 |
ສື່ມວນຊົນແມ່ນເຄື່ອງມືສໍາຄັນ ໃນການນໍາເອົາແນວຄິດ, ທິດສະດີປະຕິວັດ, ແນວທາງນະໂຍບາຍຂອງພັກ - ລັດ ໄປສູ່ປະຊາຊົນ ແລະ ເອົາຄວາມຄິດເຫັນ, ຄວາມມຸ່ງມາດປາຖະໜາຂອງປະຊາຊົນ ມາສ່ອງແສງໃຫ້ພັກ - ລັດ ໄດ້ຮັບຊາບເພື່ອນຳໄປພິຈາລະນາ ກຳນົດປັບປຸງໃຫ້ສົມບູນຂຶ້ນຕື່ມ ທາງດ້ານແນວທາງ ກໍຄືແຜນພັດທະນາເສດຖະກິດ-ສັງຄົມຂອງຊາດ ເພື່ອຜົນປະໂຫຍດຂອງຊາດ-ຂອງປະຊາຊົນເຮົາ; ສື່ມວນຊົນ ຍັງເປັນຜູ້ຢັ້ງຢືນທັດສະນະທີ່ຖືກຕ້ອງ, ຕໍ່ສູ້ທັດສະນະທີ່ຜິດເຂວ, ຕີຖອຍຖ້ອຍທຳນອງບິດເບືອນ, ການອອກຂ່າວດ້ານດຽວ, ລວງດຽວຂອງຄົນບໍ່ດີນັບມື້ວ່ອງໄວ, ທັນການ ແລະ ຈະແຈ້ງຂຶ້ນ. ຖັນແຖວພະນັກງານທີ່ເຮັດວຽກສື່ມວນຊົນ ໄດ້ມີຄວາມເສຍສະຫຼະສູງ ໃນແຕ່ລະໄລຍະປະຫວັດສາດ, ຖັນແຖວນັກຂ່າວໄດ້ເຕີບໃຫຍ່, ເຂັ້ມແຂງ ແລະ ມີຄຸນນະພາບ, ມີທັດສະນະການເມືອງຈະແຈ້ງ, ມີຄວາມສະດຸ້ງໄວຕໍ່ສະພາບການ, ມີຄວາມຊໍານານງານໃນດ້ານວິຊາການເພີ່ມຂຶ້ນ, ການນໍາໃຊ້ຄວາມກ້າວໜ້າທາງດ້ານວິທະຍາສາດເຕັກໂນໂລຊີ ໃນການເກັບກຳຂ່າວ, ຂຽນຂ່າວ, ໂຄສະນາຂົນຂວາຍ ໃນບັ້ນສໍາຄັນຂອງພັກ, ຂອງຊາດ ກໍມີຫຼາຍຮູບຫຼາຍສີ, ຫຼາຍເນື້ອໃນ, ຫຼາຍວີທີການທີ່ອຸດົມສົມບູນ ແລະ ສ້າງໄດ້ຄວາມເຊື່ອໝັ້ນຈາກພັກ-ລັດ ແລະ ປະຊາຊົນ ເຮັດໃຫ້ມີຈິດໃຈຮັກຊາດຂອງຄົນລາວ ຕໍ່ຊາດລາວ, ຄວາມເອກອ້າງທະນົງໃຈໃນຄວາມເປັນເອກະລາດ, ອໍານາດອະທິປະໄຕ ຂອງປະຊາຊົນລາວບັນດາເຜົ່າ ນັບມື້ໄດ້ຮັບການເຊີດຊູສູງຂຶ້ນ.ຄວາມສາມັກຄີເປັນຈິດໜຶ່ງໃຈດຽວພາຍໃນຊາດ ໄດ້ເພີ່ມທະວີຂຶ້ນສູ່ລະດັບໃໝ່ຢ່າງແຂງແຮງ; ເອກະລັກຂອງຊາດ ແລະ ວັດທະນະທໍາອັນດີງາມ ໄດ້ຮັບການອະນຸລັກຮັກສາ ແລະ ພັດທະນາສອດຄ່ອງກັບຍຸກສະໄໝປັດຈຸບັນ.
