ເນື່ອງໃນໂອກາດປີໃໝ່ສາກົນ2024ໃກ້ຈະໝູນວຽນມາເຖິງ, ທ່ານ ສີຈິ້ນຜິງ ປະທານປະເທດຈີນໄດ້ກ່າວຄຳອວຍພອນປີໃໝ່ 2024 ຜ່ານສະຖານີວິທະຍຸໂທລະພາບສູນກາງຈີນ ແລະ ທາງອິນເຕີເນັດ. ເພິ່ນໄດ້ສະຫຼຸບຂະບວນວິວັດທີ່ບໍ່ທຳມະດາຂອງຈີນໃນປີ 2023 ແລະ ຜົນສຳເລັດດ້ານການພັດທະນາທີ່ຍາດມາໄດ້, ປີໃໝ່ 2024 ຂໍອວຍພອນໃຫ້ປະເທດຊາດມີຄວາມຈະເລີນຮຸ່ງເຮືອງ, ໂລກມີສັນຕິພາບ ແລະ ຄວາມສະຫງົບສຸກ!
ທ່ານ ສີຈິ້ນຜິງ ໄດ້ນຳໃຊ້ຄຳວ່າ ບາດກ້າວເດີນ ຂອງຈີນ ມາສະຫຼຸບຂະບວນວິວັດແລະຜົນສຳເລັດຂອງຈີນໃນປີ 2023, ເພິ່ນກ່າວວ່າ: ຊີວິດການເປັນຢູ່ທີ່ອົບອຸ່ນມີບັນຍາກາດ, ຄວາມຫ້າວຫັນຂຸ້ນຂ້ຽວເຮັດວຽກເພື່ອຟື້ນຟູເສດຖະກິດຄືນໃໝ່, ໄດ້ສ່ອງແສງໃຫ້ເຫັນເຖິງຄົນທັງຫຼາຍສະແຫວງຫາຄວາມດີງາມ ແລະ ຄວາມສຸກ, ທັງໄດ້ສ່ອງແສງໃຫ້ເຫັນເຖິງປະເທດຈີນທີ່ເຕັມໄປດ້ວຍຄວາມມີຊີວິດຊີວາ ແລະ ຄວາມກະຕືລືລົ້ນ. ເສດຖະກິດຈີນໄດ້ມີທ່ວງທ່າດີຂຶ້ນຢ່າງຕໍ່ເນື່ອງ, ການພັດທະນາດ້ວຍຄຸນນະພາບສູງໄດ້ດໍາເນີນໄປຢ່າງໜັກແໜ້ນ. ລະບົບອຸດສາຫະກໍາທັນສະໄໝໄດ້ສົມບູນຂຶ້ນກວ່າເກົ່າ, ອຸດສາຫະກໍາທີ່ເປັນເສົາຄໍ້າແບບໃໝ່ຕ່າງໆທີ່ມີລະດັບສູງ, ອັດສະລິຍະ ແລະ ສີຂຽວໄດ້ພັດທະນາໄປຢ່າງວ່ອງໄວ. ການຜະລິດທັນຍາຫານໄດ້ຮັບຜົນເກັບກ່ຽວທີ່ອຸດົມສົມບູນເປັນເວລາ 20 ປີລຽນຕິດ, ພູຂຽວນໍ້າໃສມີສີສັນເຂັ້ມຂຸ້ນກວ່າເກົ່າ, ການພັດທະນາຊົນນະບົດໃຫ້ຈະເລີນໄດ້ປະກົດມີສະພາບໃໝ່.ເຮືອບິນຂະໜາດໃຫຍ່ C919 ໄດ້ບັນລຸການບິນດ້ານການຄ້າ, ກໍາປັ່ນນໍາທ່ຽວຂະໜາດໃຫຍ່ທີ່ຈີນຜະລິດໄດ້ສໍາເລັດການທົດລອງເດີນເຮືອ, ຍານອະວະກາດລະບົບເສີນໂຈ່ວໄດ້ປະຕິບັດພາລະກິດຢ່າງຕໍ່ເນື່ອງຢູ່ເທິງອະວະກາດ, ຍານດໍານໍ້າ “ເຟີ້ນໂຕ້ເຈີ” ໄດ້ດໍານໍ້າທະເລເລິກສຸດຂີດ. ຈີນໄດ້ບຸກບືນສູ້ຊົນດ້ວຍນໍ້າໃຈສ້າງຄວາມເຂັ້ມແຂງດ້ວຍຕົນເອງຢ່າງບໍ່ລົດລະ, ທຸກຂະແໜງການລ້ວນແຕ່ເຕັມໄປດ້ວຍການປະດິດສ້າງທີ່ມີການພັດທະນາຢ່າງວ່ອງໄວ.
ທ່ານ ສີຈິ້ນຜິງ ໄດ້ໃຊ້ຄຳວ່າ ຈີນຮ່ວມມືກັບໂລກຢ່າງຕັ້ງໜ້າ ມາສະແດງໃຫ້ເຫັນເຖິງການແບກຫາບຄວາມຮັບຜິດຊອບຂອງຈີນໃນຖານະເປັນປະເທດໃຫຍ່. ເພິ່ນກ່າວວ່າ: ຈີນໄດ້ເປັນເຈົ້າພາບຈັດກອງປະຊຸມສຸດຍອດຈີນ-ອາຊີກາງ ແລະ ກອງປະຊຸມເວທີເປິກສາຫາລືສຸດຍອດການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ຄັ້ງທີ 3 ຢ່າງສຳເລັດຜົນ, ການເຄື່ອນໄຫວດ້ານການຕ່າງປະເທດ ທີ່ຈີນເປັນເຈົ້າພາບໄດ້ຕ້ອນຮັບເພື່ອນມິດຈາກທົ່ວໂລກ.
