ສາຍແນນກັບກາເຟຢຸນນານ

ຢຸນນານ ເປັນແຂວງທີ່ມີເນື້ອທີ່ປູກກາເຟໃຫຍ່ທີ່ສຸດຂອງ ສປ ຈີນ, ມີປະຫວັດການປູກກາເຟມາເປັນເວລາຮ້ອຍກວ່າປີແລ້ວ, ເນື້ອທີ່ປູກ ແລະ ຜົນຜະລິດກາເຟໄດ້ກວມ 98% ຂອງຈີນ ຂຶ້ນໄປ. ປັດຈຸບັນນີ້, ເນື້ອທີ່ປູກກາເຟຂອງແຂວງຢຸນນານ ມີເຖິງ 84.700 ເຮັກຕາ, ຜົນຜະລິດ ກາເຟດິບມີເຖິງ 114.00 ໂຕນ, ມູນຄ່າການຜະລິດທັງໝົດ 41,8 ຕື້ຢວນຂຶ້ນໄປ. ແຫຼ່ງປູກກາເຟຂອງແຂວງຢຸນນານຕົ້ນຕໍຢູ່ນະຄອນຜູເອີ, ນະຄອນປາວຊານ, ນະຄອນລິນຊາງ ແລະ ກິ່ງແຂວງເຕີຫົງເປັນຕົ້ນ. ໃນນັ້ນ, ຜົນຜະລິດຫຼາຍກວ່າເຄິ່ງໜຶ່ງ ມາຈາກນະຄອນຜູເອີ. ກາເຟຢຸນນານ ໄດ້ດຶງດູດນັກວິຊາການທີ່ມີສ່ວນກ່ຽວຂ້ອງກັບກາເຟ ທັງພາຍໃນ ແລະ ຕ່າງປະເທດ ມາເຕົ້າໂຮມກັນຢູ່ທີ່ນີ້, ເຮັດໃຫ້ກາເຟແຂວງຢຸນນານ ມີຄຸນນະພາບນັບມື້ນັບດີຂຶ້ນ.
3 ເຊັ່ນຄົນ ທີ່ສືບທອດພາລະກິດກາເຟເປັນເວລາ 26 ປີ ຢູ່ສວນກາເຟສຽວອາວຈື ນະຄອນຜູເອີ ແຂວງຢຸນນານ, ມີ “3 ເຊັ່ນຄົນ” ໃນຄອບຄົວໜຶ່ງໄດ້ສືບທອດພາລະກິດກາເຟມາເປັນເວລາ 26 ປີ.
ໃນທ້າຍຊຸມປີ 1980, ນະຄອນຜູເອີ ໄດ້ທົດລອງເຜີຍແຜ່ການປູກກາເຟ ໃນເນື້ອທີ່ກວ້າງ, ທ່ານ ລຽວຊິວກຸ້ຍ ໄດ້ຮັບເຊີນເຂົ້າມາປູກກາເຟຢູ່ນະຄອນຜູເອີ ຈາກແຂວງໄຫນານ ໃນຖານະເປັນນັກວິຊາການ. ທ່ານໄດ້ເຜີຍແຜ່ບົດຮຽນດ້ານການປູກກາເຟຂອງຕົນ ໃຫ້ຊາວກະສິກອນປູກກາເຟທ້ອງຖິ່ນ ແລະ ກາຍເປັນໜຶ່ງໃນຜູ້ເປັນສັກຂີພິຍານໃຫ້ແກ່ການພັດທະນາອຸດສາຫະກຳກາເຟຂອງນະຄອນຜູເອີ. ປີ 1997 ທ່ານ ລຽວຊິວກຸ້ຍ ພະນັກງານບຳນານ ໄດ້ສຳປະທານເນື້ອທີ່ດິນເພື່ອປູກໄຮ່ກາເຟ ໃນຄວາມຝັນຂອງຕົນ. ການເວລາໄດ້ຜ່ານພົ້ນໄປ, ທ່ານ ລຽວເຊິງ ຜູ້ເປັນລູກ ແລະ ທ້າວ ລຽວຊືຫາວ ຜູ້ເປັນຫຼານ ກໍໄດ້ເຂົ້າຮ່ວມກິດຈະກຳປູກກາເຟຕາມໆກັນ. ທ້າວ ລຽວຊືຫາວ ພາຍຫຼັງຮຽນຈົບຈາກມະຫາວິທະຍາໄລແລ້ວ ກັບເມືອນະຄອນຜູເອີ ໃນປີ 2019, ລາວເວົ້າວ່າ: ກາເຟຈີນ ຍັງມີຄວາມສາມາດບົ່ມຊ້ອນອັນມະຫາສານ ແລະ ຈະເຮັດໄດ້ດີກວ່າເກົ່າໃນອະນາຄົດ.”
