ໂດຍ: ສ.ບຸດປະຊາ
ນະຄອນຫຼວງວຽງຈັນ (ນວ) ກຳລັງສືບຕໍ່ສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບພາຍໃນກໍາລັງເປັນປົກກະຕິ, ປັບປຸງກໍ່ສ້າງກໍາລັງໃຫ້ມີຄວາມທັນສະໄໝ, ເຂັ້ມແຂງຮອບດ້ານ ເຮັດໃຫ້ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍ; ສຸມທຸກຄວາມສາມາດໃນການແກ້ໄຂປະກົດການຫຍໍ້ທໍ້ຂອງສັງຄົມໃຫ້ຍູ້ດັນການແກ້ໄຂຄະດີຕ່າງໆໃຫ້ຫຼຸດລົງເທື່ອລະກ້າວ; ກໍາລັງປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ເປັນເຈົ້າການ ຈັດຕັ້ງເຄື່ອນໄຫວ ກວດກາເວນຍາມໃນວັນສໍາຄັນຕ່າງໆຂອງພັກ-ຂອງຊາດ ໃນຂອບເຂດຄວາມຮັບຜິດຊອບຂອງຕົນໃຫ້ມີຄວາມສະຫງົບປອດໄພໂດຍພື້ນຖານ.
ການສ້າງ ນວ ເປັນຫົວໜ່ວຍຍຸດທະສາດດ້ານວຽກງານ ປກຊ-ປກສ ໃນໄລຍະຜ່ານມາ ກໍຄືໃນລະຫວ່າງ ປີ 2016-2020 ທີ່ໄດ້ມີການປະເມີນຜົນວຽກງານ 3 ສ້າງຂອງ ນວ ຊຶ່ງດ້ານນີ້ມີ 5 ຕົວຊີ້ບອກ ແລະ ຜ່ານມາວຽກງານນີ້ ກໍເປັນວຽກງານຕົ້ນຕໍພື້ນຖານຂອງການພັດທະນາ ໂດຍຖືເອົາການຈັດຕັ້ງເຜີຍແຜ່ແນວທາງ ປກຊ-ປກສ ທົ່ວປວງຊົນຮອບດ້ານ ໃຫ້ເປັນໜ້າທີ່ ແລະ ຄວາມຮັບຜິດຊອບຂອງໝົດທຸກຄົນໃນສັງຄົມ, ມີການຝຶກແອບຍຸດທະວິທີ-ການທະຫານໃຫ້ກອງຮ້ອຍ ປກສ, ກອງຫຼອນ ມີການກວດກາເວນຍາມ ແລະ ອອກເຄື່ອນໄຫວຕາມຂອບເຂດຊາຍແດນເປັນປົກກະຕິ, ກວດກາຄົນເຂົ້າ-ອອກເມືອງ, ໄດ້ອອກປຶ້ມສໍາມະໂນຄົວທັນສະໄໝ, ເຄື່ອນໄຫວວຽກງານອື່ນໆ ຕາມໜ້າທີ່ ແລະ ຂັ້ນເທິງມອບໝາຍ, ໂຄສະນາປູກຈິດສໍານຶກຄວາມປອດໄພ ໃນການສັນຈອນໃຫ້ບັນດານັກຮຽນ, ພໍ່ແມ່ປະຊາຊົນ ຕິດຕັ້ງໄຟອໍານາດໃໝ່, ສ້າງສິ່ງອໍານວຍ ຕາມຈຸດ 4 ແຍກ ເພື່ອສະດວກໃນການສັນຈອນ ເພື່ອແກ້ໄຂຈຸດທີ່ມີຄວາມສ່ຽງເກີດອຸປະຕິເຫດ ໂດຍຕິດຕັ້ງໄຟກະພິບ ແລະ ແຕ້ມເສັ້ນທາງຈາລະຈອນ.
ພ້ອມກັນນັ້ນ, ການລົງກໍ່ສ້າງຮາກຖານການເມືອງ ໂດຍສະເພາະກໍາລັງ ປກຊ-ປກສ ຕິດພັນກັບການຈັດສັນຄວາມບໍ່ເປັນລະບຽບຮຽບຮ້ອຍຂອງສັງຄົມ ແລະ ປະຕິບັດ 3 ຫຼຸດ 3 ເພີ່ມ 3 ຂະບວນການ, ປະຕິບັດວາລະແຫ່ງຊາດ, ແກ້ໄຂປະກົດການຫຍໍ້ທໍ້ທາງສັງຄົມ, ນໍາພາສ້າງສ້າງບ້ານປ້ອງກັນຊາດເຂັ້ມ ແຂງ 33 ບ້ານ (ປັດຈຸບັນ 75 ບ້ານ), ສ້າງບ້ານປ້ອງກັນຄວາມສະຫງົບດີໄດ້ 371 ບ້ານ (ປັດຈຸບັນ 415ບ້ານ), ບ້ານປອດຢາເສບຕິດ 347 ບ້ານ; ວຽກງານຍຸຕິທໍາຮາກຖານ ໄດ້ເອົາໃຈໃສ່ລົງຕິດຕາມ, ຊຸກຍູ້ ສ້າງຕູ້ສະໝຸດກົດໝາຍປະຈໍາບ້ານ, ເປີດການຮຽນການສອນກົດໝາຍຊັ້ນຕົ້ນຢູ່ 9 ເມືອງ, ໄດ້ສຸມໃສ່ການແກ້ໄຂບັນດາຂໍ້ຂັດແຍ່ງຕ່າງໆ ທີ່ເກີດຂຶ້ນໃຫ້ຫຼຸດລົງເທື່ອລະກ້າວ ນໍາພາສ້າງບ້ານແບບຢ່າງໃນການປະຕິ ບັດກົດໝາຍໄດ້ 320 ບ້ານ.
ຈາກການປະເມີນດັ່ງກ່າວ, ການສ້າງ ນວ ເປັນຫົວໜ່ວຍຍຸດທະສາດດ້ານ ປກຊ-ປກສ ບັນລຸ 4 ຕົວຊີ້ບອກ ເທົ່າກັບ 80%, ບໍ່ບັນລຸ 1 ຕົວຊີ້ບອກ ຄື: (ຂໍ້ 7.5) ເທົ່າກັບ 20%, ສາເຫດບໍ່ບັນລຸ ຍ້ອນວ່າຍັງບໍ່ສາມາດປະກາດຮັບຮອງເປັນເມືອງຫົວໜ່ວຍເຂັ້ມແຂງດ້ານ ປກຊ-ປກສ ກວມ 80% ຂຶ້ນໄປ, ແຕ່ຍັງສຶບຕໍ່ຈັດຕັ້ງປະຕິບັດໃຫ້ດີຂຶ້ນກວ່າເກົ່າ ເພື່ອຈະສາມາດບັນລຸຕົວຊີ້ບອກດັ່ງກ່າວນີ້.
ຄໍາເຫັນ