 |
ທ່ານ ນາງ ອາລີ ວົງໜໍ່ບຸນທໍາ ກ່າວວ່າ: ວັນແມ່ຍິງສາກົນ ກຳເນີດເກີດຂຶ້ນໃນສະພາບເສດຖະກິດ ຂອງສັກດີນາ ແລະ ນາຍທຶນຂະຫຍາຍຕົວ, ແມ່ຍິງຖືກກົດຂີ່ຂູດຮີດຢ່າງໜັກໜ່ວງ ແລະ ເຮັດວຽກຫຼາຍຊົ່ວໂມງ ແຕ່ໄດ້ຮັບຄ່າຈ້າງແຮງງານລາຄາຖືກ, ເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ, ຕໍ່ສະພາບດັ່ງກ່າວ, ກໍາມະກອນແມ່ຍິງ ຈຶ່ງໄດ້ສາມັກຄີກັນລຸກຂຶ້ນຕໍ່ສູ້ໂຮມຊຸມນຸມປະທ້ວງ, ຄັດຄ້ານຕໍ່ການໃຫ້ຄ່າແຮງງານຕໍ່າ, ສະຖານທີ່ເຮັດວຽກບໍ່ຮັບປະກັນຕໍ່ສຸຂະພາບ, ໃນວັນທີ 8 ມີນາ 1908 ແມ່ຍິງໄດ້ເດີນຂະບວນຢູ່ເມືອງນິວຢອກ ທວງໃຫ້ນາຍທຶນຫຼຸດຜ່ອນຊົ່ວໂມງເຮັດວຽກ, ຢຸດເຊົາການຂູດຮີດແຮງງານເດັກ, ທວງໃຫ້ແມ່ຍິງມີສິດອອກສຽງເລືອກຕັ້ງ ແລະ ລົງຮັບສະໝັກເລືອກຕັ້ງ, ການເດີນຂະບວນປະທ້ວງ ພາຍໃຕ້ຄໍາຂວັນ: }ເຂົ້າຈີ່ ແລະ ດອກກຸຫຼາບ~. ເຂົ້າຈີ່ ໝາຍເຖິງ: ເສດຖະກິດດີຂຶ້ນ, ດອກກຸຫຼາບໝາຍເຖິງ: ຄຸນນະພາບຊີວິດທີ່ດີ.
 |
ໃນປີ 1910 ກອງປະຊຸມສາກົນ ກ່ຽວກັບບັນຫາແມ່ຍິງຄັ້ງທຳອິດໄດ້ຈັດຂຶ້ນຢູ່ປະເທດດານມາກ ມີຜູ້ແທນ 100 ກວ່າຄົນ ຈາກ 17 ປະເທດເຂົ້າຮ່ວມ, ກອງປະຊຸມໄດ້ຮັບຮອງເອົາວັນທີ 8 ມີນາຂອງທຸກປີເປັນວັນແມ່ຍິງສາກົນ. ວັນທີ 8 ມີນາ ຈຶ່ງເປັນເຫດການ-ການເມືອງທີ່ສຳຄັນ, ເປັນຂີດໝາຍແຫ່ງໄຊຊະນະພື້ນ ຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາ, ພາຍໃຕ້ຄໍາຂວັນ: }ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ~. ນັບແຕ່ນັ້ນມາວັນທີ 8 ມີນາ ຈຶ່ງໄດ້ຮັບການສະເຫຼີມສະຫຼອງຢູ່ໃນຫຼາຍປະເທດທົ່ວໂລກ.
