ສື່ມວນຊົນຕ້ອງເຄົາລົບ ແລະ ປະຕິບັດຢ່າງເຂັ້ມງວດໃນການປະຕິບັດໜ້າທີ່

ສະຫາຍ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້ງຊາດ,ປະທານສະພາທິດສະດີສູນກາງພັກ ໄດ້ກ່າວໃນກອງປະຊຸມສຳມະນາເຊື່ອມຊຶມເອກະສານກະກຽມໃຫ້ການດຳເນີນກອງປະຊຸມວຽກງານສື່ມວນຊົນທົ່ວປະເທດຄັ້ງທີ I ໃນວັນທີ 13 ກໍລະກົດນີ້, ທີ່ຫໍປະຊຸມແຫ່ງຊາດ ໂດຍເນັ້ນວ່າ:ໃນຍຸກສະໄໝປັດຈຸບັນການຂະຫຍາຍຕົວຂອງວິທະຍາສາດເຕັກໂນໂລຊີ ມີຄວາມກ້າວໜ້າກະໂດດ, ການຫັນເປັນດີຈີຕອນແມ່ນຄວາມຮຽກຮ້ອງຕ້ອງການ ທັງເປັນບັນຫາເລັ່ງທວງໃນການພັດທະນາປະເທດຊາດ ເພື່ອຕອບສະ ໜອງກັບລະດັບຄາດໝາຍນັບມື້ສູງຂຶ້ນ. ສະນັ້ນ, ການຍົກສູງຈັນຍາບັນສື່ມວນຊົນຕ້ອງຍຶດໝັ້ນຈັນຍາບັນຕາມ 5 ຫຼັກການ ຄື: 1. ຄວາມຖືກຕ້ອງ ແລະ ສັດຈະທຳ: ຕ້ອງນຳສະເໜີຄວາມຈິງ ທີ່ມີການກວດສອບແຫຼ່ງຂ່າວຢ່າງຄັກແນ່, ບໍ່ບິດເບືອນ, ບໍ່ສ້າງຂ່າວປອມ ແລະ ຫາກມີຄວາມຜິດພາດຕ້ອງຮີບຮ້ອນແກ້ໄຂທັນທີ, 2. ຄວາມເປັນ ກາງ ແລະ ເປັນທຳ: ຕ້ອງນຳສະເໜີຂໍ້ມູນໃຫ້ຮອບດ້ານ, ໃຫ້ໂອກາດທຸກຝ່າຍໄດ້ຊີ້ແຈງຄວາມຈິງ, ບໍ່ເລືອກຂ້າງ ແລະ ໃຫ້ຄວາມຄິດເຫັນສ່ວຕົວລົງໄປໃນເນື້ອຫາຂ່າວ, 3. ເອກະລາດ ແລະ ສັກສີວິຊາຊີບ: ຕ້ອງມີອິດສະຫຼະ ພາບໃນການເຮັດວຽກ, ບໍ່ຕົກຢູ່ພາຍໃຕ້ອິດທິພົນຂອງກຸ່ມທຶນ ຫຼື ຜົນປະໂຫຍດໃດໆ, ບໍ່ຮັບສິນບົນເພື່ອຜົນປະ ໂຫຍດໃຫ້ບຸກຄົນອື່ນ, 4. ຄວາມຮັບຜິດຊອບຕໍ່ສັງຄົມ: ຕ້ອງຄຳນຶງເຖິງຜົນກະທົບຕໍ່ຄວາມໝັ້ນຄົງ, ວັດທະນະທຳ ແລະ ຮີດຄອງປະເພນີ, ຫຼີກເວັ້ນການນຳສະເໜີພາບ ຫຼື ເນື້ອຫາທີ່ຮຸນແຮງ, ອານາຈານ ຫຼື ກະຕຸ້ນໃຫ້ເກີດຄວາມຂັດແຍ່ງ, 5. ການເຄົາລົບສິດສ່ວນບຸກຄົນ: ບໍ່ລະເມີດສິດທິສ່ວນຕົວຂອງບຸກຄົນອື່ນ ໂດຍບໍ່ມີເຫດຜົນດ້ານປະ ໂຫຍດສາທາລະນະ ໂດຍສະເພາະແມ່ນການປົກປ້ອງເດັກນ້ອຍ, ເຍົາວະຊົນ, ຜູ້ເຈັບປ່ວຍ ແລະ ຜູ້ເປັນເຫຍື່ອໃນຄະດີຕ່າງໆ.

