ໄປຄຽງຄູ່ກັບສະພາບເສດຖະກິດ-ການເມືອງຂອງປະເທດຈີນມີການເຕີບໃຫຍ່ຂະຫຍາຍຕົວຢ່າງເຂັ້ມແຂງ, ອິດທິພົນບົດບາດຂອງຈີນນັບມື້ນັບກວ້າງຂວາງ, ຜູ້ຄົນຈາກທົ່ວທຸກມູມໂລກຕ່າງກໍຈ້ອງມອງມາທີ່ ສປ ຈີນ ດ້ວຍສາຍຕາແຫ່ງຄວາມເຄົາລົບນັບຖື ຊຶ່ງໃນນັ້ນມີບັນດານັກຮຽນນັກສຶກສາລາວຈໍານວນຫຼວງຫຼາຍຜູ້ມີຄວາມປາຖະໜາເດີນທາງມາ
ສຶກສາຫາຄວາມຮູ້ຢູ່ປະເທດຈີນ. ຂ້າພະເຈົ້າກໍເປັນອີກຜູ້ໜຶ່ງ ຊຶ່ງຕິດຕາການພັດທະນາຂອງປະເທດຈີນມາໂດຍຕະຫຼອດ. ໃນປີ 2022 ກໍໄດ້ຮັບທຶນການສຶກສາຈາກລັດຖະບານຈີນມາສຶກສາຮໍ່າຮຽນສາຂາວິຊາລັດທິມາກ ຢູ່ມະຫາວິທະຍາໄລຢູນນານ.
ການດຳລົງຊີວິດ ແລະ ສຶກສາຮໍ່າຮຽນຢູ່ ສປ ຈີນ ເປັນເວລາ 1 ປີ, ຂ້າພະເຈົ້າມີການຮັບຮູ້ຕໍ່ຈີນເລິກເຊິ່ງກວ່າເກົ່າ. ທາງດ້ານການສຶກສາ, ຄົນຈີນຈະເປັນຄົນໃຫ້ຄວາມສຳຄັນກັບການສຶກສາຫຼາຍ, ສະເພາະຂ້າພະເຈົ້າເອງພ້ອມດ້ວຍນັກສຶກສາລາວ ລວມເຖິງນັກສຶກສາຕ່າງປະເທດຕ່າງກໍເຫັນດີເປັນເອກະພາບກັນວ່າ ຄົນຈີນ ມັກຮຽນຮູ້ ນັກສຶກສາຈີນດຸໝັ່ນສຶກສາຮ່ຳຮຽນຫຼາຍ. ມີຫຼາຍຄັ້ງ ຕັ້ງແຕ່ເຊົ້າທີ່ຂ້າພະເຈົ້າກຳລັງແລ່ນຫຼິ້ນກິລາຕາມແຄມທາງກໍເຫັນນັກສຶກສາຈີນພາກັນທະຍອຍເຂົ້າຫ້ອງສະໝຸດເພື່ອອ່ານໜັງສືຢ່າງເປັນຂະບວນຟົດ
ຟື້ນ. ຫຼັງຈາກດຳລົງຊີວິດ ແລະ ສຶກສາຮ່ຳຮຽນຢູ່ນີ້ດົນນານ ບັນດານັກຮຽນລາວເຮົາກໍຕິດນິດໄສຮັກການອ່ານ ສະແຫວງຫາຄວາມຮູ້ໃໝ່ໆແບບນັກສຶກສາຈີນ.
ຄົນຈີນໂດຍທົ່ວໄປແລ້ວເປັນຄົນນິດໄສດີ ເມື່ອຮູ້ວ່າເຮົາເປັນຄົນລາວຈະໃຫ້ການຊ່ວຍເຫຼືອເປັນພິເສດ, ມັນແມ່ນຄວາມຈິງ ແນວຄິດທີ່ວ່າສອງຊາດເປັນເພື່ອນບ້ານໃກ້ຊິດກັນມີພູຮ່ວມສາຍ ແມ່ນໍ້າຮ່ວມຫ້ວຍ ໃຈກົງກັນ ຮ່ວມຈຸດໝາຍດຽວກັນໄດ້ສ່ອງແສງອອກມາຢາງເຕັມທີ່.ທາງດ້ານຄົມມະນາຄົມຂົນສົ່ງ, ການເດີນທາງໄປມາຢູ່ປະເທດຈີນສະດວກສະບາຍຫຼາຍ. ຕາໜ່າງຂອງລົດໄຟຄວາມໄວສູງຂອງຈີນໄດ້ປົກຄຸມຫຼາຍຂົງເຂດ, ໃນຫຼາຍເມືອງກໍມີລົດໄຟໃຕ້ດິນ. ຍົນ C919 ທີ່ຜະລິດເອງພາຍໃນປະເທດມີຄຸນນະພາບດີ. ຜ່ານມາ ຂ້າພະເຈົ້າໄດ້ເດີນທາງໄປມາຕາມສະຖານທີ່ຕ່າງໆ ເພື່ອການທ່ອງທ່ຽວໂດຍທາງລົດໃຫຍ່, ລົດໄຟຄວາມໄວສູງ, ຍົນ ຊຶ່ງສາມາດສຳຜັດໄດ້ເຖິງຄວາມທັນສະໄໝຂອງການຄົມມະນາຄົມຂົນສົ່ງແຫ່ງປະເທດຈີນ.
