 |
ເປັນການແກ້ໄຂບັນຫາລົດແອອັດ, ຜ່ານເສັ້ນທາງ T4 ຫຼື ທາງກໍາແພງເມືອງ, ສະໜັບສະໜູນການພັດທະນາເຂດເສດຖະກິດກວມລວມໄຊເສດຖາ ທີ່ເປັນໂຄງການຮ່ວມມື ລະຫວ່າງ ລັດຖະບານ ສປປ ລາວ ແລະ ລັດຖະບານ ສປ ຈີນ. ເປັນເສັ້ນທາງຂະຫຍາຍວົງແຫວນຮອບນອກຂອງຕົວເມືອງ ພັດທະນາໄປໃສ່ດິນໂຄກ ໃຫ້ເປັນທີ່ຢູ່ອາໃສ. ສິ່ງສໍາຄັນອີກອັນໜຶ່ງ, ແມ່ນເປັນການຈັດຕັ້ງປະຕິບັດແບບທົດລອງ ນະໂຍບາຍຫັນທີ່ດິນເປັນທຶນ ເປັນການເພີ່ມມູນຄ່າ ແລະ ລາຄາຂອງທີ່ດິນໃນເຂດດັ່ງກ່າວໃຫ້ສູງຂຶ້ນ, ດ້ວຍການເອົາທີ່ດິນໃນເຂດດັ່ງກ່າວ ສ້າງຄຸນຄ່າ ແລະ ກຸ້ມຕົວມັນເອງ.
ກ່ອນຈະຈັດຕັ້ງປະຕິບັດໂຄງການຫັນທີ່ດິນເປັນທຶນ (ກໍ່ສ້າງເສັ້ນທາງ 450 ປີ), ລັດຖະບານ ແລະ ອົງການປົກຄອງນະຄອນຫຼວງວຽງຈັນ ໄດ້ອອກບັນດານິຕິກຳຢ່າງລະອຽດ ຈະແຈ້ງ ແລະ ຄົບຖ້ວນເຊັ່ນ: ຂໍ້ຕົກລົງຂອງນາຍົກລັດຖະມົນ ເລກທີ 66/ນຍ, ລົງວັນທີ 11 ມິຖຸນາ 2008 ອານຸມັດການກໍ່ສ້າງເສັ້ນທາງ 450 ປີ ແລະ ສະຫງວນທີ່ດິນສອງຂ້າງທາງ 450 ປີ ເບື້ອງລະ 50 ແມັດ, ຂາຍເປັນທຶນຊໍາລະຄ່າກໍ່ສ້າງ ແລະ ເງິນກູ້ຢືມຈາກທະນາຄານ ສປປ ລາວ.ແຈ້ງການ ຂອງທ່ານເຈົ້າຄອງ ນະຄອນຫຼວງວຽງຈັນ ເລກທີ 126/ຈນວ, ລົງວັນທີ 24 ເມສາ 2008 ຊຶ່ງກຳນົດໄວ້ ຫ້າມບໍ່ໃຫ້ບຸກຄົນ, ນິຕິບຸກຄົນ ເຂົ້າໄປບຸກລຸກປຸກສ້າງໃສ່ດິນເຂດສະຫງວນເບື້ອງລະ 50 ແມັດ ຂອງເສັ້ນທາງ 450 ປີ ຢ່າງເດັດຂາດ. ແຈ້ງການ ຂອງລັດຖະບານ ເລກທີ 43/ຄລບ, ລົງວັນທີ 8 ມັງກອນ 2010, ລັດຖອນສິດນໍາໃຊ້ທີ່ດິນບຸກຄົນ, ນິຕິບຸກຄົນ ແລະ ການຈັດຕັ້ງໃດໜຶ່ງ ຕາມແລວຖະໜົນ 450 ປີ ກວ້າງ 150 ແມັດ, ຍາວ 20,3 ກິໂລແມັດ ມາເປັນຂອງລັດ. ຂໍ້ຕົກລົງ ຂອງທ່ານເຈົ້າຄອງ ນວ ເລກທີ 617/ຈນວ, ລົງວັນທີ 30 ພຶດສະພາ 2012 ໄດ້ກຳນົດໄວ້ວ່າ ໃຫ້ເຈົ້າຂອງສິດນຳໃຊ້ທີ່ດິນໃນເຂດສະຫງວນ ມາຮັບເອົາຄ່າຊົດ. ຂໍ້ຕົກລົງແຕ່ງຕັ້ງ ຄະນະກຳມະການຮັບຜິດຊອບໂຄງການ 11 ຄະນະ (ເລກທີ 132/ຈນວ, ເລກທີ 040/ຈນວ, ເລກທີ 071/ຈນວ, ເລກທີ 074/ຈນວ, ເລກທີ 0546/ຈນວ, ເລກທີ 0117/ຈນວ, ເລກທີ 0081/ຈນວ, ເລກທີ 0742/ຈນວ, ຄະນະ ເລກທີ 271/ຫສນຍ, ຄະນະກຳມະການ ເລກທີ 591/ຈນວ ແລະ ເລກທີ 483/ຈນວ).