ໃນຂະນະດຽວກັນ, ຖັັນແຖວສື່ມວນຊົນຕ້ອງໄດ້ຍຶດໝັ້ນໃນຈັນຍາບັນຂອງພະນັກງານ-ລັດຖະກອນ, ເນື່ອງຈາກວ່ານັກຂ່າວ, ຜູ້ບັນນາທິການ, ຜູ້ຜະລິດລາຍການ ແລະ ອື່ນໆ ລ້ວນແຕ່ເປັນພະນັກງາຂອງລັດ, ຕ້ອງປະພຶດຕົນເອງໃຫ້ສອດຄ່ອງກັບຈັນຍາບັນເພື່ອຮັກສາຊື່ສຽງ, ກຽດສັກສີຂອງຕົນ, ມີຄວາມຮັບຜິດຊອບຕໍ່ການປະຕິບັດໜ້າທີ່ ທີ່ການຈັດຕັ້ງມອບໝາຍໃຫ້, ນຳໃຊ້ວິຊາຊີບ ແລະ ໃຫ້ການບໍລິການປະຊາຊົນດ້ວຍຄວາມບໍລິສຸດສັດຊື່ ແລະ ຈິງໃຈ ແລະ ເອົາໃຈໃສ່ຍົກສູງຈັນຍາບັນໃນຖານະເປັນພະນັກງານ-ລັດຖະກອນ ດັ່ງນີ້: 1. ຈັນຍາບັນຕໍ່ຕົນເອງ:ຕ້ອງມີຈັນຍາບັນຕໍ່ຕົນເອງ ດ້ວຍການຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານ-ລັດຖະກອນທີ່ດີ, ມີຄຸນທາດການເມືອງໜັກແໜ້ນ ແລະ ມີຄຸນສົມບັດສິນທຳປະຕິວັດ, 2. ຈັັນຍາບັນຕໍ່ວິຊາຊີບ: ຕ້ອງເຄື່ອນໄຫວວິຊາຊີບດ້ວຍຄວາມສັດຊື່ ແລະ ບໍ່ສະແຫວງຫາຜົນປະຫຫຍດໃນທາງທີ່ບໍ່ຖືກຕ້ອງ ແລະ ຕ້ອງປະຕິບັດຈັນຍາບັນຂອງຕົນຢ່າງເຂັ້ມງວດ, 3. ຈັນຍາບັນຕໍ່ການຈັດຕັ້ງ: ຕ້ອງເລົາລົບ ແລະ ມີສະຕິຕໍ່ການຈັດຕັ້ງ, ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ໄດ້ຮັບການມອບໝາຍ, ຮັກສາຄວາມລັບ ແລະ ປະຕິບັດລະບຽບວິໃນຂອງການຈັດຕັ້ງຢ່າງເຂັ້ມງວດ,ຈັນຢາບັນຕໍ່ປະຊາຊົນ ແລະ ສັງຄົມ:ຕ້ອງບໍລິການຮັບໃຊ້ປະຊາຊົນ ແລະ ສັງຄົມດ້ວຍຄວາມຈິງໃຈ,ສະເໝີພາບ,ໂປ່ງໃສ, ມີກິລິຍາມາລະຍາດດີ, ຖະໝອມຖ່ອມຕົວ, ບໍ່ຮຽກຮ້ອງສິ່ງຕອບແທນ ແລະ ບໍ່ສ້າງຄວາມຫຍຸ້ງຍາກໃຫ້ປະຊາຊົນ ແລະ ສັງຄົມໃນເວລາປະຕິບັດໜ້າທີ່ວຽກງານ. (ຂ່າວ-ພາບ: ສຳນານ)