ທາງດ້ານເຕັກໂນໂລຊີໃນການຈັບຈ່າຍໃຊ້ສອຍ: ໃນຍຸກນີ້ ແມ່ນຍຸກທີ່ຜູ້ຄົນຊື້-ຂາຍສິ່ງຂອງກັນທາງອອນລາຍເປັນກະແສຫຼັກ, ພຽງແຕ່ໃຊ້ມືຖືໜ່ວຍດຽວ ກໍສາມາດດຳເນີນການຊື້ເຄື່ອງຂອງຜ່ານລະບົບອິນເຕີເນັດໄດ້ແລ້ວ, ປັດຈຸບັນນີ້ສິນຄ້າມີຂາຍຕາມແຄມທາງກໍມີ QR CODE ໃຫ້ສະແກນຈ່າຍເພື່ອຄວາມສະດວກ.
ໃນຖານະທີ່ເປັນປະທານສະມາຄົມນັກສຶກສາລາວຢູ່ມະຫາວິທະຍາໄລຢູນນານ ຂ້າພະເຈົ້າຂໍຝາກເຖິງ ນັກສຶກສາທີ່ກໍາລັງສຶກສາຮໍ່າຮຽນຢູ່ ສປ ຈີນ ຈົ່ງຮັກສາສຸຂະພາບໃຫ້ເຂັ້ມແຂງຢູ່ສະເໝີ ເພື່ອສືບຕໍ່ພາລະກິດການສຶກສາຮໍ່າຮຽນ, ຕ້ອງຫາເວລາສ້າງໂອກາດໃຫ້ຕົນເອງໄດ້ເດີນທາງໄປສະຖານທີ່ຕ່າງໆຂອງຈີນເພື່ອສໍາຜັດ ແລະ ຊາບຊຶມກັບສິ່ງໃໝ່ໆເພື່ອການຮຽນຮູ້ ເຕີບໂຕຂຶ້ນ. ຫວັງວ່າທຸກທ່ານສາມາດນໍາໃຊ້ຄວາມຮູ້ທີ່ຮຽນໄດ້ຢູ່ຈີນ ເຂົ້າໃນພາລະກິດການສ້າງສາປະເທດຊາດ.
ຂ້າພະເຈົ້າຂໍຂອບໃຈສອງພັກສອງລັດທີ່ໃຫ້ໂອກາດຂ້າພະເຈົ້າໄດ້ມາສຶກສາຄົ້ນຄ້ວາຢູ່ດິນແດນແຫ່ງນີ້ ຢູ່ຄຸນໝິງ ໃນແຕ່ລະວັນລ້ວນແຕ່ແມ່ນລະດູໃບໄມປົ່ງ ອາກາດດີຫຼາຍ ບໍ່ຮ້ອນ ບໍ່ໜາວຈົນເກີນໄປ, ອາຫານກໍແຊບຊ້ອຍຫຼາກຫຼາຍ ເສັ້ນໝີ່ຂ້າມຂົວແມ່ນອາຫານໂປດປານຂອງຂ້າພະເຈົ້າເລີຍ. ວັດທະນະທໍາກໍມີເອກະລັກສະເພາະ, ໃນແຕ່ລະເມືອງຈະມີງານເທດສະການເຕັ້ນລໍາຂອງເຜົ່າຕ່າງໆຕະຫຼອດປີ, ເປັນພື້ນທີ່ແຫ່ງພຶກສານາໆພັນມີລະບົບນິເວດອັນອຸດົມສົມບູນ.
ຄໍາເຫັນ