ສປສສ ປະກາດການແຕ່ງຕັ້ງຫົວໜ້າຄະນະສານອາຍາ ແລະ ຮອງຫົວໜ້າຄະນະສານເດັກ

 ຜ່ານມາ ທີ່ ສປສສ, ພາຍໃຕ້ການເປັນປະທານ ແລະ ມອບມະຕິ ຂອງທ່ານນາງ ວຽງທອງ ສີພັນດອນ ຄະນະເລຂາທິການສູນກາງພັກ ເລຂາຄະນະບໍລິຫານງານພັກ ປະທານສານປະຊາຊົນສູງສຸດ ຊຶ່ງມີຫົວໜ້າກົມຈັດຕັ້ງ - ພະນັກງານ ແລະ ພະນັກງານນຳພາເຂົ້າຮ່ວມ.

ທ່ານ ຂຸນສຸວັນ ສຸທຳມະວົງ ຫົວໜ້າກົມຈັດຕັ້ງ-ພະນັກງານ ໄດ້ຜ່ານມະຕິຂອງຄະນະປະຈຳສະພາແຫ່ງຊາດ ວ່າດ້ວຍການແຕ່ງຕັ້ງ ຫົວໜ້າຄະນະສານອາຍາ ສານປະຊາຊົນສູງສຸດ, ຄະນະປະຈຳສະພາແຫ່ງຊາດຕົກລົງ ແຕ່ງຕັ້ງ ທ່ານ ສົມຈິດ ແກ້ວມະນີໄລ ຜູ້ພິພາກສາ ຊັ້ນສີ່ ຮັກສາການຫົວໜ້າຄະນະສານອາຍາ ສານປະຊາຊົນສູງສຸດ ເປັນຫົວໜ້າຄະນະສານອາຍາ ສານປະຊາຊົນສູງສຸດ ແລະ ຜ່ານຂໍ້ຕົກລົງວ່າດ້ວຍ ການແຕ່ງຕັ້ງ ຮອງຫົວໜ້າຄະນະສານ ສານປະຊາຊົນສູງສຸດ, ປະທານສານປະຊາຊົນສູງສຸດຕົກລົງ ແຕ່ງຕັ້ງ ທ່ານ ວຽງໄຊ ແສງນາລີ ຜູ້ພິພາກສາຊັ້ນສີ່ ຄະນະສານເດັກ ສານປະຊາຊົນສູງສຸດ ເປັນຮອງຫົວໜ້າຄະນະສານເດັກ ສານປະຊາຊົນສູງສຸດ.

