 |
ສໍາລັບວິທະຍຸກະຈາຍສຽງກອງທັບໃນຖານະທີ່ເປັນສື່ມວນຊົນ ແລະ ເປັນ "ກະບອກສຽງ" ອັນແຫຼມຄົມຂອງຄະນະພັກກະຊວງປ້ອງກັນປະເທດ ໃນຕະຫຼອດໄລຍະຜ່ານມາ ກໍໄດ້ເອົາໃຈໃສ່ປັບປຸງ ແລະ ພັດທະນາຕົນເອງ ຊຶ່ງສາມາດຍາດໄດ້ຜົນສຳເລັດອັນພົ້ນເດັ່ນຫຼາຍດ້ານ ເປັນຕົ້ນ: ເປັນປາກກະບອກສຽງທີ່ໜັກແໜ້ນ ໃນການຜັນຂະຫຍາຍມະຕິ, ຄຳສັ່ງຂອງພັກ-ລັດ, ຂອງກອງທັບ, ສຶກສາອົບຮົມມູນເຊື້ອຮັກຊາດ, ເຊີດຊູທາດແທ້ "ນັກຮົບປະຕິວັດ", ເປັນກຳລັງສື່ຫຼັກໃນການຕອບໂຕ້ ແລະ ຂ່າວບິດເບືອນ (Fake News) ເພື່ອປົກປັກຮັກສາຄວາມສາມັກຄີ, ດ້ານການພັດທະນາເນື້ອໃນ ແລະ ຮູບແບບລາຍການ, ໄດ້ຜະລິດລາຍການທີ່ຫຼາກຫຼາຍ (ຂ່າວສານ, ມູນເຊື້ອຂອງກອງທັບ, ສຶກສາອົບຮົມ, ວັດທະນະທຳ, ເພງປະຕິວັດ ແລະ ສຸຂະພາບ), ເຄື່ອນໄຫວເກັບກຳຂ່າວ, ບົດທີ່ສ່ອງແສງຜົນງານຂອງບັນດາກົມກອງກຳລັງຫຼວງ-ກຳລັງທ້ອງຖິ່ນ, ເຫຼົ່າຮົບໄດ້ຢ່າງວ່ອງໄວ ແລະ ທັນເຫດການ. ດ້ານການຫັນເປັນດີຈີຕອນ ແລະ ເຕັກໂນໂລຊີ ຂະຫຍາຍຈາກຄື້ນ FM ດັ້ງເດີມສູ່ລະບົບດີຈີຕອນ ແລະ ສື່ອອນລາຍເຮັດໃຫ້ການຮັບຟັງບໍ່ມີພົມແດນ, ເຂົ້າເຖິງມະຫາຊົນທັງພາຍໃນ ແລະ ຕ່າງປະເທດໄດ້ຕະຫຼອດ 24 ຊົ່ວໂມງ ຊຶ່ງໄດ້ສ່ອງແສງເຖິງຜົນງານການເຄື່ອນໄຫວດ້ານຕ່າງໆ ຂອງກອງທັບ ທີ່ປິ່ນອ້ອມ 4 ໜ້າທີ່ໃຫຍ່ 26 ແຜນງານ, ເພີ່ມພູນຮັກສາສາຍພົວພັນມິດຕະພາບ "ກອງທັບກັບປະຊາຊົນ ຄືປາກັບນ້ຳ" ໃຫ້ແໜ້ນແຟ້ນຍິ່ງຂຶ້ນ. ດ້ານການກໍ່ສ້າງບຸກຄະລາກອນ ແລະ ກົງຈັກຈັດຕັ້ງ ໄດ້ຍົກລະດັບພະນັກງານ, ນັກຂ່າວ, ໂຄສົກ ແລະ ເຕັກນິກ ໃຫ້ມີຄວາມຊຳນານ, ມີຄຸນສົມບັດ ສິນທຳປະຕິວັດ, ແລະ ທັນກັບເຕັກໂນໂລຊີ, ປັບປຸງແບບແຜນວິທີເຮັດວຽກໃຫ້ມີຄວາມເປັນເອກະພາບ, ມີລະບຽບຮຽບຮ້ອຍ ແລະ ນຳໃຊ້ງົບປະມານຢ່າງມີປະສິດທິພາບ.
