ສພຊ ວາງວິໃສທັດຮອດປີ 2030 ໃຫ້ມີກົດໝາຍເປັນລະບົບຄົບຖ້ວນໃນທຸກຂະແໜງການ

ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດໄດ້ລາຍງານກ່ຽວກັບແຜນການເຄື່ອນໄຫວວຽກງານ 5 ປີ (2026-2030) ຂອງສະພາແຫ່ງຊາດ ຊຸດທີ X ຊຶ່ງມີເນື້ອໃນບາງດ້ານວ່າ: ເພື່ອເປັນການສືບຕໍ່ຜັນຂະຫຍາຍວິໄສທັດຂອງສະພາແຫ່ງຊາດຮອດປີ 2030 ທີ່ວ່າ ສປປ ລາວ ຮັບປະກັນໃຫ້ມີກົດໝາຍເປັນລະບົບຄົບຖ້ວນໃນທຸກຂະແໜງການ, ຮັບປະກັນສິດທິພື້ນຖານຂອງພົນລະເມືອງ, ຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍທີ່ສັກສິດ ແລະ ເຂັ້ມງວດ ແນໃສ່ສ້າງຄວາມໝັ້ນຄົງໃຫ້ລັດປະຊາທິປະໄຕປະຊາຊົນ ໃຫ້ເປັນລັດຂອງປະຊາ ຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ. ດັ່ງນັ້ນ, ສະພາແຫ່ງຊາດ ຊຸດທີ X ຈຶ່ງໄດ້ກຳນົດ ແຜນການເຄື່ອນໄຫວວຽກງານ 5 ປີຂອງຕົນ ຊຶ່ງຈຸດປະສົງໄດ້ກຳນົດທິດທາງ, ແຜນວຽກຈຸດສຸມ ແລະ ມາດຕະການຈັດຕັ້ງປະຕິບັດຕາມພາລະບົດບາດຂອງສະພາແຫ່ງຊາດ ທີ່ໄດ້ກຳນົດໃນລັດຖະທຳມະນູນ ແລະ ກົດໝາຍ ເພື່ອເປັນບ່ອນອີງໃຫ້ການເຄື່ອນໄຫວວຽກງານຂອງສະພາແຫ່ງຊາດ ແລະ ສະມາຊິກສະພາແຫ່ງຊາດ ຊຸດທີ X, ຮັບປະກັນການປະຕິບັດສິດ ແລະ ໜ້າທີ່ຕາມກົດໝາຍ, ຕອບສະໜອງຄວາມຮຽກຮ້ອງຕ້ອງການໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ສອດຄ່ອງກັບການພັດທະນາເສດຖະກິດ-ສັງຄົມ 5 ປີ ຄັ້ງທີ X ຕາມທິດຍືນຍົງ ແລະ ສີຂຽວໃນໄລຍະໃໝ່.
ທິດທາງລວມ: 1) ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ໂຄງການການເມືອງສະບັບທີ 3 ຂອງພັກ, ລັດຖະທຳມະນູນ, ກົດໝາຍ, ມະຕິກອງປະຊຸມສະພາແຫ່ງຊາດ ແລະ ຫັນເປັນນິຕິກຳໃຕ້ກົດໝາຍ, ເປັນແຜນການ, ແຜນງານ, ໂຄງການຂອງສະພາແຫ່ງຊາດ (5 ແຜນງານ, 24 ໂຄງການ) ເພື່ອຮັບປະກັນການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ ມີປະສິດທິພາບ ແລະ ປະສິດທິຜົນສູງຂຶ້ນເລື້ອຍໆ; 2) ສືບຕໍ່ປັບປຸງກົງຈັກການຈັດຕັ້ງພາຍໃນສະພາແຫ່ງຊາດ ໃຫ້ສຳເລັດຕາມທິດກະທັດຮັດ ໂລ່ງລ່ຽນ ແລະ ມີປະສິດທິຜົນ, ມີຂຶ້ນມີລົງ, ມີເຂົ້າມີອອກ; 3) ປັບປຸງລະບົບກົນໄກປະສານງານລະຫວ່າງ ສະພາແຫ່ງຊາດ ກັບລັດຖະບານ ແລະ ພາກສ່ວນກ່ຽວຂ້ອງໃຫ້ແໜ້ນແຟ້ນ; 4) ຍົກສູງຄວາມຮັບຜິດຊອບໃນການປະຕິບັດໜ້າທີ່ການເມືອງຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ວິຊາການທີ່ເປັນເສນາທິການໃນການຄົ້ນຄວ້າ, ວິເຄາະ, ວິໄຈ ແລະ ນໍາໃຊ້ຜົນການຄົ້ນຄວ້າ ເຂົ້າໃນການປະກອບຄໍາຄິດຄໍາເຫັນ, ການຮ່າງເອກະສານສໍາຄັນ, ການສ້າງ ແລະ ປັບປຸງກົດໝາຍ, ການພິຈາລະນາຮັບຮອງບັນຫາສໍາຄັນພື້ນຖານຂອງປະເທດຊາດ ຢູ່ໃນກອງປະຊຸມສະພາແຫ່ງຊາດ, ກອງປະຊຸມຄະນະປະຈຳສະພາແຫ່ງຊາດ ແລະ ກອງປະຊຸມສະພາປະຊາຊົນຂັ້ນແຂວງ; 5) ເພີ່ມທະວີການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດລັດຖະທຳມະນູນ, ກົດໝາຍ, ມະຕິຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ເປັນຮູບປະທຳ ແລະ ໃຫ້ທັນເວລາ; 6) ເອົາໃຈໃສ່ຄົ້ນຄວ້າ ແລະ ປັບປຸງນິຕິກຳຂອງສະພາແຫ່ງຊາດໃຫ້ສອດຄ່ອງ; 7) ເອົາໃຈໃສ່ສ້າງຄວາມເຂັ້ມແຂງໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກ ງານເສນາທິການດ້ວຍການຍົກລະດັບທາງດ້ານທິດສະດີ, ວິຊາສະເພາະ ແລະ ຈັດຝຶກອົບຮົມສຳມະນາໃນຫົວຂໍ້ຕ່າງໆ; 8) ສືບຕໍ່ສູ້ຊົນນໍາໃຊ້ງົບປະມານບົນພື້ນຖານປະຍັດມັດທະຍັດ ແລະ ວຽກງານອື່ນ; 9) ເພີ່ມທະວີການຮ່ວມມືຂອງສະພາແຫ່ງຊາດ ກັບບັນດາປະເທດເພື່ອນມິດຍຸດທະສາດ, ລັດຖະສະພາພາກພື້ນ ແລະ ສາກົນ ຍາດແຍ່ງການຊ່ວຍເຫຼືອດ້ານເຕັກນິກ, ວິຊາການ, ທຶນຮອນ ຈາກອົງການຈັດຕັ້ງສາກົນ ແລະ ຄູ່ຮ່ວມພັດທະນາຕ່າງໆ. (ຂ່າວ: ແສງຈັນ)