ໃນໂອກາດດັ່ງກ່າວ, ທ່ານ ນາງ ວຽງທອງ ສີພັນດອນ ໄດ້ໂອ້ລົມໃຫ້ທິດທາງຕໍ່ຜູ້ທີ່ໄດ້ຮັບໜ້າໃໝ່ອັນສົມກຽດ ໃນຄັ້ງນີ້ວ່າ: ໃຫ້ສືບຕໍ່ ເອົາໃຈໃສ່ນໍາພາການເມືອງແນວຄິດ, ນໍາພາປັບປຸງກົງການຈັດຕັ້ງຂອງຄະນະສານອາຍາ ກໍຄືບັນດາກົມ, ບັນດາຄະນະສານ ແລະ ສະຖາບັນຄົ້ນຄວ້າ ແລະ ຝຶກອົບຮົມ ສານປະຊາຊົນສູງສຸດ ແລະ ພາລະບົດບາດ ທີ່ເຮັດສໍາເລັດ ແລະ ບາງອັນຍັງຄົງຄ້າງ ແລະ ເອົາໃຈໃສ່ກ່ຽວກັບວຽກງານອະໄພຍະໂທດລະດັບຊາດ ແລະ ການຄົ້ນຄວ້າຄໍາຮ້ອງ, ຄໍາຊີ້ຂາດໃນການປະຕິບັດໂທດ ປະຫານຊີວິດ ໃຫ້ເປັນບັນຫາສໍາຄັນ ແລະ ຮີບດ່ວນ, ຕ້ອງໄດ້ເອົາໃຈໃສ່ຊີ້ນໍາ-ນໍາພາອ້າຍນ້ອງພະນັກງານໃຫ້ປະຕິບັດໜ້າທີ່ຢ່າງເຂັ້ມແຂງ, ຮອບດ້ານ ແລະ ພາວະວິໃສ ເພື່ອບໍ່ເປັນການຊັກຊ້າ, ສະມາຊິກພັກພະນັກງານຂອງສານປະຊາຊົນທຸກຄົນ ຕ້ອງຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຈັນຍາບັນ, ຈັນຍາທຳ ມີຄວາມຮູ້ຄວາມສາມາດ ໃຫ້ນັບມື້ນັບສູງ, ສູ້ຊົນເຮັດໃຫ້ໄດ້ຕາມຄໍາຂວັນຂອງສານປະຊາຊົນ: ໂປ່ງໃສ່, ເປັນເອກະລາດ, ເປັນທຳ ແລະ ຮອບຄອບ, ມີວິໄນ, ວິນິດໄສຈະແຈ້ງ, ຕັດສິນເປັນທຳນຳໄປຈັດຕັ້ງປະຕິບັດໄດ້, ເພີ່ມທະວີການນໍາພາ-ຊີ້ນໍາຮອບດ້ານ ປະຕິບັດແບບແຜນວິທີການເຮັດວຽກ ຕາມຫຼັກການລວມສູນປະຊາທິປະໄຕ, ມີການແບ່ງງານ, ຫຼັກການປະຊາທິປະ ໄຕ ສຽງສ່ວນນ້ອຍຂຶ້ນກັບສຽງສ່ວນຫຼາຍ, ຂັ້ນລຸ່ມຂຶ້ນກັບຂັ້ນເທິງ ເພື່ອຮັບປະກັນໃຫ້ການບໍລິການຮັບໃຊ້ປະຊາຊົນຢ່າງທົ່ວເຖິງ, ການຕັດສິນ, ພິພາກສາຄະດີ ມີຄວາມເຂັ້ມງວດ ແລະ ສັກສິດ, ເອົາໃຈໃສ່ປະຕິບັດໜ້າທີ່ ວິຊາສະເພາະ, ວິຊາການໃຫ້ໄດ້ດີ ໂດຍສຸມໃສ່ແກ້ໄຂຄະດີໃຫ້ບັນລຸຄາດໝາຍທີ່ສະພາແຫ່ງຊາດໄດ້ອອກມະຕິຮັບຮອງໃຫ້ສານປະຊາຊົນ ພວກເຮົາ ແກ້ໄຂຄະດີອາຍາ ໃຫ້ໄດ້ 90%, ຄະດີ ແພ່ງ, ການຄ້າ ໃຫ້ໄດ້ 75%, ຄະດີຄອບຄົວ, ແຮງງານ, ເດັກ ແລະ ປົກຄອງ ໃຫ້ໄດ້ 85% ຂຶ້ນໄປ; ຮັບປະກັນອັດຕາການຂໍອຸທອນບໍ່ໃຫ້ເກີນ 15%, ສືບຕໍ່ເອົາໃຈໃສ່ຄົ້ນຄວ້າສັບຊ້ອນ, ຈັດວາງບຸກຄະລາກອນ ໃສ່ແຕ່ລະການຈັດຕັ້ງໃຫ້ມີຄວາມເໝາະສົມກັບຄວາມຮູ້, ຄວາມສາມາດ ແລະ ພອນສະຫວັນຂອງແຕ່ລະບຸກຄົນ, ສືບຕໍ່ເອົາໃຈໃສ່ພົວພັນປະສານສົມທົບກັບບັນດາຂະແໜງການທີ່ກ່ຽວຂ້ອງ ກັບການດໍາເນີນຄະດີຂະບວນຍຸຕິທຳ ແລະ ພາກສ່ວນທີ່ກ່ຽວຂ້ອງອື່ນໆ.

(ຂ່າວ-ພາບ: ຕຸໄລເພັດ)