ທ່ານນາຍົກລັດຖະມົນຕີ ຕ້ອນຮັບນັກລົງທຶນ ແລະ ຮັບເງິນຊ່ວຍເຫຼືອແກ້ໄຂໄພພິບັດ

ໃນຕອນບ່າຍ ວັນທີ 2 ຕຸລາ ນີ້ ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງທ່ານ Brin Caffyn, ປະທານບໍລິຫານກຸ່ມບໍລິສັດ UPC Renewables ແລະ ທ່ານ ຄຳສະຫວາດ ບຸນວິໄລ ຜູ້ອຳນວຍການບໍລິສັດ ນາແສງ-ວາໂຍ ລົງທຶນ ແລະ ພັດທະນາພະລັງງານໝູນວຽນ ຈຳກັດ ພ້ອມດ້ວຍຄະນະ.
ໃນໂອກາດນີ້, ທ່ານ ນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ຄະນະ ທັງສອງທີ່ເຂົ້າຢ້ຽມຂໍ່ານັບ ໃນຄັ້ງນີ້ ໂດຍສະເພາະກໍຊົມເຊີຍ ກິດຈະການໄຟຟ້າພະລັງງານລົມ ແລະ ການຄ້າຂາຍໄຟຟ້າ ທີ່ສອງບໍລິສັດດັ່ງກ່າວ ໄດ້ລົງທຶນຢູ່ຫຼາຍປະເທດ ໃນໄລຍະຜ່ານມາ, ລວມທັງ ຄວາມສົນໃຈ ຂອງສອງບໍລິສັດດັ່ງກ່າວ ທີ່ຈະຮ່ວມມືກັນ ລົງທຶນພັດທະນາໂຄງການໄຟຟ້າພະລັງງານລົມ ແລະ ລະບົບສາຍສົ່ງ ຢູ່ ສປປ ລາວ ເຊິ່ງຄາດວ່າ ໃຊ້ເວລາສຶກສາສຳຫຼວດຄວາມເປັນໄປໄດ້ຂອງໂຄງການ ປະມານ 2 ປີ ແລະ ດຳເນີນການກໍ່ສ້າງໂຄງການ ປະມານ 2 ປີ. ພ້ອມກັນນັ້ນ, ທ່ານ ນາຍົກລັດຖະມົນຕີ ຍັງໄດ້ມີຄຳເຫັນແນະນຳ ກ່ຽວກັບ ຂັ້ນຕອນ ກໍ່ຄືນະໂຍບາຍຂອງ ສປປ ລາວ ຕໍ່ຂົງເຂດວຽກງານພະລັງງານ, ລວມທັງ ສິ່ງທີ່ຄວນເອົາໃຈ ໃນການພັດທະນາໂຄງການໄຟຟ້າພະລັງງານລົມ ໂດຍສະເພາະ ດ້ານພື້ນທີ່ ບໍ່ໃຫ້ທັບຊ້ອນກັບໂຄງການອຶ່ນ, ຫຼີກລຽງ ຜົນກະທົບທາງດ້ານສິ່ງແວດລ້ອມ-ສັງຄົມ ແລະ ອຶ່ນໆ.
ໃນໂອກາດດຽວກັນ, ທ່ານ Brin Caffyn ແລະ ທ່ານ ຄຳສະຫວາດ ບຸນວິໄລ ກໍໄດ້ຜັດປ່ຽນກັນມີຄຳເຫັນ ໂດຍສະເພາະ ສະພາບລວມຂອງບໍລິສັດຕົນ, ບົດຮຽນ ແລະ ປະສົບການ ໃນການລົງທຶນດ້ານພະງງານໄຟຟ້າ ໃນໄລຍະຜ່ານມາ, ຄວາມສົນໃຈ ໃນການລົງທຶນ ພັດທະນາໂຄງການໄຟຟ້າພະລັງງານລົມ ແລະ ລະບົບສາຍສົ່ງໄຟຟ້າ ໄປຂາຍຕ່າງປະເທດ ຢູ່ ສປປ ລາວ, ລວມທັງ ຂໍ້ສະເໜີຈຳນວນໜຶ່ງ ເພື່ອອຳນວຍຄວາມສະດວກ ໃຫ້ແກ່ການລົງທຶນພັດທະນາໂຄງການໄຟຟ້າພະລັງງານລົມ ຢູ່ ສປປ ລາວ ປະກົດຜົນເປັນຈິງໂດຍໄວ.
ໃນຕອນທ້າຍ, ບໍລິສັດ ນາແສງ-ວາໂຍ ລົງທຶນ ແລະ ພັດທະນາພະລັງງານໝູນວຽນ ຈຳກັດ ໄດ້ມອບເງິນ ໃຫ້ລັດຖະບານ ຈຳນວນ 1 ຕື້ກີບ ເພື່ອປະກອບສ່ວນເຂົ້າໃນການແກ້ໄຂບັນຫາໄພພິບັດທຳມະຊາດ ຢູ່ສປປ ລາວ ຊຶ່ງກ່າວມອບໂດຍ ທ່ານ ຄຳສະຫວາດ ບຸນວິໄລ ຜູ້ອຳນວຍການບໍລິສັດ ແລະ ໃຫ້ກຽດກ່າວຮັບໂດຍທ່ານ ສອນໄຊ ສີພັນດອນ ນາຍົກລັດຖະມົນຕີ ໂດຍມີຜູ້ຕາງໜ້າຫ້ອງວ່າການສຳນັກງານນາຍົກລັດຖະມົນຕີ, ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ພາກສ່ວນກ່ຽວຂ້ອງ ຮ່ວມເປັນສັກຂິພິຍານ.          ຂ່າວ: ສນຍ, ພາບ: ສຳນານ