ສາຍແນນກາເຟຂອງ ທ່ານ ມາຕີໂປລັກ “ກາເຟຜູເອີ ດີຫຼາຍ, ກາເຟຢຸນນານ ກໍດີຄືກັນ, ສາມາດກ້າວເດີນໄປສູ່ທົ່ວໂລກ.” ທ່ານ ມາຕີໂປລັກ ຈາກລັດເທັກຊາສ ຂອງອາເມຣິກາ ກ່າວວ່າ: ໃນຊຸມປີຜ່ານມາ, ການປ່ຽນແປງໃຫຍ່ທີ່ສຸດ ສຳລັບກາເຟຢຸນນານ ກໍແມ່ນຄຸນນະພາບຂອງກາເຟ ໄດ້ຮັບການປັບປຸງໃຫ້ດີຂຶ້ນເປັນກ້າວໆ.
ປີ 2005, ທ່ານ ມາຕີໂປລັກ ໄດ້ເດີນທາງໄປ ພາກຕາເວັນຕົກຂອງຈີນ, ຮຽນທັງພາສາຈີນ ທັງຮຽນ ຮູ້ກ່ຽວກັບການເປີດຮ້ານເຄັກ ແລະ ຮ້ານກາເຟ. ປີ 2014, ທ່ານ ມາຕີໂປລັກ ໄດ້ຍ້າຍໄປປະຈຳຢູ່ນະຄອນຜູເອີ ແຂວງຢຸນນານ ແລະ ເປີດຫ້ອງທົດລອງກາເຟຈູ້ຕຽນ ຢູ່ນະຄອນຜູເອີ ໃນປີ 2015. ຫ້ອງທົດລອງກາເຟແຫ່ງນີ້ ບໍ່ພຽງແຕ່ເປັນຮ້ານກາເຟ ທີ່ສາມາດຜະລິດກາເຟທ້ອງຖິ່ນທີ່ມີຄຸນນະພາບສູງເທົ່ານັ້ນ, ຫາກຍັງມີຫຼັກສູດກາເຟວິຊາການຕ່າງໆ ຂອງສະມາຄົມກາເຟແບບຍືນຍົງ ຫຼື SCI, ສະມາຄົມກາເຟວິຊາການ ຫຼື SCA ແລະ ສະມາຄົມຄຸນນະພາບກາເຟ ຫຼື CQI ຊຶ່ງໄດ້ຊຸກຍູ້ໃຫ້ກາເຟຢຸນນານ ມີຄຸນນະພາບນັບມື້ນັບດີຂຶ້ນ ແລະ ເຮັດໃຫ້ກາເຟ ທີ່ມີຄຸນນະພາບດີ ມີບັນຍາກາດການຄ້ານັບມື້ນັບຫຼາຍຂຶ້ນ.
ໃນອະນາຄົດ, ທ່ານ ມາຕີໂປລັກ ທີ່ເອີ້ນຕົນເປັນຊາວຢຸນນານໃໝ່ ຫວັງວ່າ, ຈະສາມາດເພີ່ມມູນຄ່າເພີ່ມໃຫ້ກາເຟຫຼາຍກວ່າເກົ່າ ເພື່ອສະໜອງກາເຟ ທີ່ມີຄຸນນະພາບດີຂອງຢຸນນານ ໃຫ້ແກ່ລູກຄ້າດ້ວຍວິທີໂດຍກົງທີ່ສຸດ, ເຮັດໃຫ້ຜູ້ບໍລິໂພກທຸກທ່ານ ລ້ວນແຕ່ມີໂອກາດຊິມກາເຟຢຸນນານທີ່ດີ.
(ແຫຼ່ງຂ່າວ: ຂ່າວສານ CMG, ຂໍ້ມູນຂ່າວສານຈິ່ນໄທ)