 |
ທ່ານ ແດງ ປະທຸມທອງ ກ່າວວ່າ: ປະຊາຊົນລາວມີຄວາມໂຊກດີທີ່ສຸດທີ່ມີປະເທດປະກອບໄປດ້ວຍພູມສັນຖານ ແລະ ທີ່ຕັ້ງ ທີ່ເອື້ອອໍານວຍໃຫ້ແກ່ການຜະລິດພະລັງງານໜູນວຽນ ຊຶ່ງເປັນພະລັງງານທີ່ໄດ້ມາຈາກແຫຼ່ງພະລັງງານທີ່ເກີດຂຶ້ນຕໍ່ເນື່ອງຊໍ້າໆໂດຍສ່ວນຫຼາຍມີແຫຼ່ງກໍາເນີດມາຈາກທໍາມະຊາດເປັນຕົ້ນ ນໍ້າ, ແສງຕາເວັນ, ລົມ, ຄວາມຮ້ອນໃຕ້ດິນ, ຊີວະມວນຊຶ່ງລ້ວນແຕ່ສາມາດນໍາໃຊ້ເປັນປະໂຫຍດຢ່າງບໍ່ຈໍາກັດ.
ທ່ານ ແດງ ປະທຸມທອງ ມີຄໍາເຫັນວ່າ: ສະພາບການພັດທະນາພະລັງງານໄຟຟ້າຂອງພວກເຮົາໃນໄລຍະຜ່ານມານີ້ ທີ່ລັດຖະມົນຕີກະຊວງອຄ ຍົກຂຶ້ນມາຈາກເມື່ອກ່ອນພວກເຮົາມີແຕ່ 4 ແຫຼ່ງ ແລະມີຄອບຄົວທີ່ໄດ້ໃຊ້ໄຟຟ້າພຽງແຕ່ 3%. ປັດຈຸບັນເຫັນວ່າມີພະລັງງານໄຟຟ້າ 100 ກວ່າແຫຼ່ງ ແລະ ກໍາລັງຕິດຕັ້ງ 12 ພັນກວ່າແຫຼ່ງ ກວມ 95%ຂອງຄອບຄົວ. ໃນນັ້ນ, ສົ່ງຂາຍ 7 ພັນກວ່າເມກາວັດ. ຜົນປະໂຫຍດທີ່ເຮົາໄດ້ຈາກການພັດທະນາ ແຕ່ຍັງເຫັນວ່າບົນເສັ້ນທາງທີ່ພວກເຮົາພັດທະນາແຫຼ່ງພະລັງງານໄຟຟ້ານໍ້າຕົກເຫັນວ່າຍັງມີຫຼາຍບັນຫາຄືກັບທ່ານລັດຖະມົນຕີ ກະຊວງ ອຄຍົກຂຶ້ນໂດຍສະເພາະເຂດເລືອກຕັ້ງຂອງພວກຂ້າພະເຈົ້າຜ່ານການລົງກວດກາຕິດຕາມເຫັນວ່າແຂວງນ້ອຍໆມີຮອດ 21 ເຂື່ອນ, ເຂື່ອນໃຫຍ່ມີ 5 ເຂື່ອນ, ແຕ່ເຫັນວ່າຍັງມີຄວາມຫຍຸ້ງຍາກຫຼາຍໂດຍສະເພາະຍັງມີຜົນກະທົບຕໍ່ສິ່ງແວດລ້ອມ, ສັງຄົມ ແລະ ມາຮອດປັດຈຸບັນປະຊາຊົນ ຍັງມີຄວາມຊັບສົນ, ມີສຽງຈົ່ມວ່າ. ພ້ອມນັ້ນ, ຍັງກະທົບຫຼາຍຕໍ່ສິ່ງແວດລ້ອມ, ປ່າໄມ້, ຕໍ່ຊີວະນານາພັນຕ່າງໆ. ນອກນັ້ນ, ບັນດາໂຄງການລົງທຶນຈໍານວນໜຶ່ງແມ່ນຈອງໄວ້ຊື່ໆບໍ່ທັນມີການພັດທະນາ ເປັນຕົ້ນເຂື່ອນນໍ້າທອງ 1, ນໍ້າທອງ2, ນໍ້າເພືອກຕອນລຸ່ມ, ນໍ້າເມີຍ1, ນໍ້າເມີຍ 2ຍັງບໍ່ທັນໄດ້ຈັດຕັ້ງປະຕິບັດ, ບາງໂຄງການເປັນ 10ກວ່າປີ ຍັງລໍຖ້າເຊັນສັນຍາຊື້-ຂາຍໄຟຟ້າເຫັນວ່າເຖິງວ່າຍັງມີເຂື່ອນຫຼາຍກໍຍັງບໍ່ທັນມີໄຟຟ້າໃຊ້ພຽງພໍໃນເທດສະບານ, ຮ້າຍແຮງທີ່ສຸດແຂວງໄຊສົມບູນໄດ້ຮັບສິດທິພິເສດໂດຍດໍາລັດ 414ຂອງນາຍົກໃຫ້ສາມາດຂຸດຄົ້ນ ແລະ ຜະລິດແຮ່ທາດ ຈຶ່ງເປັນຜົນກະທົບຕໍ່ແຂວງຍ້ອນວ່າໄຟຟ້າໃຊ້ບໍ່ພຽງພໍ.
