ທ່ານ ບຸນທາມ ພຸດທະວົງສາ ໄດ້ປະກອບຄຳເຫັນໂດຍສະເໜີໃຫ້ລັດຖະບານມີຈຸດສຸມເລັ່ງແກ້ໄຂບັນຫາປາກທ້ອງຂອງປະຊາຊົນໃນປັດຈຸບັນເຊັ່ນ: ບັນຫາສິນຄ້າລາຄາແພງ, ຄ່າໄຟຟ້າທີ່ກຳລັງເປັນກະແສໃນສັງຄົມປັດຈຸບັນລັດຖະບານຈະແກ້ແນວໃດ; ພ້ອມນັ້ນເຫັນດີຕໍ່ນະໂຍບາຍຂໍຢຸດຕິບໍ່ອະນຸຍາດໃໝ່ໃຫ້ຂຸດຄົ້ນແຮ່ທາດ, ໃຫ້ມີການກວດກາປະເມີນຄືນໝົດບັນດາໂຄງການທີ່ອະນຸຍາດແລ້ວ ທັງອະນຸຍາດເປັນທາງການ ແລະ ບໍ່ເປັນທາງການ ໂດຍເລືອກເຟັ້ນບໍລິສັດໃດທີ່ເຂັ້ມແຂງ ບໍລິສັດໃດເຮັດແລ້ວມີປະສິດທິຜົນ ຂໍສະເໜີໃຫ້ລັດຖະບານລາຍງານເບິ່ງພວກເຮົາໄດ້ລາຍຮັບຈາກການຂາຍຊັບພະຍາກອນທຳມະຊາດ ໂດຍສະເພາະແມ່ນແຮ່ທາດຫຼາຍປານໃດແລ້ວ ໃຫ້ລັດຖະບານລາຍງານເບິ່ງຜົນສະທ້ອນຈາກພື້ນຖານໂຄງລ່າງເພພັງເສຍຫາຍຈາກການຂົນແຮ່ອອກນອກປະເທດຫຼາຍສໍ່າໃດ,ການຂາຍແຮ່ນີ້ມູນຄ່າຫຼາຍປານໃດ ເອົາທັງສອງຢ່າງມາສົມທຽບໃສ່ກັນເບິ່ງໄດ້ກັບເສຍຫຼາຍປານໃດ, ເວົ້າສະເພາະມູນຄ່າການສ້າງທາງຄືນໃໝ່ໄດ້ສໍ່າກັບການຂາຍແຮ່ທາດບໍ່. ດັ່ງນັ້ນ, ຮຽກຮ້ອງໃຫ້ລັດຖະບານເອົາໃຈໃສ່ມາດຕະການໂປ່ງໃສ ປັດຈຸບັນການຂຸດຄົ້ນແຮ່ທາດມີທັງມາດຕະການເອົາໃຈ ແລະ ມາດຕະການໂປ່ງໃສປົນເປກັນ.
ສຳລັບການພິຈາລະນາຮັບຮອງເອົາການຊຸກຍູ້ພັດທະນາເສັ້ນທາງໃນໄລຍະໃໝ່ນີ້ ເພີ່ມເຕີມຈາກກົດໝາຍກຳນົດໂດຍແບ່ງເປັນປະເພດຫຼືຫຼາຍປະເພດ ຖ້າພວກເຮົາອອກນະໂຍບາຍໃໝ່ມັນຈະໄປຮື້ກົດໝາຍຄືນ ຊຶ່ງປະເທດຂອງພວກເຮົາເປັນລັດທີ່ຄຸ້ມຄອງດ້ວຍກົດໝາຍ ແຕ່ພວກເຮົາພັດພະຍາຍາມແປງກົດໝາຍຄືນເພື່ອສ້າງຜົນປະໂຫຍດໃຫ້ຕົນເອງ. ຂ່າວ: ພູວັນ
ຄໍາເຫັນ