ໃນຍຸກການປະຕິວັດອຸດສາຫະກຳ 4.0, ການຂະຫຍາຍຕົວຢ່າງກ້າວກະໂດດຂອງອິນເຕີເນັດຄວາມໄວສູງ ແລະ ເຄືອຂ່າຍສັງຄົມອອນລາຍ ໄດ້ເຮັດໃຫ້ສະພາບການສື່ສານປ່ຽນແປງໄປຢ່າງສິ້ນເຊີງ. ສື່ມວນຊົນລາວກໍາລັງປະເຊີນກັບສິ່ງທ້າທາຍເປັນຕົ້ນແມ່ນຂໍ້ຈຳກັດດ້ານເຕັກໂນໂລຊີ ແລະ ທຶນຮອນ, ສື່ລັດຈໍານວນໜຶ່ງຍັງກ້າວບໍ່ທັນວິວັດທະນາການໃໝ່, ຂາດງົບປະມານໃນການຫັນເປັນດີຈີຕອນ ເຮັດໃຫ້ການສະໜອງຂໍ້ມູນຊັກຊ້າ ແລະ ເກີດຊ່ອງວ່າງຂ່າວສານ, ໄພຂົ່ມຂູ່ທາງໄຊເບີ: ການແຜ່ລະບາດຂອງຂ່າວປອມ (Fake News), ການບິດເບືອນຂໍ້ມູນ, ການນຳໃຊ້ປັນຍາປະດິດ (AI) ເພື່ອປອມແປງພາບ-ສຽງ, ລວມທັງສົງຄາມຈິດຕະສາດ ທີ່ແນໃສ່ໂຈມຕີ ແລະ ທຳລາຍຄວາມເຊື່ອໝັ້ນຕໍ່ການນຳພາຂອງພັກ-ລັດ. ຫັນປ່ຽນຈິນຕະນາການໃໝ່ ຕາມທິດຊີ້ນຳຂອງພັກ ກົນໄກການຄຸ້ມຄອງແບບດັ້ງເດີມ ແມ່ນບໍ່ສາມາດຕອບສະໜອງໄດ້, ສິ່ງເຫຼົ່ານີ້ຮຽກຮ້ອງໃຫ້ພວກເຮົາຕ້ອງມີ "ຈິນຕະນາການໃໝ່" ໃນການກຳນົດວາລະຂ່າວສານ ແລະ ການຊີ້ນຳ-ຄຸ້ມຄອງສື່ ໃຫ້ທັນກັບສະພາບການ.
ມະຕິກອງປະຊຸມໃຫຍ່ ຄັ້ງທີ XII ຂອງພັກ ໄດ້ເນັ້ນໜັກວ່າ:“ເພີ່ມທະວີການພັດທະນາວຽກງານຖະແຫຼງຂ່າວ-ສື່ມວນຊົນ ໃຫ້ເຂັ້ມແຂງ, ທັນສະໄໝ, ວ່ອງໄວ, ທັນການ, ກາຍເປັນກະບອກສຽງທີ່ແຫຼມຄົມຂອງພັກຕິດພັນກັບການຍົກລະດັບວຽກງານໂຄສະນາປະຊາສຳພັນ ດ້ວຍຫຼາຍຮູບຫຼາຍສີ, ດຶງດູດຈິດໃຈ ແລະ ອຸດົມສົມບູນກວ່າເກົ່າ, ສົ່ງເສີມວຽກຈິງຄົນແທ້, ຕົວແບບການພັດທະນາ ແລະ ນະວັດຕະກຳ ໃຫ້ສັງຄົມຮັບຊາບ ແລະ ຮຽນຮູ້ຢ່າງກວ້າງຂວາງ”. ພັດທະນາລະບົບເຕັກໂນໂລຊີແບບໃໝ່, ຫັນເປັນທັນສະໄໝ ແລະ ຍົກລະດັບບຸກຄະລາກອນສື່ໃຫ້ມີຄຸນນະພາບສູງຂຶ້ນ,ສາມາດວິເຄາະ-ວິໄຈ, ຕອບໂຕ້ ແລະ ວິຈານບັນຫາຕ່າງໆ ໃຫ້ສັງຄົມໄດ້ຮັບຮູ້ ເພື່ອເຮັດໃຫ້ການປະຕິບັດໜ້າທີ່ຂອງຕົນດີກວ່າເກົ່າ, ນັກສື່ມວນຊົນທຸກຄົນຕ້ອງກຳໃຫ້ໄດ້ທຸກມະຕິ, ຄຳສັ່ງ ແລະ ບັນດາແຈ້ງການຂອງພັກ-ລັດຖະບານ ໃນແຕ່ລະໄລຍະ ເພື່ອໄປສ່ອງແສງຫຼື ຜັນຂະຫຍາຍຕໍ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ, ຕ້ອງສະແດງສັດຈະທຳໃນຄວາມເປັນຈິງ, ບໍ່ໃສ່ຮ້າຍປ້າຍສີ, ບໍ່ບິດເບືອນ,ບໍ່ສ້າງຄວາມແຕກແຍກຢູ່ໃນສັງຄົມ,ຕ້ອງເຮັດໃຫ້ສັງຄົມມີຄວາມສາມັກຄີຮັກແພງຊ່ວຍເຫຼືອຊຶ່ງກັນ ແລະ ກັນ, ສ້າງຄວາມເຂົ້າໃຈລະຫວ່າງພັກ-ລັດ ກັບປະຊາຊົນ ແລະ ປະຊາຊົນກັບປະຊາຊົນໃຫ້ນັບມື້ດີຂຶ້ນກວ່າເກົ່າ.ປຸກລະດົມປະຊາຊົນທຸກຊັ້ນຄົນ ເຂົ້າຮ່ວມຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະແຜນພັດທະນາເສດຖະກິດ-ສັງຄົມ, ສ່ອງແສງທຸກການເຄື່ອນໄຫວຂອງສັງຄົມ, ເປັນແຮງຂັບເຄື່ອນການພັດທະນາເສດຖະກິດ-ສັງຄົມລວມທັງວຽກງານຮັກສາຄວາມປອດໄພໃນການດໍາລົງຊີວິດຂອງປະຊາຊົນໃນສັງຄົມ, ເປັນຜູ້ຊີ້ແຈງ ແລະ ສ້າງຄວາມເຂົ້າໃຈໃນບັນຫາຕ່າງໆທີ່ເກີດຂຶ້ນຢ່າງຖືກຕ້ອງ, ເປັນເວທີລະຫວ່າງອົງການບໍລິຫານ, ອົງການປົກຄອງກັບປະຊາຊົນ, ພ້ອມທັງຊຸກຍູ້ສ້າງຄວາມສາມັກຄີເປັນປຶກແຜ່ນ, ຮັກຊາດ, ຮັກບ້ານເກີດເມືອງນອນ, ພ້ອມກັນສ້າງສາພັດທະນາຢ່າງບໍ່ຢຸດຢັ້ງ.
