 |
ກອງປະຊຸມໄດ້ສະຫຼຸບການຈັດຕັ້ງປະຕິບັດວຽກງານຂອງສະພາທິດສະດີສູນກາງພັກ ໄລຍະ 2021-2025 ຊຶ່ງສາມາດຢັ້ງຢືນໄດ້ຢ່າງໜັກແໜ້ນວ່າ: ຜ່ານມາ ສະພາທິດສະດີສູນກາງພັກໄດ້ມີຜົນສຳເລັດໃນການປະຕິບັດບົດບາດໃຫ້ຄຳປຶກສາແກ່ສູນກາງໄດ້ເປັນຢ່າງດີສະແດງອອກພົ້ນເດັ່ນໃນຫຼາຍດ້ານ: ດ້ານການປະຕິ ບັດນິຕິກຳ ສະພາທິດສະດີໄດ້ອອກນິຕິກຳສະເພາະ ແລະໄດ້ມີການປະຕິບັດຢ່າງເຂັ້ມງວດ; ດ້ານການຮັບຮອງເອົາຫົວຂໍ້ຄົ້ນຄວ້າ, ຜົນການຄົ້ນຄວ້າໃນລະດັບຕ່າງໆ ແລະ ມີຜະລິດຕະພັນອອກມາຮັບໃຊ້ສັງຄົມຢ່າງຕໍ່ເນື່ອງ; ດ້ານການຈັດຕັ້ງສຳມະນາຮ່ວມກັບສອງພັກ, ກັບບັນດາພັກການເມືອງອ້າຍນ້ອງ ແມ່ນໄດ້ຈັດຕັ້ງປະຕິ ບັດ ດ້ວຍຄວາມຮັບຜິດຊອບສູງ, ໝາກຜົນຂອງການຈັດສຳມະນາທິດສະດີ ແມ່ນໄດ້ສະຫຼຸບສັງລວມ ແລະ ລາຍງານ ສະໜອງຂໍ້ມູນໃຫ້ສູນກາງພັກໃນບັນຫາຕ່າງໆ ປະຕິບັດໄດ້ເປັນປົກກະຕິ; ດ້ານການຄົ້ນຄວ້າທິດສະດີການເມືອງ, ແນວຄິດທິດສະດີຂອງພັກ ແມ່ນໄດ້ສຳເລັດໃນຫຼາຍຂົງເຂດ ເປັນຕົ້ນການປະກອບສ່ວນໃນການຮ່າງລາຍງານການເມືອງຄັ້ງທີ XII ຂອງພັກ; ການຄົ້ນຄວ້າແນວຄິດ ໄກສອນ ພົມວິຫານ, ການຄົ້ນຄວ້າໂຄງການການເມືອງ, ການຈັດຕັ້ງສະຫຼຸບ 40 ປີປ່ຽນແປງໃໝ່ຮອບດ້ານມີຫຼັກການຂອງພັກ, ການຄົ້ນຄວ້າສ້າງບັນດາປະຖົມປັດໄຈຕາມເສັ້ນທາງກ້າວຂຶ້ນສັງຄົມນິຍົມ, ການຄົ້ນຄວ້າວິທະຍາສາດຮັບໃຊ້ວັນສຳຄັນຂອງພັກຂອງຊາດ ແລະ ການຄົ້ນຄວ້າຫົວຂໍ້ລະດັບຊາດທີ່ສູນກາງມອບໝາຍໃຫ້ ໄດ້ຮັບການຈັດຕັ້ງປະຕິບັດໄດ້ຮັບໝາກຜົນຢ່າງຈົບງາມ. ໃນໄລຍະຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ, ສະພາທິດສະດີສູນກາງພັກປະຕິບັດບົດບາດເປັນໃຈກາງໃນການຮ່າງມະຕິຂອງ ຄະນະບໍລິຫານງານສູນກາງພັກ ໄດ້ມີຜົນສຳເລັດໃນເບື້ອງຕົ້ນ ແລະ ກຳລັງຕັ້ງໜ້າເຂົ້າຮ່ວມດ້ວຍຄວາມຮັບຜິດຊອບສູງ, ປະສານສົມທົບກັບພາກສ່ວນທີ່ກ່ຽວ ຂ້ອງດ້ວຍຄວາມເປັນເຈົ້າການສູງ. ບັນດາຜົນງານ ແລະ ຜົນສໍາເລັດຂອງການຈັດຕັ້ງປະຕິບັດວຽກງານຂອງສະພາທິດສະດີສູນກາງພັກ ທີ່ຍາດມາໄດ້ ແມ່ນການປະກອບສ່ວນ ດ້ວຍຄວາມຮັບຜິດຊອບສູງທາງດ້ານສະຕິປັນຍາຂອງບັນດາສະຫາຍສະມາຊິກສະພາທິດສະດີສູນກາງພັກ.
 |
ເພື່ອຕອບສະໜອງຄວາມຮຽກຮ້ອງຕ້ອງການແຫ່ງການຄົ້ນຄວ້າທິດສະດີ ແລະ ພຶດຕິກຳໃນເງື່ອນໄຂ ໃໝ່ ແລະ ເພື່ອສະໜອງຂໍ້ມູນໃຫ້ສູນກາງພັກ ມີຄວາມຮັບປະກັນນັ້ນ ສະພາທິດສະດີສູນກາງພັກ ໄດ້ມີການແຕ່ງຕັ້ງກົງຈັກສະພາທິດສະດີສູນກາງພັກ ຊຸຸດໃໝ່ຂຶ້ນ. ໃນໂອກາດນີ້ ສະຫາຍ ດອນ ໄພວົງ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານມະຕິຕົກລົງວ່າດ້ວຍການແຕ່ງຕັ້ງປະທານ, ຮອງປະທານສະພາທິດສະດີສູນກາງພັກ ສະບັບເລກທີ 66/ກມສພ, ລົງວັນທີ 17 ເດືອນ 8 2026 ດັ່ງນີ້: ແຕ່ງຕັ້ງ ສະຫາຍ ກິແກ້ວ ໄຂຄໍາພິທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ເປັນປະທານສະພາທິດສະດີສູນກາງພັກ; ແຕ່ງຕັ້ງ ສະຫາຍ ຄໍາພັນ ເຜີຍຍະວົງ ກຳມະການກົມການເມືອງສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ອານຸພາບ ຕຸນາລົມ ຄະນະເລຂາທິການສູນກາງພັກ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ສະຫາຍ ລີເບີ ລີບົວປາວ ກຳມະການສູນກາງພັກ ຫົວໜ້າສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ສະຫາຍ ຄໍາມອນ ຈັນທະຈິດ ກໍາມະການສໍາຮອງສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ເປັນຮອງປະທານສະພາທິດສະດີສູນກາງພັກ. ນອກຈາກນັ້ນ, ຍັງໄດ້ຜ່ານມະຕິຕົກລົງວ່າດ້ວຍການແຕ່ງຕັ້ງຫົວໜ້າຄະນະກໍາມະການດ້ານຕ່າງໆ ສະບັບເລກທີ 180/ຄລສພ, ລົງວັນທີ 17 ເດືອນ 8 2026, ແຕ່ງຕັ້ງຫົວໜ້າຄະນະກໍາມະການດ້ານຕ່າງໆ ຈໍານວນ 4 ສະຫາຍ ແລະ ແຕ່ງຕັ້ງສະມາຊິກສະພາທິດສະດີສູນກາງພັກ ຈໍານວນ 30 ສະຫາຍ.
 |
ໃນໂອກາດດັ່ງກ່າວ, ສະຫາຍ ກິແກ້ວ ໄຂຄຳພິທູນ ໄດ້ມີຄໍາເຫັນໂອ້ລົມ ແລະ ຍ້ອງຍໍຊົມເຊີຍຕໍ່ຜົນງານ ແລະ ການປະກອບສ່ວນຂອງບັນດາສະຫາຍສະມາຊິກສະພາທິດສະດີສູນກາງພັກຊຸດຜ່ານມາ ແລະ ເນັ້ນໜັກໃຫ້ບັນດາສະຫາຍທີ່ໄດ້ຮັບການແຕ່ງຕັ້ງໃໝ່ຈົ່ງເອົາໃຈໃສ່ຈັດຕັ້ງປະຕິບັດໜ້າທີ່ວຽກງານ ທີ່ສະພາທິດສະດີສູນກາງພັກມອບໝາຍໃຫ້ດ້ວຍຄວາມຮັບຜິດຊອບສູງ ແລະ ໃຫ້ມີຜົນສໍາເລັດໃໝ່, ຜົນງານໃໝ່ຍິ່ງໃຫຍ່ກວ່າເກົ່າ, ປະກອບສ່ວນເຂົ້າໃນການຄົ້ນຄວ້າທິດສະດີການເມືອງ, ແນວຄິດທິດສະດີຂອງພັກ ແລະ ວິທະຍາ ສາດສັງຄົມ ໃຫ້ມີຄຸນນະພາບ ແລະ ສະໜອງຂໍ້ມູນໃຫ້ສູນກາງພັກໃນວຽກງານຕ່າງໆ ທີ່ອຸດົມສົມບູນ ແລະ ທັນເວລາ.
ກອງປະຊຸມສະຫຼຸບການເຄື່ອນໄຫວວຽກງານສະພາທິດສະດີສູນກາງພັກ ດໍາເນີນໄປເປັນເວລາ 1 ຄາບ ແລະ ປິດລົງດ້ວຍຜົນສໍາເລັດຢ່າງຈົບງາມ.
(ຂ່າວ: ສະພາທິດສະດີສູນກາງ)
ຄໍາເຫັນ