ທ່ານ ສີຈິ້ນຜິງ ກ່າວຕື່ມວ່າ: ປີ 2024 ແມ່ນປະເທດຈີນໃໝ່ສ້າງຕັ້ງຂຶ້ນ ຄົບຮອບ 75 ປີ. ພວກເຮົາຕ້ອງຊຸກຍູ້ຄວາມ ທັນສະໄໝແບບຈີນຢ່າງເດັດດ່ຽວໜຽວແໜ້ນ. ເພີ່ນວ່າເປົ້າໝາຍຂອງຈີນເປັນເປົ້າໝາຍທີ່ຍິ່ງໃຫຍ່ ແລະ ລຽບງ່າຍ, ສະຫຼຸບແລ້ວແມ່ນເຮັດໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນກວ່າເກົ່າ. ເຮັດໃຫ້ຄົນທັງຫຼາຍມີອາລົມຈິດທີ່ດີ, ໄດ້ຮັບຜົນງານພົ້ນເດັ່ນໃນຊີວິດຂອງຕົນ ແລະ ຄວາມໃຝ່ຝັນບັນລຸຜົນເປັນຈິງ.
ທ່ານ ສີຈິ້ນຜິງ ຍັງກ່າວວ່າ: ສະພາບການຂອງໂລກຜັນແປຢູ່ເລື້ອຍໆ, ສັນຕິພາບ ແລະ ການພັດທະນາເປັນກະແສຫຼັກຢ່າງສະເໝີຕົ້ນສະເໝີປາຍ, ການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດເປັນຫຼັກການຂັ້ນເດັດຂາດຢ່າງສະເໝີຕົ້ນສະເໝີປາຍ. ປັດຈຸບັນ, ບາງພາກພື້ນຢູ່ໃນໂລກຍັງຕົກຢູ່ໃນແປວໄຟສົງຄາມ. ປະຊາຊົນຈີນຮູ້ຈັກຄຸນຄ່າອັນປະເສີດຂອງສັນຕິພາບເປັນຢ່າງດີ, ພວກເຮົາຍິນດີຮ່ວມກັບປະຊາຄົມໂລກ, ຖືເອົາອະນາຄົດຂອງມວນມະນຸດເປັນຄວາມຫ່ວງໃຍຢູ່ໃນໃຈ, ຖືເອົາຄວາມສຸກຂອງປະຊາຊົນເປັນເປົ້າໝາຍ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ, ສ້າງໂລກທີ່ດີງາມກວ່າເກົ່າ.
ອົງການເພື່ອການຮ່ວມມືດ້ານເສດຖະກິດ ແລະ ພັດທະນາ ປັບການຄາດຄະເນການເຕີບໂຕເສດຖະກິດໂລກຂຶ້ນເປັນ 2.9%
ວິທະຍຸ, ໂທລະພາບສູນກາງຈີນ (CMG) ລາຍງານວ່າ: ໃນວັນທີ 23 ກັນຍາ ຜ່ານມາ, ອົງການເພື່ອການຮ່ວມມືດ້ານເສດຖະກິດ ແລະ ພັດທະນາ(OECD) ໄດ້ເຜີຍແຜ່ບົດລາຍງານສະພາບທ່າອຽງການພັດທະນາເສດຖະກິດສະບັບຫຼ້າສຸດ ໂດຍໄດ້ປັບການຄາດຄະເນຈັງຫວະການເຕີບໂຕຂອງເສດຖະກິດໂລກໃນປີ2026ຈາກ2.8%ຂຶ້ນເປັນ 2.9%. ບົດລາຍງານລະບຸວ່າ: ເຖິງວ່າໄດ້ຮັບຜົນກະທົບຈາກສະຖານະການຢູ່ເຂດຕາເວັນອອກກາງກໍຕາມ, ແຕ່ເສດຖະກິດຂອງຫຼາຍປະເທດຍັງຄົງສະແດງໃຫ້ເຫັນຄວາມເຂັ້ມແຂງ ແລະ ທົນທານ, ມີຄັງສຳຮອງນ້ຳມັນເຊື້ອໄຟ ແລະ ການສະໜອງພະລັງງານເພີ່ມໃໝ່ຢ່າງພຽງພໍແລະ ມາດຕະການສະໜັບສະໜູນຂອງບາງປະເທດໄດ້ຊ່ວຍຜ່ອນຄາຍຜົນກະທົບດັ່ງກ່າວ, ການພັດທະນາຢ່າງຄຶກຄື້ນຂອງຂົງເຂດປັນຍາປະດິດໄດ້ຊຸກຍູ້ໃຫ້ການລົງທຶນແລະການຄ້າຂະຫຍາຍຕົວເຊັ່ນກັນ.
ຄໍາເຫັນ