 |
ຈຸດປະສົງ ເພື່ອພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດ ກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X ແລະ ສະພາປະຊາຊົນ ນວ ຊຸດ ທີ V, ເພື່ອຮັບຟັງຄໍາຄິດຄໍາເຫັນ, ຄໍາສະເໜີ ຜູ້ມີສິດເລືອກຕັ້ງ ໂດຍສະເພາະແມ່ນກໍາລັງ ປ້ອງກັນຄວາມສະຫງົບ ກ່ຽວກັບບັນຫາຂັດຂ້ອງໝອງໃຈຕ່າງໆ ເພື່ອຈະນໍາສະເໜີ ຕໍ່ສະພາປະຊາຊົນ ນວ ແລະ ພາກສ່ວນທີ່ກ່ຽວຂ້ອງ.
ໃນວາລະ ສະຫາຍ ພົນຕີ ສຸລິນະ ແກ້ວປະເສີດ ຮອງເລຂາຄະນະພັກ ຮອງລັດຖະມົນຕີ ຫົວໜ້າກົມໃຫຍ່ການເມືອງ ປກສ ໄດ້ລາຍງານໂດຍຫຍໍ້ ກ່ຽວກັບ ສະພາບການຈັດຕັ້ງ ແລະ ການເຄື່ອນໄຫວວຽກງານ ຂອງ ປກສ ໄລຍະທີ່ຜ່ານມາ ເປັນຕົ້ນ ແມ່ນໄດ້ມີແຜນການສ້າງ ແລະ ປັບປຸງກົດໝາຍ 5 ປີ ຂອງກະຊວງ ທີ່ໄດ້ສະເໜີເຂົ້າໃນແຜນການສ້າງ ແລະ ປັບປຸງກົດໝາຍ (2026-2030) ຂອງສະພາແຫ່ງຊາດ ຊຸດທີ 10 ນີ້ ແມ່ນມີ 3 ຮ່າງກົດໝາຍຄື: ປັບປຸງກົດໝາຍວ່າດ້ວຍກໍາລັງປ້ອງກັນຄວາມສະຫງົບປະຊາຊົນ, ກົດໝາຍວ່າດ້ວຍບັດປະຈໍາຕົວຂອງພົນລະເມືອງ (ຊຶ່ງເປັນກົດໝາຍສ້າງໃໝ່), ປັບປຸງກົດໝາຍ ວ່າດ້ວຍການຕ້ານການຄ້າມະນຸດ; ໃນນັ້ນສະເພາະປີ 2026 ນີ້ ກໍມີຮ່າງກົດໝາຍວ່າດ້ວຍກໍາລັງປ້ອງ ກັນຄວາມສະຫງົບປະຊາຊົນ (ສະບັບປັບປຸງ) ທີ່ຈະໄດ້ນໍາເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ 10 ຂໍໃຫ້ທ່ານສືບຕໍ່ຊີ້ນໍາກະຊວງປ້ອງກັນຄວາມສະຫງົບ ແລະ ຊ່ວຍຊຸກຍູ້ ທາງກຳມາທິການກົດໝາຍ ແລະ ຍຸຕິທຳ, ກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ໃຫ້ສາມາດນໍາເອົາຮ່າງກົດໝາຍທັງ 3 ສະບັບດັ່ງກ່າວຫັນເຂົ້າພິຈາລະນາໃນກອງປະຊຸມຂອງສະພາແຫ່ງຊາດ ແຕ່ລະໄລຍະຕາມແຜນກຳນົດໄວ້, ສະເໜີ ປະທານສະພາແຫ່ງຊາດຊ່ວຍຊີ້ ນໍາໃຫ້ບັນດາສະມາຊິກສະພາແຫ່ງຊາດປະຈຳເຂດເລືອກຕັ້ງໃນທົ່ວປະເທດ ເອົາບັນດາເນື້ອໃນ, ຈິດໃຈຂອງກົດ ໝາຍໃນຂົງເຂດວຽກງານປ້ອງກັນຄວາມສະຫງົບ ເປັນຕົ້ນ ກົດໝາຍວ່າດ້ວຍການເຂົ້າ-ອອກ ແລະ ຄຸ້ມຄອງຄົນຕ່າງປະເທດ ຢູ່ ສປປ ລາວ, ກົດໝາຍວ່າດ້ວຍການຄຸ້ມຄອງອາວຸດ ແລະ ວັດຖຸລະເບີດ, ລົງໂຄສະນາ, ເຜີຍແຜ່ ເພື່ອປູກຈິດສໍານຶກ ໃຫ້ແກ່ພໍ່ແມ່ປະຊາຊົນລາວບັນດາເຜົ່າຕື່ມ; ເພື່ອໃຫ້ເຂົາເຈົ້າຮັບຮູ້, ມີຄວາມເຂົ້າໃຈ ແລະ ປະ ກອບສ່ວນເຮັດວຽກງານປ້ອງກັນຄວາມສະຫງົບຢູ່ ຂັ້ນພື້ນຖານຂອງຕົນເອງໃຫ້ມີຄວາມສະຫງົບ ແລະ ປອດໄພ. ຜ່ານມາທາງກະຊວງປ້ອງກັນຄວາມສະຫງົບ ກໍໄດ້ເຮັດແຕ່ກໍຍັງຈຳກັດຢູ່, ຖ້າເບື້ອງສະພາແຫ່ງຊາດຊ່ວຍຕື່ມຍິ່ງເປັນການດີ, ສະເໜີປະທານສະພາແຫ່ງຊາດຊ່ວຍເຫຼືອ, ຊີ້ນຳສະມາຊິກສະພາແຫ່ງຊາດ ຊຸດທີ 10 ແລະ ສະພາປະຊາຊົນຂັ້ນແຂວງ ຊຸດທີ 5 ປຸກລະດົມ, ຂົນຂວາຍ ພໍ່, ແມ່, ປະຊາຊົນລາວບັນດາເຜົ່າ ຜູ້ທີ່ຍັງບໍ່ທັນໄດ້ເຮັດບັດປະຈຳຕົວພົນລະເມືອງ (ບັດດີຈີຕອນ) ໂດຍປະຕິບັດຕາມແຜນການຄາດວ່າຈະໃຫ້ສໍາເລັດພາຍໃນປີ 2026, ບັນດາຄະດີທີ່ໄປສົ່ງສານຕັດສິນແລ້ວມີຜົນບັງຄັບໃຊ້ແລ້ວ ໃນກໍລະນີຍາດພີ່ນ້ອງຜູ້ຖືກຫາບໍ່ພໍໃຈແລ້ວໄດ້ຂຽນຄໍາຮ້ອງທຸກຂຶ້ນສະພາ ຢາກໃຫ້ທາງສະພາລົງມາສົມທົບກັບພາກສ່ວນທີ່ຮັບຜິດຊອບຄະດີ ເພື່ອກວດກາເບິ່ງຄືນຄວາມໂປ່ງໃສຂອງການດໍາເນີນຄະດີ ຖ້າພາວະວິໄສແລ້ວກໍໃຫ້ພິຈາລະນາແຈ້ງຕອບເລີຍ ບໍ່ຢາກໃຫ້ຄົ້ນຄວ້າກັບໄປກັບມາ ຈະສ້າງຄວາມຫຍຸ້ງຍາກໃນການປະຕິບັດຄໍາຕັດສິນຂອງສານ.
 |
ໂອກາດດັ່ງກ່າວ, ສະຫາຍ ໄຊສົມພອນ ພົມວິຫານ ໄດ້ໂອ້ລົມ ຊີ້ທິດເຍືອງທາງ ຊຶ່ງມີເນື້ອໃນບາງຕອນ ວ່າ: ຈົ່ງເພີ່ມທະວີບົດບາດການນໍາພາຂອງພັກ ເຂົ້າໃນການເຄື່ອນໄຫວວຽກງານ ຂອງກໍາລັງປ້ອງກັນຄວາມສະຫງົບ ເພື່ອເຮັດໃຫ້ການປະຕິບັດໜ້າທີ່ວຽກງານມີປະສິດທິພາບ ແລະ ປະສິດທິຜົນ ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍກໍາລັງປ້ອງກັນຄວາມສະຫງົບ, ນາຍ ແລະ ພົນຕໍາຫຼວດຂອງ ກະຊວງປ້ອງກັນຄວາມສະຫງົບ ເປັນກໍາລັງຫຼັກແຫຼ່ງຂອງຄະນະພັກ, ເປັນຜູ້ຕັດສິນຜົນສໍາເລັດການຈັດຕັ້ງປະຕິບັດໜ້າທີ່ການເມືອງ ຂອງກະຊວງປ້ອງກັນຄວາມສະຫງົບ ຈຶ່ງຕ້ອງໄດ້ຮັບການນໍາພາ, ສຶກສາອົບຮົມບົ່ມເພາະ ຈາກຄະນະພັກ, ຄະນະນໍາຂອງກະຊວງຢ່າງໃກ້ຊິດ, ເຖິງຖອງ; ຝຶກຜົນຫຼໍ່ຫຼອມໃຫ້ເປັນຜູ້ຈົງຮັກພັກດີ, ຮັບໃຊ້ປະຊາຊົນ ປະເທດຊາດ ຢ່າງບໍ່ຮູ້ອິດຮູ້ເມື່ອຍ ດ້ວຍຄວາມບໍລິສຸດຜ່ອງໃສ, ມີຄວາມຮັບຜິດຊອບສູງຕໍ່ໜ້າທີ່ວຽກງານ, ສືບຕໍ່ຝຶກຝົນທາດແທ້ປະຕິວັດ, ຄວາມຈົງຮັກພັກດີຕໍ່ປະເທດຊາດ, ຍອມເສຍສະຫຼະເພື່ອຊາດເພື່ອປະຊາຊົນຂອງນາຍ ແລະ ພົນຕຳຫຼວດໃຫ້ຖືເປັນບັນຫາສຳຄັນໃຈກາງ, ນາຍ ແລະ ພົນຕຳຫຼວດໃນກຳລັງປ້ອງກັນຄວາມສະຫງົບປະຊາຊົນຕ້ອງສືບຕໍ່ຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທໍາປະຕິ ວັດ, ຄວາມຈົງຮັກພັກດີຕໍ່ພັກ, ຕໍ່ຜົນປະໂຫຍດລວມຂອງຊາດ ແລະ ປະຊາຊົນ, ຄວາມມີລະບຽບວິໄນ, ຖືສິ່ງນີ້ທັງເປັນທາດແທ້, ເປັນຊີວິດຈິດໃຈຂອງຕົນ, ທັງເປັນຄຸນລັກສະນະທີ່ຂາດບໍ່ໄດ້ເພື່ອເປັນອາວຸດອັນແຫຼມຄົມຕັດສິນໄຊຊະນະໃນການຕ້ານກຸ່ມຄົນບໍ່ດີທີ່ຫວັງມ້າງເພທຳລາຍ, ກໍ່ຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍ ໃນສັງຄົມເຮົາ, ກໍາລັງປ້ອງກັນຄວາມສະຫງົບ ຕ້ອງເປັນແບບຢ່າງໃນການມີລະບຽບວິໄນ, ຈັນຍາບັນ, ລະບຽບວິໄນຂອງຕຳຫຼວດປະຊາຊົນ ຕ້ອງໄດ້ຮັບການຈັດຕັ້ງປະຕິບັດຢ່າງເຄັ່ງຄັດ, ເດັດຂາດ, ເຖິງເວລາຕ້ອງຍອມເສຍສະຫຼະເພື່ອຊາດ, ເພື່ອປະຊາຊົນ,ກຽມພ້ອມຢູ່ທຸກເວລາ ເພື່ອປະຕິບັດໜ້າທີ່, ກຳລັງປ້ອງກັນຄວາມສະຫງົບປະຊາຊົນເຮົາຕ້ອງສືບຕໍ່ເອົາໃຈໃສ່ຊ່ວຍລັດຖະບານແກ້ໄຂບັນຫາເສດຖະກິດ, ຕ້ອງສ້າງຄວາມເຂັ້ມແຂງທາງດ້ານການສ້າງພະລາທິການກັບທີ່ ເພື່ອຊ່ວຍຫຼຸດຜ່ອນການແບກຫາບຂອງລັດຖະບານໃນບັນຫາຍຸດທະສາດໃຫຍ່ໆດໍາເນີນການປະຢັດ, ການໃຊ້ຈ່າຍຢ່າງມີປະສິດທິຜົນ, ກຳລັງປ້ອງກັນຄວາມສະຫງົບປະຊາຊົນຕ້ອງສືບຕໍ່ໃຫ້ຄວາມສຳຄັນກັບການພົວພັນທີ່ມີມູນເຊື້ອກັບກຳລັງປ້ອງກັນຄວາມສະຫງົບ ຂອງປະເທດເພື່ອນມິດທັງຢູ່ໃກ້ ແລະ ໄກ ໂດຍສະເພາະເພື່ອນມິດຍຸດທະສາດ, ຮູ້ຍາດແຍ່ງ, ຮູ້ຮໍ່າຮຽນ ແລະ ຮູ້ຮັບເອົາການຮ່ວມມືຊ່ວຍເຫຼືອ ຢ່າງມີການເລືອກເຟັ້ນດ້ວຍສະຕິປັນຍາທີ່ແຫຼມຄົມ ແລະ ເອົາໃຈ ໃສ່ວຽກງານອື່ນໆ.
(ຂ່າວ: ແສງຈັນ)
ຄໍາເຫັນ