 |
ໃນການພົບປະກັບທ່ານ ນາງ ຫງວຽນ ທິ ຮວາງ ເວິນ ຮອງລັດຖະມົນຕີກະຊວງການຕ່າງປະເທດແຫ່ງ ສສ ຫວຽດນາມ, ຝ່າຍຫວຽດນາມໄດ້ສະແດງຄວາມຊົມເຊີຍ ແລະ ສະໜັບສະໜູນການເປັນປະທານກອງປະຊຸມຂອງ ສປປ ລາວ, ພ້ອມທັງອວຍພອນໃຫ້ກອງປະຊຸມດັ່ງກ່າວປະສົບຜົນສຳເລັດຢ່າງຈົບງາມ; ສອງຝ່າຍໄດ້ເນັ້ນເຖິງຄວາມສຳຄັນຂອງການແກ້ໄຂບັນຫາລະເບີດບໍ່ທັນແຕກ ທີ່ສົ່ງຜົນກະທົບຕໍ່ຊີວິດປະຊາຊົນ ແລະ ການພັດທະນາເສດຖະກິດ-ສັງຄົມ; ສອງຝ່າຍຈະສືບຕໍ່ປະສານສົມທົບກັນຢ່າງແໜ້ນແຟ້ນ ເພື່ອກະກຽມການແລກປ່ຽນການຢ້ຽມຢາມຊຶ່ງກັນ ແລະ ກັນ ຂອງການນໍາຂັ້ນສູງຂອງສອງ-ພັກ ແລະ ສອງລັດໃນມໍ່ໆນີ້ ໃຫ້ໄດ້ຮັບຜົນສໍາເລັດ, ກະກຽມສະເຫຼີມສະຫຼອງປີສາມັກຄີ-ມິດຕະພາບລາວ-ຫວຽດນາມ, ຫວຽດນາມ-ລາວ ໃນປີ 2027; ພ້ອມທັງຍິນດີຮ່ວມກັນເສີມຂະຫຍາຍກົນໄກການຮ່ວມມືລະຫວ່າງສອງກະຊວງການຕ່າງປະເທດໃຫ້ມີປະສິດທິຜົນສູງເພື່ອຊຸກຍູ້ ແລະ ສົ່ງເສີມການຈັດຕັ້ງປະຕິບັດບັນດາຂໍ້ຕົກລົງຂອງການນຳຂັ້ນສູງຂອງສອງພັກ, ສອງລັດ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນທັງສອງຊາດ.
ສໍາລັບການພົບປະກັບ ທ່ານ ສະຣັນ ຈະເລີນສຸວັນ ຜູ້ຊ່ວຍລັດຖະມົນຕີກະຊວງການຕ່າງປະເທດແຫ່ງຣາຊະອານາຈັກໄທ: ຝ່າຍລາວໄດ້ສະແດງຄວາມຂອບໃຈຢ່າງສູງຕໍ່ລັດຖະບານແຫ່ງຣາຊາອານາຈັກໄທ ທີ່ໄດ້ແຕ່ງຕັ້ງໃຫ້ທ່ານ ສະຣັນ ຈະເລີນສຸວັນ ຜູ້ຊ່ວຍລັດຖະມົນຕີກະຊວງການຕ່າງປະເທດເຂົ້າຮ່ວມກອງປະຊຸມຄັ້ງນີ້; ຝ່າຍໄທ ໄດ້ຢ້ຳຄືນຄວາມໝາຍໝັ້ນໃນການຮ່ວມມືດ້ານມະນຸດສະທຳ, ໂດຍສະເພາະການແກ້ໄຂບັນຫາລະເບີດບໍ່ທັນແຕກ. ທັງສອງຝ່າຍໄດ້ປຶກສາຫາລືກ່ຽວກັບການກະກຽມກອງປະຊຸມຄະນະກຳມະການຮ່ວມມື ລາວ-ໄທ ຄັ້ງທີ 23 ຊຶ່ງກໍານົດຈະຈັດຂຶ້ນໃນຕົ້ນເດືອນຕຸລາ 2026.