ທ່ານ ສີວັນ ຫອມໄຊຍະເດດ ໃຫ້ຮູ້ຕື່ມວ່າ: ສື່ມວນຊົນ ຍັງມີບົດບາດສໍາຄັນໃນການສຶກສາອົບຮົມການເມືອງ- ແນວຄິດ, ສ້າງທັດສະນະຫຼັກໝັ້ນ ແລະ ຄວາມເຊື່ອໝັ້ນຕໍ່ອຸດົມຄະຕິ ແລະ ການນຳພາຂອງພັກ ໃນການຊຸກຍູ້,ປຸກລະດົມທົ່ວປວງຊົນເຮັດໜ້າທີ່ປ້ອງກັນຊາດ-ປ້ອງກັນຄວາມສະຫງົບ, ຕອບໂຕ້ຖ້ອຍທໍານອງຂອງພວກຄົນບໍ່ດີ ທີ່ຫວັງມ້າງເພທໍາລາຍລະບອບໃໝ່ຂອງພວກເຮົາ ທັງຢູ່ພາຍໃນ ແລະ ພາຍນອກ, ເສີມສ້າງຄວາມສາມັກຄີປອງດອງທົ່ວປວງຊົນທັງຊາດ, ໂຄສະນາດຶງດູດເອົາການຮ່ວມມື, ການຊ່ວຍເຫຼືອ ແລະການລົງທຶນຈາກຕ່າງປະເທດ.ໃນຍຸກປັດຈຸບັນ, ຍຸກ AI ຄວາມຮຽກຮ້ອງຕ້ອງການຂອງສັງຄົມໃນການຮັບຮູ້ຂໍ້ມູນຂ່າວສານນັບມື້ສູງ. ສະນັ້ນ, ສື່ພວກເຮົາ ຕ້ອງເອົາໃຈໃສ່ເຮັດໜ້າທີ່ການເມືອງ ຊຶ່ງເປັນກະບອກສຽງໃຫ້ແກ່ພັກ - ລັດ ກໍຄືປະຊາຊົນ ເພື່ອໂຄສະນາເຜີຍແຜ່ແນວທາງນະໂຍບາຍຂອງພັກ, ແຜນພັດທະນາເສດຖະກິດ - ສັງຄົມ, ລະບຽບກົດໝາຍທີ່ລັດວາງອອກ ໃຫ້ກວ້າງຂວາງ ແລະ ເລິກເຊິ່ງກວ່າເກົ່າ. ພ້ອມນີ້, ການໂຄສະນາເຜີຍແຜ່ຂໍ້ມູນຂ່າວສານ ສື່ພວກເຮົາຕ້ອງກຳແໜ້ນຫຼັກການ ເພື່ອວິເຄາະ ວິໃຈໃຫ້ຖືກຕ້ອງ ຊັດເຈນ ຕິດແທດຕົວຈິງຕາມ 4 ລັກສະນະຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້.ການເຮັດວຽກສື່ມວນຊົນ, ສິ່ງສໍາຄັນແມ່ນຕ້ອງກຳແໜ້ນ ແລະ ເຂົ້າໃຈແຈ້ງບັນດາມະຕິ, ຄຳສັ່ງຕ່າງໆຂອງພັກ, ລັດ ເພື່ອຊີ້ແຈງ, ແນະນໍາ ໃຫ້ສັງຄົມຮັບຮູ້-ເຂົ້າໃຈ ແລະ ຈັດຕັ້ງປະຕິບັດ ຢ່າງມີປະສິດທິພາບ, ປະສິດທິຜົນສູງ ໃນການສ້າງສາພັດທະນາເສດຖະກິດ ແລະ ຍົກສູງຊີວິດການເປັນຢູ່ຂອງປະຊາຊົນລາວບັນດາເຜົ່ານັບມື້ດີຂຶ້ນ ສືບຕໍ່ປົກປັກຮັກສາ ແລະ ພັດທະນາປະເທດຊາດ ໃຫ້ນັບມື້ຈະເລີນກ້າວໜ້າຢ່າງບໍ່ຢຸດຢັ້ງ.
ຄໍາເຫັນ