ເຕົ່າທະເລເກີດໃໝ່ໃນມາເລເຊຍມີໂຕຜູ້ໜ້ອຍລົງ ຍ້ອນພາວະໂລກຮ້ອນ

ຂ່າວຕ່າງປະເທດລາຍງານ ໃນວັນທີ 22 ເມສາຜ່ານມາວ່າ: ເຕົ່າທະເລ ໃນມາເລເຊຍ ສ່ຽງຖືກສູນພັນ ຍ້ອນພາວະໂລກຮ້ອນເຮັດໃຫ້ຊາຍອຸ່ນ ສົ່ງຜົນໃຫ້ລູກເຕົ່າທີ່ຟັກອອກມາມີໂຕແມ່ຫຼາຍກວ່າໂຕຜູ້, ເກາະເຣດັງ ໃນລັດຕຣັງການູ ທາງຕາເວັນອອກສ່ຽງເໜືອຂອງມາເລເຊຍ ເປັນໜຶ່ງໃນເກາະອັນຫງຽບສະຫງົບ ແລະ ເປັນແຫຼ່ງອະນຸລັກເຕົ່າທະເລທີ່ສຳຄັນ ເພາະສະຖານທີ່ແຫ່ງນີ້ມັກມີເຕົ່າທະເລຂຶ້ນມາວາງໄຂ່ ແລະ ຖືກຕັ້ງເປັນເຂດຮັກສາຍພັນເຕົ່າ ຊາກາຮູຕັງ (ChagarHutang).
ທ່ານ ມູຮຳໝັດ ຮາຟິຊູດິນ ໂມດຊາປາ ເຈົ້າໜ້າທີ່ສູນອະນຸລັກກ່າວວ່າ: ເກາະເຣດັງ ມີຊື່ສຽງເລື່ອງເຕົ່າ ພວກເຮົາຕ້ອງການປົກປ້ອງສົມບັດຂອງພວກເຮົາໄວ້ໃນສະຖານທີ່ແຫ່ງນີ້, ແຕ່ແຫຼ່ງອະນຸລັກດັ່ງກ່າວອາດກາຍເປັນອະດີດ ເມື່ອພວກເຕົ່າກຳລັງປະເຊີນກັບໄພຄຸກຄາມຈາກອຸນຫະພູມທີ່ເພີ່ມຂຶ້ນ ເນື່ອງຈາກການປ່ຽນແປງສະພາບພູມອາກາດ ເພາະຄວາມຮ້ອນເຮັດໃຫ້ຊາຍອຸ່ນຂຶ້ນ ແລະ ລົບກວນການກຳນົດເພດຂອງລູກເຕົ່າ.
ພວກເຮົາຕ້ອງເຂົ້າໃຈກ່ອນວ່າ: ເມື່ອເຕົ່າທະເລປະສົມພັນ ເຕົ່າທະເລໂຕແມ່ຈະຂຶ້ນມາຫາດຊາຍເພື່ອວາງໄຂ່ ໂດຍຈະຂຸດຊາຍ ແລະ ຝັງໄຂ່ເອົາໄວ້ຖ້າມື້ຟັກອອກມາ ຊຶ່ງຈາກຂໍ້ມູນທາງວິທະຍາສາດນັ້ນ ເພດຂອງເຕົ່າທະເລ ແລະ ແຂ້ ບໍ່ໄດ້ຖືກກຳນົດໃນໄລຍະຂອງການປະຕິສົນທິ ແຕ່ຈະຂຶ້ນຢູ່ກັບອຸນຫະພູມທີ່ໄຂ່ໄດ້ຮັບ.ດັ່ງນັ້ນ, ອຸນຫະພູມຂອງຫາດຊາຍທີ່ຫໍ່ຫຸ້ມໄຂ່ເຕົ່າທະເລເຫຼົ່ານີ້ ຈຶ່ງມີຜົນຕໍ່ເພດຂອງລູກເຕົ່າທະເລໃນໄຂ່, ໂດຍຫາກໄຂ່ເຕົ່າຟັກໂຕໃນອຸນຫະພູມ 29,2 ອົງສາ ຈະມີໂອກາດເປັນໂຕຜູ້ ແລະ ໂຕແມ່ເທົ່າໆກັນ ແຕ່ຖ້າອຸນຫະພູມຕໍ່າກວ່າ 27,7 ອົງສາ ລູກເຕົ່າທີ່ຟັກອອກມາຈະເປັນໂຕຜູ້ ແຕ່ຫາກຟັກໃນອຸນຫະພູມສູງກວ່າ 31 ອົງສາ ພວກມັນຈະເປັນໂຕແມ່. ດັ່ງນັ້ນ, ຖ້າຫາດຊາຍອຸນເທົ່າໃດເຕົ່າທີ່ຟັກອອກມາກໍຈະຍິ່ງມີໂອກາດມີແຕ່ໂຕແມ່ຫຼາຍຂຶ້ນເທົ່ານັ້ນ.
ກ່ອນໜ້ານີ້ເຄີຍມີການລາຍງານໄປແລ້ວວ່າ: ນັກວິທະຍາສາດທີ່ສະຫະລັດອາເມຣິກາ ພົບວ່າ: ເຕົ່າທະເລທີ່ເກີດໃໝ່ໃນລັດຟໍຣິດາ ໃນໄລຍະ 4-5 ປີຫຼັງມານີ້ ເປັນໂຕແມ່ທັງໝົດ.ລ້າສຸດ ເຂດຮັກສາພັນເຕົ່າຊາກາຮູຕັງ ກໍພົບວ່າໃນໄລຍະບໍ່ເທົ່າໃດປີທີ່ຜ່ານມາ ມີເຕົ່າທະເລໂຕຜູ້ຈຳນວນໜ້ອຍຫຼາຍທີ່ຟັກອອກຈາກໄຂ່ ເຊັ່ນດຽວກັບຫາດຊາຍອື່ນໆຕາມແຄມຝັ່ງຕາເວັນອອກ.
ທ່ານ ໂມຮຳໝັດ ອຸຊາອີ ຣຸສລີ ຜູ້ຊ່ຽວຊານດ້ານເຕົ່າ ຈາກມະຫາວິທະຍາໄລມາເລເຊຍຕຣັງການູ ກ່າວວ່າ: ສຳລັບຫຼາຍພື້ນທີ່ເທິງຫາດຊາຍຝັ່ງຕາເວັນອອກຂອງຄາບສະໝຸດ ຕັ້ງແຕ່ປີ 2019-2022 ຈຳນວນເຕົ່າໂຕຜູ້ທີ່ຟັກອອກມານັ້ນເກືອບເປັນສູນ ຍ້ອນພາວະໂລກຮ້ອນສົ່ງຜົນໃຫ້ບໍ່ມີການຟັກໄຂ່ໂຕຜູ້.