ທ່ານຮອງລັດຖະມົນຕີ ເນັ້ນ ວກປສ ສຸມໃສ່ຈັດຕັ້ງປະຕິບັດວຽກງານໃນຕໍ່ໜ້າໃຫ້ມີຜົນສຳເລັດ

ໃນໂອກາດທີ່ທ່ານ ພົຕ ສຸລິນະ ແກ້ວປະເສີດ ໄດ້ເຄື່ອນໄຫວຢ້ຽມຢາມວິທະຍາຄານການເມືອງ ປກສ ຄັ້ງນີ້, ທ່ານໄດ້ເນັ້ນໜັກໃຫ້ຄະນະພັກ-ຄະນະບັນຊາ ຈະຕ້ອງສຸມໃສ່ຈັດຕັ້ງປະຕິບັດວຽກງານໃນຕໍ່ໜ້າຢ່າງມີຜົນ ສຳເລັດ ໂດຍສະເພາະ ຄະນະພັກ-ຄະນະບັນຊາ ວປກສ ຕ້ອງເປັນແບບຢ່າງຄວາມສາມັກຄີ, ເປັນເອກະພາບພາຍໃນໝູ່ຄະນະ, ມີຄວາມຕັດສິນໃຈສູງຕໍ່ກັບການຕັດສິນບັນຫາທີ່ນອນໃນຄວາມຮັບຜິດຊອບຂອງຕົນ, ຕ້ອງກ້າເຮັດກ້າຮັບຜິດຊອບ ເວລາໃດກໍຕ້ອງຍຶດໝັ້ນຕໍ່ອຸດົມການ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ເປັນຄັນທຸງນຳໜ້າໃນທຸກຂົງເຂດວຽກງານວິຊາສະເພາະ. ຄຽງຄູ່ກັບການເອົາໃຈໃສ່ສຶກສາອົບຮົມການ ເມືອງ-ນຳພາແນວຄິດເປັນກົກ ໃນການກ່ໍສ້າງພັກ-ພະນັກງານໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ພ້ອມທັງສຸມໃສ່ການປະຕິບັດໜ້າທີ່ວຽກງານວິຊາສະເພາະ ກໍຄື ການຮຽນ-ການສອນ, ຕ້ອງມີການສຳຫຼວດກວດກາວັດແທກປະເມີນໃຫ້ຖືກຕ້ອງຕາມຄວາມເປັນຈິງ, ຕ້ອງກ້າຕຳນິສົ່ງຂ່າວ, ຈິງໃຈຊ່ວຍເຫຼືອຊຶ່ງກັນ ແລະ ກັນ.

ພ້ອມກັນນັ້ນ, ກໍຕ້ອງເອົາໃຈໃສ່ອອກແຮງສ້າງພະລາທິການກັບທີ່, ຂົນຂວາຍໝູນໃຊ້ທ່າແຮງບົ່ມຊ້ອນຊອກຫາລາຍຮັບເຂົ້າກົມກອງ ຕາມທິດເພິ່ງຕົນເອງກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ, ຕ້ານແນວຄິດຄອງຄອຍ, ເອື່ອຍອີງໃສ່ແຕ່ການສະໜອງງົບປະມານຂອງຂັ້ນເທິງ, ພ້ອມທັງບົວລະບັດຮັກສາສິ່ງຂອງສ່ວນລວມທີ່ຂັ້ນເທິງປະກອບໃຫ້ ເປັນຕົ້ນ ອາຄານສະຖານທີ່ໃຫ້ມີຄວາມສະອາດຈົບງາມ, ພາຫະນະ, ອາວຸດຍຸດໂທປະກອນ, ອຸປະກອນການຮຽນ-ການສອນບໍ່ໃຫ້ເປ່ເພເສຍຫາຍ ແລະ ມີຄວາມພ້ອມໃຊ້ງານຢູ່ສະເໝີ.

ສຳລັບຫຼັກສູດການຮຽນ-ການສອນ ຕ້ອງໃຫ້ມີຄວາມທັນສະໄໝ, ມີຫຼາຍຮູບຫຼາຍສີ ສາມາດຖ່າຍທອດບົດຮຽນໄດ້ດີ ເມື່ອນັກສຶກສາສຳເລັດການຄົ້ນຄວ້າຮ່ຳຮຽນຈາກວິທະຍາຄານກັບຄືນກົມກອງ ສາມາດໝູນໃຊ້ສອດຫ້ອຍເຂົ້າໃນວຽກງານຕົວຈິງໄດ້ຢ່າງມີປະສິດທິຜົນ, ປະສານສົມທົບ ແລກປ່ຽນຖອດຖອນບົດຮຽນກັບບັນດາສະຖາບັນການສຶກສາທັງພາຍໃນ ແລະ ຕ່າງປະເທດ ໂດຍສະເພາະ ປະເທດເພື່ອນມິດຍຸດທະສາດ

(ສສ ຫວຽດນາມ, ສປ ຈີນ) ເພື່ອນຳເອົາບົດຮຽນມາໝູນໃຊ້ພາຍໃນກົມກອງຂອງຕົນໃຫ້ເກີດຜົນປະໂຫຍດສູງສຸດ ແລະ ກ້າວຂຶ້ນສູ່ແບບແຜນທັນສະໄໝເທື່ອລະກ້າວ. ນອກນັ້ນ, ກໍກຳນົດແຜນງານເປັນໂຄງການອັນລະ ອຽດ, ກຳນົດແຜນການກ່ໍສ້າງພະນັກງານສືບທອດປ່ຽນແທນ ສາມາດສືບທອດຕຳແໜ່ງງານ ແລະ ພາລະໜ້າທີ່ອັນມີກຽດສະຫງ່າທີ່ພັກ-ລັດມອບໝາຍໃຫ້ສຳເລັດ.

ຂ່າວ-ພາບ: ສິດທິພັນ