 |
ທ່ານ ອາດ ວິໄລພົນ ປະທານກວດກາພັກ-ລັດເມືອງເຟືອງ ໄດ້ຕາງໜ້າຂຶ້ນລາຍງານສະພາບລວມຂອງຕົວເມືອງນ້ອຍຜາສັງ ເມືອງເຟືອງວ່າ: ຈຸດສຸມຜາສັງ ແມ່ນໜຶ່ງໃນຈຸດສຸມພັດທະນາຂອງແຂວງວຽງຈັນ ໄດ້ຖືກຮັບຮອງເປັນ ຕົວເມືອງນ້ອຍໃນຊົນນະບົດ ໃນຄັ້ງວັນທີ 5 ມັງກອນ 2024, ມີ 10 ບ້ານຂຶ້ນກັບ, 156 ໜ່ວຍສາມັກຄີ, ມີ 2,415 ຄອບຄົວ, ມີພົນລະເມືອງ 14,265 ຄົນ, ຍິງ 7,049 ຄົນ, ມີ 5 ຊົນເຜົ່າຄື: ເຜົ່າລາວ, ເຜົ່າໄຕ, ເຜົ່າກຶມມຸ, ເຜົ່າມົ້ງ ແລະ ເຜົ່າອີວມ້ຽນ, ປະຊາຊົນສ່ວນຫຼາຍຖືເອົາການປູກຝັງ-ລ້ຽງສັດ, ອັນທີ່ພົ້ນເດັ່ນແມ່ນ ການປູກເຂົ້າ, ໝາກເດືອຍ, ຢາງພາລາ, ລ້ຽງໄກ່ໄຂ່ ແລະ ສັດໃຫຍ່, ສະເລ່ຍເຂົ້າເປືອກຕໍ່ຫົວຄົນໄດ້ 900 ກວ່າກິໂລຕໍ່ຄົນ/ປີ. ປັດຈຸບັນຍັງມີຄອບຄົວບໍ່ພົ້ນທຸກ (ທຸກຍາກ) ຈຳນວນ 112 ຄອບຄົວ.
 |
ໂອກາດນີ້, ທ່ານນາຍົກລັດຖະມົນຕີ ໄດ້ເນັ້ນໃຫ້ພໍ່ແມ່ປະຊາຊົນທຸກຄົນ ຈົ່ງສືບຕໍ່ຮັກສາມູນເຊື້ອດຸໝັ່ນຂະຫຍັ່ນພຽນຂອງຕົນໃນການປູກຝັງລ້ຽງສັດ ຕາມທ່າແຮງທີ່ຕົນມີ, ປູກໃຫ້ຫຼາຍ ໃຫ້ກຸ້ມກິນ ສ່ວນທີ່ເຫຼືອກໍສົ່ງອອກຈຳໜ່າຍຂ່າຍ ເພື່ອສ້າງລາຍຮັບໃຫ້ແກ່ຄອບຄົວ, ໃຫ້ມີຢູ່ມີກິນກ້າວໄປເຖິງການຫຼຸດພົ້ນອອກຈາກຄວາມທຸກຍາກເທື່ອລະກ້າວ. ພ້ອມນີ້ ການຈັດຕັ້ງທີ່ກ່ຽວຂ້ອງກໍຕ້ອງໃຫ້ການສະໜັບໜູນໃນການຄົ້ນຫາແຫຼ່ງທຶນ, ເງິນກຸ້ດອກເບ້ຍຕ່ຳ ສະໜອງໃຫ້ແກ່ເຂົາເຈົ້າອີກ. ສຳລັບການຈັດງານບຸນປະເພນີຂອງເຜົ່າຕ່າງໆກໍຕ້ອງຢູ່ບົນພື້ນຖານຄວາມປະຢັດມັດທະຍັດຕາມຄວາມເໝາະສົມ. ໂອກາດທີ່ມາຢ້ຽມຢາມໃນຄັ້ງນີ້, ທ່ານນາຍົກ ໄດ້ນຳເອົາອຸປະກອນເຄື່ອງໃຊ້ຫ້ອງການມາມອບໃຫ້ແກ່ຈຸດສຸມຜາສັງອີກດ້ວຍ.
(ແຫຼ່ງຂ່າວ: ເມືອງເຟືອງ)
ຄໍາເຫັນ