ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ສຳພາດຕໍ່ສື່ມວນຊົນວ່າ: ປັດຈຸບັນສື່ມວນຊົນຍັງມີສິ່ງທ້າທາຍຫຼາຍຢ່າງໃນຍຸກດີຈີຕອນ ໂດຍສະເພາະການນໍາໃຊ້ເຕັກໂນໂລຊີໃໝ່ໆຢູ່ໃນສື່ມວນຊົນຈະຕ້ອງຮູ້ຈັກກຸ່ມເປົ້າໝາຍ ຊຶ່ງກຸ່ມເປົ້າໝາຍແຕ່ລະສື່ແມ່ນກຸ່ມເປົ້າໝາຍຫຍັງ,ຖ້າເຮົາບໍ່ຮູ້ກຸ່ມເປົ້າໝາຍຊັດເຈນ ເມື່ອເຮົາໂຄສະນາໄປນັ້ນຈະບໍ່ໄດ້ຮັບໝາກຜົນ. ໃນນັ້ນ, ການພັດທະນາບຸກຄະລາກອນຕ້ອງໃຫ້ຕອບສະໜອງກັບຍຸກໃໝ່ນີ້ (ຍຸກດີຈີຕອນ) ເປັນສິ່ງສໍາຄັນຫຼາຍ ເນື່ອງຈາກສື່ສັງຄົມອອນລາຍເປັນພາຫະນະໜຶ່ງສຳລັບສື່ມວນຊົນຢູ່ໃນການກະຈາຍຂໍ້ມູນຂ່າວສານໄດ້ຢ່າງວ່ອງໄວ, ມີປະສິດທິພາບ ແລະ ຄ່າໃຊ້ຈ່າຍຕໍ່າ ຖ້າທຽບໃສ່ການນໍາໃຊ້ສື່ແບບເກົ່າ.
ທ່ານສົມສະຫວາດ ພົງສາ ຍັງໃຫ້ຮູ້ວ່າ: ຂ່າວປອມເປັນບັນຫາໃນທົ່ວໂລກກໍຄືໃນປັດຈຸບັນ. ສະນັ້ນ, ສື່ມວນຊົນຈະຕ້ອງນໍາສະເໜີຂໍ້ມູນທີ່ມີມູນຄວາມເປັນຈິງ, ຂ່າວປອມເປັນຂ່າວທີມີບົດບາດສຳຄັນເຮັດໃຫ້ສັງຄົມເກີດຄວາມລະແວງສົງໄສ, ບໍ່ມີຄວາມສະຫງົບ, ບໍ່ໄປຕາມທິດທາງແນວທາງນະໂຍບາຍທີ່ທາງລັດຖະບານວາງອອກ, ຂ່າວປອມຄືຂ່າວທີ່ເຮັດໃຫ້ບິດເບືອນຄວາມເປັນຈິງສ້າງຄວາມບໍ່ສະຫງົບໃນສັງຄົມ. ດັ່ງນັ້ນ, ສື່ມວນຊົນມີຄວາມສຳຄັນຫຼາຍໃນການຕ້ານກັບຂ່າວປອມເຊັ່ນວ່າ: ສື່ມວນຊົນຈະຕ້ອງນໍາສະເໜີຂໍ້ມູນທີ່ມີຄວາມຈິງ, ຈະຕ້ອງໄດ້ອະທິບາຍໃຫ້ສັງຄົມເຂົ້າໃຈວ່າຂ່າວທີ່ໄດ້ເຜີຍແຜ່ໄປນັ້ນແມ່ນຂ່າວທີ່ບໍ່ມີຄວາມຈິງ. ສະນັ້ນ, ໃນອະນາຄົດຈະຕ້ອງໄດ້ຮ່ວມກັບສື່ມວນຊົນໃນການເຜີຍແຜ່ຂໍ້ມູນຂ່າວສານໂດຍສະເພາະສ້າງຈັນຍາບັນຢູ່ໃນການຊົມໃຊ້ສື່ສັງຄົມອອນລາຍເຮັດແນວໃດບໍ່ໃຫ້ປະຊາຊົນຕົກເປັນເຄື່ອງມືຂອງຜູ້ບໍ່ຫວັງດີໂດຍການກະຈາຍຂ່າວປອມ. ພ້ອມນັ້ນ, ປະຊົນຍັງມີສ່ວນຮ່ວມສຳຄັນເນື່ອງຈາກເຂົາເຈົ້າໄດ້ຮັບຂໍ້ມູນຂ່າວສານແລ້ວສາມາດແຊຕໍ່ໄດ້ຢ່າງວ່ອງໄວໂດຍບໍ່ໄດ້ຄໍານຶງເຖິງວ່າເປັນຂ່າວແທ້ ຫຼື ຂ່າວປອມ, ຂ່າວປອມສ້າງຂຶ້ນບໍ່ແມ່ນເພື່ອຜົນປະໂຫຍດສ່ວນລວມແຕ່ສ້າງຂຶ້ນເພື່ອຜົນປະໂຫຍດຜູ້ໃດຜູ້ໜຶ່ງ.
ເຖິງແມ່ນວ່າໃນປັດຈຸບັນເຂົ້າສູ່ຍຸກດີຈີຕອນ ເປັນສິ່ງທ້າທາຍຕໍ່ສື່ມວນຊົນ. ສະນັ້ນ, ຂໍໃຫ້ຜູ້ບໍລິໂພກຂ່າວສານ ຈົ່ງມີສະຕິຮູ້ຈັກຈຳແນກຂ່າວແທ້ ຫຼືຂ່າວປອມ ເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ຫວັງດີ, ສ້າງຄວາມບໍ່ສະຫງົບໃນສັງຄົມ.
ຄໍາເຫັນ