 |
ທ່ານ ແດງ ປະທຸມພອນໃຫ້ຮູ້ຕື່ມວ່າ: ເພື່ອສືບຕໍ່ພະລັງງານໄຟຟ້າໃນຕໍ່ໜ້າ ຂ້າພະເຈົ້າເຫັນເປັນເອກະພາບຕໍ່ການມີຄໍາເຫັນຂອງຄະນະປະຈໍາສະພາແຫ່ງຊາດ. ສະນັ້ນ, ຢາກເອົາສຸພາສິດລາວກັບຄືນມາດັ່ງຄໍາເວົ້າທີ່ວ່າ: ຢາກໄປໜ້າໃຫ້ເບິ່ງຫຼັງໃນການຈະພັດທະນາໃນຕໍ່ໜ້າ, ຢາກອີງໃສ່ມະຕິຂອງກົມການເມືອງສູນກາງພັກທີ່ເວົ້າເຖິງເສດຖະກິດເປັນເອກະລາດເປັນເຈົ້າຕົນເອງຢູ່ໃນໜ້າທີ 3 ຂໍ້ 2ທີ່ວ່ານໍາໃຊ້ຊັບພະຍາກອນທໍາມະຊາດໃຫ້ອອກມາເປັນທຶນຢ່າງມີປະສິດທິພາບ, ປະສິດທິຜົນ. ດັ່ງນັ້ນ, ສະເໜີໃຫ້ຄວນໄດ້ປະເມີນຄືນອັນໃດເຂື່ອນໃດດີຄວນເຮັດອັນໃດ, ບໍ່ເຮັດອັນໃດ; ຕ້ອງໄດ້ກໍານົດແຜນຍຸດທະສາດໃນການພັດທະນາໄຟຟ້າລະອຽດ, ນໍ້າຕົກຈະເຮັດຢູ່ໃສນ້ອຍ-ຫຼາຍສໍ່າໃດ, ພະລັງລົມ, ແສງອາທິດຕ່າງໆຄວນໄດ້ມີແຜນຍຸດທະສາດລະອຽດຄັກແນ່, ມີການຄົ້ນຄວ້າວິທະຍາສາດຄັກແນ່ວ່າມີຜົນກະທົບໜ້ອຍ-ຫຼາຍປານໃດ,ມີຜົນໄດ້, ຜົນເສຍຫຼາຍປານໃດ; ຄວນໄດ້ປັບປຸງນິຕິກໍາທີ່ໄດ້ພົວພັນເຖິງການພັດທະນາພະລັງງານໄຟຟ້າ ໂດຍສະເພາະພົວພັນເຖິງພາສີ-ອາກອນ, ນັບທັງອາກອນກໍາໄລ ແລະ ຕິດພັນກັບການສ້າງບຸກຄະລາກອນໃຫ້ມີຄວາມສາມາດຕາມ 5 ອົງປະກອບມີຄວາມຮູ້, ທັກສະ, ຊໍານານ, ມີວິທະຍາສາດຄະຕິ ແລະ ສາມາດເຮັດໃຫ້ການບໍລິຫານໂປ່ງໃສເປັນມືອາຊີບ ພ້ອມລົງທຶນສ້າງລະບົບສາຍສົ່ງໃຫ້ເປັນລະບົບ, ຫຼີກລ່ຽງບໍ່ໃຫ້ມີຄື: ມີແຫຼ່ງພະລັງງານແຕ່ບໍ່ມີສາຍສົ່ງ. ສະນັ້ນ, ຈຶ່ງຄວນໄດ້ເອົາໃຈໃສ່ ແລະ ໃຫ້ຫຼາຍພາກສ່ວນຈົ່ງມີສ່ວນຮ່ວມໃນການພັດທະນາແຫຼ່ງພະລັງງານໄຟຟ້າ.
(ຂ່າວ: ວັນເພັງ)
ຄໍາເຫັນ