 |
ຫຼັງຈາກນັ້ນ, ລັດຖະບານຈຶ່ງຕົກລົງໃຫ້ ກຸ່ມບໍລິສັດດວງຈະເລີນ ພັດທະນາກໍ່ສ້າງ ຈໍາກັດ ຜູ້ດຽວ ເປັນບໍລິສັດຂອງຄົນລາວ ມີສຳນັກງານຕັ້ງຢູ່ບ້ານໂພນທອງ, ເມືອງໄຊເສດຖາ, ນະຄອນຫຼວງວຽງຈັນ ຈັດຕັ້ງປະບັດການກໍ່ສ້າງເສັ້ນທາງດ້ວຍຄວາມຮັບຜິດຊອບສູງ, ມີຄວາມຍາວ 23 ກິໂລແມັດ, ກວ້າງ 33 ແມັດ. ຈົນສາມາດກໍ່ສ້າງເສັ້ນທາງສຳເລັດ ຕາມສັນຍາການກໍ່ສ້າງ ພາຍໃນ 2 ປີ (2008 – 2010) ທັນຮັບໃຊ້ງານມະຫາກໍາກິລາຊີເກມ ຄັ້ງທີ 25 ແລະ ງານສະເຫຼີມສະຫຼອງ ເປັນນະຄອນຫຼວງ ຄົບຮອບ 450 ປີ.
ພາຍຫຼັງສ້າງສໍາເລັດ ໄດ້ເຮັດໃຫ້ເຂດໃກ້ຄຽງທີ່ເຊື່ອມຕໍ່ຖະໜົນ 450 ປີ ມີການພັດທະນາເພີ່ມຂຶ້ນຫຼາຍເປັນຕົ້ນແມ່ນ: ເຂດນິຄົມອຸດສາຫະກຳ ນວ, ເຂດພັດທະນາກວມລວມໄຊເສດຖາ, ຄິວລົດສາຍໃຕ້, ສໍານັກງານຂອງລັດ, ບັນດາບ້ານທີ່ຢູ່ອ້ອມຂ້າງ ມີປະຊາຊົນເຂົ້າມາອາໄສໜາແໜ້ນ ແລະ ທໍາການຜະລິດຫຼາຍຂຶ້ນ, ເປັນໝູ່ບ້ານໃຫຍ່, ມີຫ້າງຮ້ານຂາຍເຄື່ອງທີ່ໃຫຍ່ ແລະ ທັນສະໄໝຫຼາຍຂຶ້ນ. ປະຊາຊົນ ໄດ້ຊົມໃຊ້ທາງສະດວກຂຶ້ນ, ບັນດາລົດໜັກ, ລົດຂົນສົ່ງ, ລົດທີ່ເຂົ້າມາ ແລະ ຈະອອກໄປສູ່ທ່ານາແລ້ງ ໄດ້ໃຊ້ຖະໜົນສາຍນີ້ ເປັນຫຼັກ, ໄດ້ແກ້ໄຂບັນຫາລົດແອອັດ ພາຍໃນຕົວເມືອງນະຄອນຫຼວງວຽງຈັນ ເປັນຢ່າງດີ. ທີ່ດິນບໍລິເວນດັ່ງກ່າວ ໄດ້ຮັບການພັດທະນາ, ມີມູນຄ່າ ແລະ ລາຄາສູງຂຶ້ນຫຼາຍເທົ່າຕົວ.
 |
ໂຄງການກໍ່ສ້າງເສັ້ນທາງ 450 ປີ ສ້າງໂດຍກຸ່ມບໍລິສັດດວງຈະເລີນພັດທະນາກໍ່ສ້າງ ຈໍາກັດຜູ້ດຽວ ສາມາດເວົ້າໄດ້ວ່າ: ເປັນໂຄງການຕົວແບບໃນການຫັນທີ່ດິນເປັນທຶນ ໂດຍບໍ່ໄດ້ນໍາໃຊ້ງົບປະມານຂອງລັດ (ເອົາໂຄງການກຸ້ມໂຄງການ) ແລະ ເສີມຂະຫຍາຍໄປສູ່ການກໍ່ສ້າງເສັ້ນທາງອື່ນໆ. ເຮັດໃຫ້ປະຊາຊົນທີ່ມີດິນໃນເຂດດັ່ງກ່າວ ມີມູນຄ່າສູງຂຶ້ນ. ລັດຍັງໄດ້ພາສີອາກອນທີ່ດິນຈາກການໂອນສິດນຳໃຊ້ທີ່ດິນ ແລະ ໄດ້ພາສີອາກອນ ຈາກຜູ້ປະກອບການ ດໍາເນີນທຸລະກິດ ຢູ່ລຽບທາງ 450 ປີ ຄິດເປັນເງິນຫຼາຍລ້ານໂດລາ. ເປັນເສັ້ນທາງບໍ່ຜ່ານຕົວເມືອງ ຫຼຸດໄລຍະທາງໄດ້ 7 ກວ່າກິໂລແມັດ, ເຮັດໃຫ້ປະຢັດນໍ້າມັນ. ເຮັດໃຫ້ການສັນຈອນມີຄວາມສະດວກສະບາຍຍິ່ງຂຶ້ນ ແລະ ເປັນແລວເສດຖະກິດຂອງນະຄອນຫຼວງວຽງຈັນ ເຊື່ອມຕໍ່ພາກໃຕ້, ພາກເໜືອ, ເຊື່ອມຕໍ່ພາກພື້ນໃນອາຊຽນ.
ຄໍາເຫັນ