນບັນດາເຜົ່າຊາວເມືອງດັກຈຶງ ພ້ອມກັນອອກແຮງແຂ່ງຂັນກັນສ້າງຜົນງານ, ສ້າງຂະບວນການຮອບດ້ານ, ເປັນເຈົ້າການຕິດຕາມກວດກາຮັກສາຄວາມສະຫງົບຄວາມປອດໄພ, ຄວາມສະອາດ ແລະ ຈັດກິດຈະກຳແຂ່ງຂັນກິລາຢ່າງເປັນຂະບວນຟົດຟື້ນ ເພື່ອຂໍານັບຮັບຕ້ອນ ກອງປະຊຸມໃຫຍ່ ຄັ້ງທີ Xl ຂອງອົງຄະນະພັກແຂວງເຊກອງ ທີ່ຈະໄຂຂຶ້ນມໍ່ໆນີ້.
 |
ທ່ານ ເພັງນາ ຈັນທະພອນ ກ່າວຕື່ມວ່າ: ໃນການຈັດຕັ້ງປະຕິບັດຂົງເຂດວັດທະນະທໍາ-ສັງຄົມ ໂດຍສະເພາະ ວຽກງານການສຶກສາຊຶ່ງໃນການປະຕິບັດ 15 ຄາດໝາຍ ສາມາດບັນດຸໄດ້ 14 ຄາດໝາຍ ອັດຕາເລື່ອນຊັ້ນ ປ5 ຂຶ້ນ ມ1 ມີທ່າອ່ຽງເພີ່ມຂຶ້ນ ແລະ ອັດຕາປະລະການຮຽນມັດທະຍົມຕົ້ນຫຼຸດລົງ, ຄຸນນະພາບບໍລິການ, ປີ່ນປົວຄົນເຈັບ ຂອງແພດໝໍດີຂຶ້ນ ຕາມ 5 ດີ, 1 ພໍໃຈ ແລະ ການຈັດຕັ້ງປະຕິບັດ 11 ຄາດໝາຍ ວຽກງານສາທາລະນະສຸກ ສາມາດບັນລຸໄດ້ 10 ຄາດໝາຍ.
(ຂ່າວ: ອັດສະວິນ)
ຄໍາເຫັນ