ສືບຕໍ່ປູກຈິດສໍານຶກໃຫ້ທຸກຄົນມີສ່ວນຮ່ວມໃນການປົກປັກຮັກສາສິ່ງແວດລ້ອມ ໃນງານບຸນທາດຫຼວງ

ພາຍຫຼັງທີ່ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ໄດ້ເປີດບູດໂຄສະນາປູກຈິດສຳນຶກ ໃຫ້ທຸກຄົນໃນທົ່ວສັງຄົມ ມີສ່ວນຮ່ວມໃນການຮັກສາສິ່ງແວດລ້ອມ ໃນງານບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີທ່າວັດຈັນ ປະຈຳປີ 2023 ທີ່ຫາກໍຜ່ານໄປນີ້ ເຫັນວ່າມວນຊົນໄດ້ໃຫ້ຄວາມສົນໃຈ ຕໍ່ກກັບບັນຫາສິ່ງແວດລ້ອມຫຼາຍຂຶ້ນ.  ສໍາລັບໃນງານບຸນນະມັດສະການພະທາດຫຼວງວຽງຈັນ ປະຈໍາປີ 2023ຊຶ່ງປີນີ້ຖືເປັນປີພິເສດທີ່ໄດ້ມີການເປີດປີທ່ອງທ່ຽວລາວ 2024 ຮ່ວມນໍາ ຊຶ່ງເຮັດໃຫ້ງານບຸນປະເພນີຄັ້ງນີ້ ມີຄວາມໝາຍ-ຄວາມສໍາຄັນຍິ່ງຂຶ້ນ ໃນການເຜີຍແຜ່ວັດທະນະທໍາປະເພນີອັນດີງາມຂອງຊາດລາວ ຄຽງຄູ່ກັບວັດທະນະທໍາແລ້ວ ການອະນຸລັກຮັກສາສິ່ງແວດລ້ອມກໍເປັນອີກໜຶ່ງປັດໄຈສໍາຄັນ ຂອງການສົ່ງເສີມປີທ່ອງທ່ຽວລາວເຊັ່ນດຽວກັນ. ດັ່ງນັ້ນ, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມນະຄອນຫຼວງວຽງຈັນ ຮ່ວມກັບ ຄະນະສິ່ງແວດລ້ອມ ມະຫາວິທະຍາໄລແຫ່ງຊາດ ແລະ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຈຶ່ງໄດ້ຖືໂອກາດນີ້ເປີດບູດໂຄສະນາປູກຈິດສຳນຶກ ໃຫ້ທຸກຄົນໃນທົ່ວສັງຄົມ ມີສ່ວນຮ່ວມໃນການຮັກສາສິ່ງແວດລ້ອມ ຂຶ້ນທີ່ງານບຸນນະມັດສະການພະທາດຫຼວງວຽງຈັນ, ໂດຍການນໍາພາຂອງ ທ່ານ ຜາວັນ ສີຫາວົງ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ມີຄະນະພັກຮາກຖານ, ຄະນະພະແນກ, ຫົວໜ້າຂະແໜງ ຮອງຫົວໜ້າຂະແໜງ ພ້ອມດ້ວຍພະນັກງານ ເຂົ້າຮ່ວມ.
ສໍາລັບການຈັດກິດຈະກຳໃນຄັ້ງນີ້ ກໍເພື່ອເປັນການເຜີຍແຜ່ປູກຈິດສຳນຶກ ໃຫ້ແມ່ຄ້າຊາວຂາຍ ແລະ ຜູ້ມາທ່ຽວ ພາຍໃນບຸນນະມັດສະການພະທາດຫຼວງວຽງຈັນ ໄດ້ຮັບຮູ້-ເຂົ້າໃຈ ແລະ ມີສ່ວນຮ່ວມ ໃນການປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍສະເພາະປຸກລະດົມໃຫ້ທຸກຄົນທີ່ມາທ່ຽວໃນງານບຸນ ໃຫ້ມີສ່ວນຮ່ວມເປັນເຈົ້າການໃນການປົກປັກຮັກສາສິ່ງແວດລ້ອມ, ນໍ້າ, ດິນ ແລະ ຮັກສາຄວາມສະອາດພາຍໃນງານບຸນ ເພື່ອເຮັດໃຫ້ພາຍໃນງານມີຄວາມສະອາດງາມຕາຊຶ່ງກິດຈະກຳໃນຄັ້ງນີ້ປະກອບມີຫຼາຍກິດຈະກໍາ ເປັນຕົ້ນການວາງສະແດງຮູບພາບການເຄື່ອນໄຫວວຽກງານ ຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫຼວຽງຈັນ, ເຜີຍກົດໝາຍ, ລະບຽບການ ແລະ ບັນດານິຕິກຳຕ່າງໆ, ສາຍວິດີໂອຮູບພາບ ໃນການຫຼຸດຜ່ອນນຳໃຊ້ຖົງຢາງພາສຕິກ ແລະ ຈັດກິດຈະກຳ ຖາມ-ຕອບ ເພື່ອແລກເອົາຂອງລາງວັນ ຊຶ່ງຜູ້ທີ່ເຂົ້າມາທ່ຽວພາຍໃນງານ ສາມາດເຂົ້າຮ່ວມທຸກກິດຈະກໍາຂອງທາງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມຈັດຂຶ້ນໄດ້ ເພື່ອເຂົ້າຮ່ວມຫຼິ້ນກິດຈະກໍາແລກເອົາຂອງລາງວັນຫຼາກຫຼາຍ.
(ຂ່າວ-ພາບ: ສພຊ)