ທ່ານກິແກ້ວ ໄຂຄໍາພິທູນ ຕ້ອນຮັບຄະນະຜູ້ແທນຫວຽດນາມ

ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີແຫ່ງ ສປປ ລາວ, ໄດ້ຕ້ອນຮັບທ່ານ  ເຈີ່ນ ມິງ ຮຸ່ງ ຮອງຜູ້ອຳນວຍການໃຫຍ່ວິທະຍຸກະຈາຍສຽງຫວຽດນາມ ພ້ອມຄະນະ ເຂົ້າຢ້ຽມຂໍ່ານັບ ໃນຕອນເຊົ້າທີ 30 ມັງກອນນີ້ທີ່ສໍານັກງານນາຍົກລັດຖະມົນຕີ.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ, ໄດ້ສະແດງຄວາມຕ້ອນຮັບຊົມເຊີຍ ແລະ ຕີລາຄາສູງຕໍ່ທ່ານເຈີ່ນ ມິງ ຮຸ່ງ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຊຶ່ງເປັນການປະກອບເພີ່ມພູນຄູນສ້າງຄວາມສາມັກຄີພິເສດ,ການພົວພັນຮ່ວມມືຮອບດ້ານລະຫວ່າງສອງພັກ,ສອງລັດກໍຄືປະຊາຊົນສອງຊາດລາວ-ຫວຽດນາມ ທີ່ມີມາແຕ່ດົນນານແລ້ວນັ້ນໃຫ້ແໜ້ນແຟ້ນຍິ່ງໆຂຶ້ນ, ເວົ້າລວມ, ເວົ້າສະເພາະກໍແມ່ນການພົວພັນຮ່ວມມືທີ່ດີ ລະຫວ່າງວິທະຍຸກະຈາຍສຽງຫວຽດນາມ ແລະວິທະຍຸກະຈາຍສຽງແຫ່ງຊາດລາວໃຫ້ນັບມື້ກ້າວເຂົ້າສູ່ລວງເລິກ.
ຈາກນັ້ນ, ທ່ານ ເຈີ່ນ ມິງ ຮຸ່ງ ຕາງໜ້າໃຫ້ກັບຄະນະ ສະແດງຄວາມຂອບໃຈຕໍ່ທ່ານ ກິແກ້ວ ໄຂຄໍາພິທູນ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ພ້ອມທັງແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃຫ້ກັບທ່ານ ກິແກ້ວ ໄຂຄໍາພິທູນໄດ້ຮັບຊາບອີກດ້ວຍ.
(ຂ່າວ: ແສງຈັນ)