 |
ໂອກາດດຽວກັນ ທ່ານ ເພັດ ພົມພິພັກ ກໍ່ໄດ້ເຂົ້າຮ່ວມຮັບຟັງການລາຍງານສະພາບໄພພິບັດ ຈາກ ທ່ານ ບຸນຄົງ ຫຼ້າຈຽມພອນ ກຳມະການສູນກາງພັກ, ເລຂາພັກແຂວງ, ປະທານສະພາປະຊາຊົນແຂວງ ທີ່ ຫ້ອງປະຊຸມຫ້ອງວ່າການແຂວງ ເຊິ່ງໄດ້ຍົກໃຫ້ເຫັນ ໃນຊ່ວງໄລຍະລະດູຝົນ ປີ 2026 ທີ່ຜ່ານມາ, ເນື່ອງຈາກອິດທິພົນຂອງຮ່ອງຄວາມກົດດັນອາກາດຕໍ່າ ສົມທົບກັບ ລົມມໍລະສຸມຕາເວັນຕົກ ຈິ່ງເຮັດໃຫ້ເກີດມີຝົນຕົກໜັກຢູ່ໃນຫຼາຍແຂວງຂອງພາກເໜືອລາວ, ໂດຍສະເພາະ ແຂວງອຸດົມໄຊ ກໍ່ເປັນແຂວງໜຶ່ງ ທີ່ໄດ້ຮັບຜົນກະທົບຈາກອິດທິພົນດັ່ງກ່າວ ເກີດມີໄພພິບັດນໍ້າຖ້ວມໜັກ ແລະ ດິນເຈື່ອນ ຈຳນວນ 3 ຄັ້ງ ຄື: ຄັ້ງທີ 1: ວັນທີ 7-8; ຄັ້ງທີ 2: ວັນທີ 19 ແລະ ຄັ້ງທີ 3: ວັນທີ 29-30 ສິງຫາ 2026 ຊຶ່ງໄດ້ສ້າງຄວາມເສຍຫາຍ ຕໍ່ຊີວິດ, ຊັບສິນ, ທີ່ຢູ່ອາໄສ, ໂຄງລ່າງພື້ນຖານ ເສັ້ນທາງຄົມມະນາຄົມ, ຕາຂ່າຍໄຟຟ້າ, ລະບົບນໍ້າປະປາ, ລະບົບໂທລະຄົມມະນາຄົມ ແລະ ການສື່ສານ, ພື້ນທີ່ການຜະລິດກະສິກຳ, ໂຮງຮຽນ, ໂຮງໝໍ ເປັນຈໍານວນຫຼວງຫຼາຍ. ໃນນີ້, ເມືອງທີ່ໄດ້ຮັບຜົນກະທົບໜັກ ມີ 5 ເມືອງ ຄື: ເມືອງໄຊ, ເມືອງຫຼາ, ເມືອງນາໝໍ້, ເມືອງແບງ ແລະ ເມືອງງາ; ມີ 73 ບ້ານ, ປະຊາກອນ 5,441 ຄົນ ໄດ້ຮັບຜົນກະທົບ; ສິ່ງທີ່ເສົ້າສະຫຼົດໃຈ ແມ່ນເຮັດໃຫ້ມີຜູ້ເສຍຊີວິດ 6 ຄົນ, ສູນຫາຍ 1 ຄົນ ແລະ ບາດເຈັບ 10 ຄົນ ລວມຄວາມເສຍຫາຍໃນເບື້ອງຕົ້ນເປັນມູນຄ່າ ປະມານ 237 ກວ່າຕື້ກີບ.
 |
ຕໍ່ກັບສະພາບວິກິດການດັ່ງກ່າວ ຄະນະພັກ-ຄະນະນໍາ ແລະ ຄະນະກຳມະການຄຸ້ມຄອງໄພພິບັດແຕ່ລະຂັ້ນຂອງແຂວງ ໄດ້ສຸມທຸກກໍາລັງເຂົ້າຮັບມື, ຕອບໂຕ້-ແກ້ໄຂສຸກເສີນ, ເລັ່ງຊອກຄົ້ນຫາຜູ້ສູນຫາຍ, ໃຫ້ການຊ່ວຍເຫຼືອບັນເທົາທຸກເບື້ອງຕົ້ນ ແກ່ ປະຊາຊົນຜູ້ໄດ້ຮັບຜົນກະທົບ ແລະ ແກ້ໄຂສ້ອມແປງສຸກເສີນ ບັນດາໂຄງລ່າງພື້ນຖານທີ່ຈໍາເປັນ. ປັດຈຸບັນ ສະພາບໂດຍລວມເລີ່ມກັບເຂົ້າສູ່ປົກກະຕິ.ດ້ວຍຄວາມເປັນຫ່ວງເປັນໄຍ, ຈາກການນຳຂັ້ນສູງ ໄດ້ລົງມາຢ້ຽມຢາມ, ກວດກາ ສະພາບຜົນກະທົບຈາກໄພພິບັດນໍ້າຖ້ວມ ຢູ່ ແຂວງອຸດົມໄຊ.
ທ່ານ ເພັດ ພົມພິພັກ ໄດ້ໂອ້ລົມໃຫ້ທິດຊີ້ນຳ ຄະນະພັກ, ຄະນະນຳແຂວງອຸດົມໄຊ ລົງເລິກເກັບກຳຂໍ້ມູນຕົວຈິງໃຫ້ລະຽດ ເພື່ອສືບຕໍ່ວາງແຜນແກ້ໄຂໃນສະເພາະໜ້າ ແລະ ຍາວນານ, ສືບຕໍ່ແກ້ໄຂພື້ນຖານໂຄງລ່າງ ຖະໜົນຫົນທາງ, ຊົນລະປະທານ, ເຝົ້າລະວັງຢ່າງໃກ້ຊິດ ເພື່ອກະກຽມຮັບມື ພະຍາດລະບາດອາດຈະເກີດຂຶ້ນ. ໃນໂອກາດນີ້ ຍັງໄດ້ມອບເງິນຈຳນວນ 700 ລ້ານກີບ ເພື່ອຊ່ວຍຟື້ນຟູ ຜູ້ປະສົບໄພ ຢູ່ ແຂວງອຸດົມໄຊ ຕື່ມອີກ.ຂ່າວ:ສຸວັນທອງປັນຍາຂັນ
ຄໍາເຫັນ