ສໍາລັບການພົບປະກັບທ່ານ ເບັນດີໂຕ ໂດຣ ຊານໂຕຣ ຟຣີອີຕັດ ລັດຖະມົນຕີກະຊວງການຕ່າງປະເທດ ແລະ ການຮ່ວມມືແຫ່ງ ສາທາລະນະລັດ ປະຊາທິປະໄຕ ຕີມໍແລັສເຕ ສອງຝ່າຍໄດ້ປຶກສາຫາລືກ່ຽວກັບການຂະຫຍາຍການຮ່ວມມືສອງຝ່າຍ, ໂດຍສະເພາະຄວາມຄືບໜ້າໃນການສ້າງຕັ້ງສະຖານທູດ ສປປ ລາວ ທີ່ເມືອງດີລີ. ທັງສອງຝ່າຍຍັງໄດ້ແລກປ່ຽນຄວາມຄິດເຫັນກ່ຽວກັບການສົ່ງເສີມການຮ່ວມມືຊຶ່ງກັນ ແລະ ກັນ ໃນຂອບຫຼາຍຝ່າຍ ທັງໃນລະດັບພາກພື້ນ (ອາຊຽນ) ແລະ ສາກົນ.
ສໍາລັບການພົບປະກັບ ທ່ານ ໂຊກ ໂລເບີ ຮອງປະທານຄະນະກຳມະການກາແດງສາກົນ (ICRC): ສອງຝ່າຍໄດ້ປຶກສາຫາລືກ່ຽວກັບການເພີ່ມທະວີການຮ່ວມມື ໃນການສົ່ງເສີມວຽກງານດ້ານມະນຸດສະທຳສາກົນ. ອົງການICRC ໄດ້ແຈ້ງໃຫ້ຊາບກ່ຽວກັບຂໍ້ລິເລີ່ມສາກົນເພື່ອໃຫ້ຄຳໝາຍໝັ້ນທາງການເມືອງຕໍ່ກົດໝາຍມະນຸດສະທຳສາກົນ (GIHLI)ຊຶ່ງ ສປປ ລາວ ໄດ້ເຂົ້າຮ່ວມໃນເດືອນກໍລະກົດ 2026, ພ້ອມທັງໄດ້ເຊື້ອເຊີນ ສປປ ລາວ ເຂົ້າຮ່ວມກອງປະຊຸມລະດັບສູງດ້ານມະນຸດສະທຳ ຊຶ່ງຈະຈັດຂຶ້ນໃນເດືອນທັນວາ 2026 ຢູ່ປະເທດຊອກດານີ. ຝ່າຍລາວ ໄດ້ສະແດງຄວາມຂອບໃຈ ແລະ ພ້ອມທີ່ຈະສືບຕໍ່ຮັດແໜ້ນການຮ່ວມມືກັບອົງການ ICRC ພາຍໃຕ້ຂອບການຮ່ວມມືດ້ານມະນຸດສະທໍາທີ່ສອງຝ່າຍມີການຕົກລົງຮ່ວມກັນ.
ທ່ານຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດ ໄດ້ຕີລາຄາສູງຕໍ່ການພົບປະແລກປ່ຽນຄວາມຄິດເຫັນໃນຄັ້ງນີ້ວ່າ ເປັນບາດກ້າວອັນສຳຄັນ ເພື່ອສ້າງຄວາມເຂົ້າໃຈ, ຄວາມສາມັກຄີ ແລະ ຊຸກຍູ້ການຮ່ວມມືລະຫວ່າງບັນດາປະເທດ ແລະ ອົງການຈັດຕັ້ງສາກົນ. ພ້ອມດຽວກັນນີ້, ທ່ານຍັງໄດ້ສະແດງຄວາມຂອບໃຈຕໍ່ການຕີລາຄາສູງ ແລະ ການສະໜັບສະໜູນຈາກທຸກຝ່າຍຕໍ່ການເປັນປະທານກອງປະຊຸມຂອງ ສປປ ລາວ ແລະ ສະແດງຄວາມປິຕິຍິນດີເປັນຢ່າງຍິ່ງຕໍ່ການເຂົ້າຮ່ວມຂອງບັນດາປະເທດ ແລະ ອົງການຈັດຕັ້ງສາກົນຕ່າງໆ. ການເຂົ້າຮ່ວມດັ່ງກ່າວ ຍັງໄດ້ສະແດງອອກຢ່າງຈະແຈ້ງເຖິງຄວາມເອົາໃຈໃສ່ ແລະ ຍົກສູງນ້ຳໃຈແຫ່ງການຮ່ວມມືແບບຫຼາຍຝ່າຍ ເພື່ອປະກອບສ່ວນເຂົ້າໃນການປົກປັກຮັກສາສັນຕິພາບ, ຄວາມໝັ້ນຄົງ ແລະ ຄວາມກ້າວໜ້າຂອງມວນມະນຸດ.
ຂ່າວ: ກະຊວງການຕ່າງປະເທດ
ຄໍາເຫັນ