ຈາກນັ້ນ, ຈຶ່ງເກີດມີອົງການຈັດຕັ້ງສາກົນ ທີ່ເຮັດໜ້າທີ່ປົກປ້ອງສິດ ຜົນປະໂຫຍດອັນຊອບທຳຂອງແມ່ ຍິງ ແລະ ເດັກນ້ອຍເຊັ່ນ: ອົງການສະຫະປະຊາຊາດ; ສະຫະພັນແມ່ຍິງ ປະຊາທິປະໄຕສາກົນ, ອົງການແຮງງານສາກົນ, ອົງການສະຫະປະຊາຊາດ ເພື່ອສົ່ງເສີມຄວາມສະເໝີພາບຍິງ-ຊາຍ ແລະ ສົ່ງເສີມຄວາມກ້າວໜ້າຂອງແມ່ຍິງ, ພັກ ແລະ ລັດຖະບານ ສປປລາວ ໄດ້ກຳນົດແນວທາງນະໂຍບາຍຕໍ່ການພັດທະນາ, ການປົກປ້ອງສິດຜົນປະໂຫຍດຂອງແມ່ຍິງ, ການສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບຍິງ-ຊາຍຢູ່ໃນລັດຖະທຳມະນູນ ແລະ ກົດໝາຍຫຼາຍສະບັບ ແລະ ໄດ້ສ້າງຕັ້ງບັນດາກົນໄກ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ, ການສົ່ງເສີມແມ່ຍິງໃຫ້ມີບົດບາດໃນການນໍາພາແມ່ນສໍາຄັນຫຼາຍ ຕໍ່ການຊຸກຍູ້ຂະບວນການພັດທະນາໃນປະເທດ ກໍຄືທົ່ວໂລກ. ດັ່ງນັ້ນ, ບັນຫາຂອງແມ່ຍິງ ຈຶ່ງຖືກກໍານົດໃນເປົ້າໝາຍສະຫັດສະຫວັດດ້ານການພັດທະນາ ຫຼື SDG ໃນເປົ້າໝາຍທີ 5 ບັນລຸຄວາມສະເໝີພາບລະຫວ່າງຍິງ-ຊາຍ ແລະ ສ້າງຄວາມເຂັ້ມແຂງໃຫ້ແມ່ຍິງ ແລະ ໄວໜຸ່ມຍິງ.
 |
ທ່ານ ນາງ ອາລີ ວົງໜໍ່ບຸນທໍາ ກ່າວອີກວ່າ: ການສະຫຼອງວັນແມ່ຍິງສາກົນ ໄດ້ເນັ້ນໃສ່ການສໍາມະນາໃຫ້ຄວາມຮູ້ ແລະ ແລກປ່ຽນບົດຮຽນໃນວຽກງານການພັດທະນາແມ່ຍິງ ເຊັ່ນ: ສິດທິໃນການເຂົ້າເຖິງການສຶກສາຂອງເດັກຍິງ, ໂພຊະນາການທີ່ດີສໍາລັບແມ່ຍິງ ແລະ ເດັກ, ສົ່ງເສີມເສດຖະກິດເອກະລາດ, ຄວາມໝັ້ນຄົງທາງດ້ານສະບຽງອາຫານ ແລະ ສິ່ງແວດລ້ອມ, ການສົ່ງເສີມແມ່ຍິງໃຫ້ເຂົ້າເຖິງຂະບວນການຍຸຕິທຳ.
ເນື່ອງໃນໂອກາດລະນຶກວັນແມ່ຍິງສາກົນ ຄົບຮອບ 116 ປີ, ຕາງໜ້າຄະນະນຳ ສສຍລ ຂໍສະແດງຄວາມຊົມເຊີຍ, ຂອບໃຈຢ່າງຈິງໃຈມາຍັງບັນດາການນໍາກະຊວງ, ອົງການ, ຜູ້ຊົງຄຸນວຸດທິ, ຄູ່ຮ່ວມພັດທະນາ ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ, ພາກສ່ວນທຸລະກິດ ທີ່ໄດ້ໃຫ້ການສະໜັບສະໜູນດ້ານທຶນຮອນ ແລະ ວິຊາການເຂົ້າໃນການສະເຫຼີມສະຫຼອງວັນແມ່ຍິງສາກົນ 8 ມີນາປີນີ້ ຢ່າງເປັນຂະບວນການຟົດຟື້ນ ເຊື່ອໝັ້ນວ່າບັນດາທ່ານ ຈະສືບຕໍ່ໃຫ້ການຮ່ວມມື ແລະ ສະໜັບສະໜູນຕໍ່ໄປ.
ຂ່າວ-ພາບ: ບຸນຕອມ+ບຸນອູ້ມ
ຄໍາເຫັນ