ທ່ານບຸນລ້ອມ ແກ້ວບົວໂຮມ ມີຄໍາເຫັນຢູ່ 4 ປະເດັນສໍາຄັນ ໂດຍສະເພາະການຂຸດຄົ້ນບໍ່ແຮ່ ຜ່ານມາຍັງມີບໍລິສັດມີບັນຫາການຂຸດຄົ້ນທີ່ບໍ່ໄດ້ມາດຖານ, ມີຫຼາຍຄໍາເຫັນຈາກ ສສຊ ຄວນຈະຢຸດຕິການຂຸດຄົ້ນ, ຖ້າເຮົາບໍ່ຂຸດຄົ້ນແທ້ໆ ແຕ່ເສດຖະກິດຂອງພວກເຮົາຍັງມີຄວາມຕ້ອງການທີ່ຕ້ອງພັດທະນາ. ສະນັ້ນ, ສະເໜີໃຫ້ລັດຖະບານປະເມີນ, ກວດກາຄືນບໍລິສັດໃດບໍ່ໄດ້ມາດຖານຄວນຢຸດຕິການຂຸດຄົ້ນ, ຖ້າໃຊ້ຄໍາວ່າໂຈະຈະບໍ່ເໝາະສົມປານໃດ ເພາະວ່າຕາມທີ່ໄດ້ລົງຕິດຕາມກວດກາມີບາງບໍລິສັດໃຫຍ່ມີການລົງທຶນເຫັນວ່າໄດ້ມີມາດຕະການທີ່ຂ້ອນຂ້າງຊັດເຈນກ່ຽວກັບເລື່ອງການຂຸດຄົ້ນ ໂດຍສະເພາະມີຄວາມຮັບຜິດຊອບຕິດຕາມກວດກາກ່ຽວກັບສິ່ງແວດລ້ອມ ແຕ່ມີບາງບໍລິສັດບໍ່ໄດ້ມາດຖານມີການຂຸດຄົ້ນກະທົບຕໍ່ສິ່ງແວດລ້ອມ, ການປ່ອຍນໍ້າເສຍທີ່ສົ່ງຜົນກະທົບຕໍ່ສຸຂະພາບຂອງປະຊາຊົນ ຊຶ່ງເຫັນວ່າໜ້າເປັນຫ່ວງຫຼາຍ; ກ່ຽວກັບການບໍລິການທາງດ້ານສາທາລະນະສຸກໂດຍສະເພາະຄວາມບໍ່ເພິ່ງພໍໃຈຕໍ່ຜູ້ທີ່ໄປໃຊ້ບໍລິການຢູ່ໂຮງໝໍ ທີ່ເປັນສະມາຊິກປະກັນສັງຄົມ, ປະກັນສຸຂະພາບ ຖ້າບໍລິການບໍ່ດີກໍຈະກະທົບເຖິງການຂະຫຍາຍສະມາຊິກ, ກະທົບເຖິງງົບປະມານສໍາລັບຈະເອົາໄປໃຊ້ໃນອະນາຄົດ; ງົບປະມານການປະກັນສຸຂະພາບ ຈະຫັນໂຮງໝໍກຸ້ມຕົນເອງກໍຍັງບໍ່ສາມາດແກ້ໄຂໄດ້ ເພື່ອຈະແກ້ໄຂໄດ້ຈຸດນີ້ຜູ້ປະກັນຕົນ, ຜູ້ທີ່ມີຄວາມສາມາດໃນການຈ່າຍລ່ວງໜ້າເຂົ້າປະກັນສຸຂະພາບ, ຖ້າຈະເຮັດໃຫ້ລະບົບນີ້ມີຄວາມເຂັ້ມແຂງ ມະຕິສະພາແຫ່ງຊາດທີ່ໄດ້ຮັບຮອງແລ້ວນັ້ນ ໃຫ້ຮີບໂຮມເອົາຫ້ອງການປະກັນສຸຂະພາບ, ຫ້ອງການປະກັນສັງຄົມໄປຢູ່ພາຍໃຕ້ອົງການດຽວກັນຖ້າເຮັດໄດ້ຄືແນວນີ້ ເຊື່ອໝັ່ນວ່າການຊື້ປະກັນ, ການໃຫ້ບໍລິການພາຍໃຕ້ການກວດສອບຂອງກະຊວງສາທາລະນະສຸກຈະເຮັດໃຫ້ລະບົບນີ້ມີຄວາມເຂັ້ມແຂງ ແລະ ຍືນຍົງ; ກ່ຽວກັບການພັດທະນາສີມືແຮງງານຜູ້ທີ່ຈະເຂົ້າໂຮງຮຽນອາຊີວະສຶກສາກໍຍັງມີໜ້ອຍພຽງ 20% ຕົວຢ່າງວ່າ: ຕ້ອງການນັກສຶກສາ 500 ຄົນ, ມີຕົວຈິງແຕ່ 100 ກວ່າຄົນ ສະເໜີໃຫ້ລັດຖະບານເອົາໃຈໃສ່ແກ້ໄຂໃຫ້ເໝາະສົມຕາມສະພາບເງື່ອນໄຂເສດຖະກິດ-ສັງຄົມໃນປັດຈຸບັນ.(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