 |
ທ່ານ ພັນຕີ ເຄນໄຊ ພິມບຸນເລີຍ ໄດ້ໃຫ້ຮູ້ຕື່ມວ່າ: ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານການເມືອງ-ແນວຄິດ ແລະ ທັນກັບຍຸກສະໄໝ, ທິດທາງໃນການພັດທະນາສື່ວິທະຍຸກະຈາຍສຽງກອງທັບ ໃນໄລຍະຕໍ່ໜ້າ ໄດ້ກຳນົດສຸມໃສ່ 4 ດ້ານ ເປັນຕົ້ນຕໍ ຄື: ຍົກລະດັບເນື້ອໃນ ແລະ ຮູບແບບ ສ້າງເນື້ອໃນໃຫ້ສັ້ນ, ກະທັດຮັດ, ທັນເຫດການ. ຜະລິດລາຍການໃໝ່ໆ ເພື່ອດຶງດູດຄົນຮຸ່ນໃໝ່, ເລັ່ງຫັນເປັນດີຈີຕອນ, ພັດທະນາສູ່ລະບົບ "ສື່ປະສົມ" ແລະ ຂະຫຍາຍຊ່ອງທາງອອນລາຍ (Website, Facebook, TikTok, YouTube) ໃຫ້ຮັບຟັງໄດ້ທຸກທີ່, ທຸກເວລາ, ພັດທະນາບຸກຄະລາກອນສື່ມວນຊົນຍຸກໃໝ່, ກໍ່ສ້າງພະນັກງານໃຫ້ມີທັດສະນະການເມືອງໜັກແໜ້ນ, ມີທັກສະໃນການຂຽນຂ່າວ, ບົດສາລະຄະດີ, ອັດສຽງ, ຕັດຕໍ່, ຖ່າຍຮູບ ແລະ ບໍລິຫານສື່ອອນລາຍໃຫ້ໄດ້ຢ່າງມີປະສິດພາບສູງ), ອັບເກຣດເຕັກໂນໂລຊີ ແລະ ປັບປຸງພື້ນຖານໂຄງລ່າງ ເຊັ່ນ: ປັບປຸງຫ້ອງອັດສຽງ, ເຄື່ອງສົ່ງ ແລະ ອຸປະກອນເຕັກນິກໃຫ້ເປັນດີຈີຕອນທັນສະໄໝ, ນຳໃຊ້ລະບົບ Big Data ແລະ ເຄື່ອງມືວິເຄາະສື່ ເພື່ອປະເມິນຄວາມຕ້ອງການຂອງຜູ້ຟັງ.
 |
ເນື່ອງໃນໂອກາດ ວັນສື່ມວນຊົນ ແລະ ການພິມຈຳໜ່າຍ ຄົບຮອບ 76 ປີ, ຂ້າພະເຈົ້າ ຂໍອວຍພອນໄຊ ໃຫ້ສື່ມວນຊົນທຸກທ່ານ ຈົ່ງມີສຸຂະພາບແຂງແຮງ, ມີຄວາມສຸກສ່ວນຕົວ ແລະ ຄອບຄົວ, ແລະ ຍາດໄດ້ຜົນສຳເລັດໃໝ່, ຈົ່ງພ້ອມກັນຮັກສາຈັນຍາບັນ: ຢຶດໝັ້ນໃນຄວາມຈິງ, ເປັນສື່ທີ່ຮັບຜິດຊອບຕໍ່ສັງຄົມ, ແລະ ເປັນທີ່ໄວ້ວາງໃຈຂອງປະຊາຊົນ, ອວຍພອນໃຫ້ສື່ມວນຊົນລາວ ແລະ ສື່ມວນຊົນກອງທັບ ຈົ່ງກ້າວໜ້າ, ທັນສະໄໝ ແລະ ເຕີບໃຫຍ່ຢ່າງບໍ່ຢຸດຢັ້ງ.
ຄໍາເຫັນ