ເທດສະການຮູບເງົາດີເດັ່ນ ລາວ-ຈີນ: ຂົວຕໍ່ຮຽນຮູ້ການພັດທະນາຂອງຈີນ ເພື່ອເປັນບົດຮຽນໃຫ້ແກ່ການພັດທະນາຂອງລາວ ໂດຍສະເພາະການແກ້ໄຂຄວາມທຸກຍາກ

ພິເສດ ເນື່ອງໃນໂອກາດປີ 2026 ແມ່ນຄົບຮອບ 65 ປີວັນສ້າງຕັ້ງສາຍພົວພັນທາງການທູດ ລາວ-ຈີນ, ປີມິດຕະພາບລາວ-ຈີນ ແລະ ເທດສະການຮູບເງົາດີເດັ່ນ ລາວ-ຈີນ ຄົບຮອບ 10 ປີ, ກະຊວງວັດທະນະທຳ ແລະ ການທ່ອງທ່ຽວ ແຫ່ງ ສປປ ລາວ ຮ່ວມກັບສະຖານທູດ ສປ ຈີນ ປະຈຳລາວ ແລະ ວິທະຍຸໂທລະພາບສູນກາງຈີນ (CMG) ໄດ້ຮ່ວມກັນຈັດພິທີເປີດງານສັບປະດາຮູບເງົາຈີນພາກພາສາລາວໃນວັນທີ 20 ເມສາ 2026 ທີ່ນະຄອນຫຼວງວຽງຈັນ ໂດຍມີການນຳຂັ້ນສູງຝ່າຍລາວໃຫ້ກຽດເຂົ້າຮ່ວມ ໂດຍທ່ານ ກິແກ້ວ ໄຂຄຳພິທູນ ປະທານສູນກາງແນວລາວສ້າງຊາດ ພ້ອມດ້ວຍການນຳຝ່າຍຈີນ ແລະ ແຂກຖືກເຊີນເຂົ້າຮ່ວມຊົມຮ້ອຍກວ່າທ່ານ.

ໃນພິທີ, ທ່ານ ນາງ ຟາງຫົງເອກອັກຄະລັດຖະທູດ ສປ ຈີນ ປະຈຳ ສປປ ລາວ ກ່າວວ່າ: ຮູບເງົາໃນຖານະເປັນສິລະປະທີ່ລວມເອົາທັງພາບ ແລະ ສຽງໄວ້ນຳກັນ, ມີພະລັງພິເສດທີ່ສາມາດ ເຂົ້າເຖິງຈິດໃຈຂອງຄົນໄດ້ໂດຍກົງ, ທັງເປັນຊ່ອງທາງສຳຄັນໃນການສົ່ງເສີມການເຊື່ອມໂຍງທາງດ້ານວັດທະນະທຳ ແລະ ສ້າງຄວາມໃກ້ຊິດລະຫວ່າງຈິດໃຈຂອງປະຊາຊົນ ຈີນ-ລາວ.ຂະນະດຽວກັນ, ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງວັດທະນະທຳ ແລະ ການທ່ອງທ່ຽວກໍໄດ້ຕີລາຄາສູງຕໍ່ການຈັດງານທີ່ມີຄວາມໝາຍສຳຄັນໃນຄັ້ງນີ້ແມ່ນການສົ່ງເສີມການຮ່ວມມືດ້ານວັດທະນະທຳລະຫວ່າງສອງຊາດໄດ້ກາຍເປັນຂົວຕໍ່ມິດ ຕະພາບທີ່ສຳຄັນຍິ່ງໂດຍຜ່ານການຮັບຊົມຮູບເງົາຈີນທີ່ພາກພາສາລາວ.

ໃນໂອກາດນີ້, ທ່ານນາງ ແສງແກ້ວ ຫົວໜ້າວິທະຍຸໂທລະພາບສູນກາງຈີນ ປະຈຳລາວໄດ້ກ່າວວ່າ: ພວກເຮົາໄດ້ເລີ່ມເຄື່ອນໄຫວ ສາຍຮູບເງົາ ແຕ່ປີ 2017 ມາຮອດປີ 2026 ລວມ 10 ປີ, ໄດ້ເດີນທາງໄປສາຍແຕ່ເໜືອຮອດໃຕ້ສຸດຂອງປະເທດລາວຫຼາຍກວ່າ 100 ຄັ້ງ, ເຮັດໃຫ້ປະຊາຊົນລາວໄດ້ສຳຜັດກັບຄວາມສຸກຂອງຮູບເງົາກາຍ ເປັນກິດຈະກຳວັດທະນະທຳອັນສຳຄັນທີ່ໄດ້ຮັບຄວາມນິຍົມຊົມຊອບ ແລະ ສຽງຕອບຮັບຍ້ອງຍໍຊົມເຊີຍຈາກວົງ ການນຳແຕ່ຂັ້ນສູນກາງຮອດທ້ອງຖິ່ນໃນສັງຄົມລາວ ແລະ ພໍ່ແມ່ປະຊາຊົນລາວ ຢ່າງກວ້າງຂວາງ. ເທດສະການຮູບເງົາດີເດັ່ນ ລາວ-ຈີນ ແມ່ນຂົວຕໍ່ທີ່ສຳຄັນໃນການຮຽນຮູ້, ການພັດທະນາຂອງຈີນ ເພື່ອມາເປັນບົດຮຽນໃຫ້ແກ່ການພັດທະນາຂອງປະເທດລາວ ໂດຍສະເພາະແມ່ນບົດຮຽນໃນການແກ້ໄຂຄວາມທຸກຍາກໃຫ້ປະຊາຊົນ. ດ້ວຍຜົນງານການເຄື່ອນໄຫວເດີນສາຍຮູບເງົາຕະຫຼອດ10 ປີຜ່ານມາ ໂດຍສະເພາະໃນໄລຍະງານສັບປະດາຮູບເງົາຈີນພາກພາສາລາວຫຼາຍພາກສ່ວນກໍໄດ້ມອບໜັງສືຊົມເຊີຍໃຫ້ແກ່ CMG ປະຈຳລາວ ເປັນຕົ້ນແມ່ນສູນກາງແນວລາວສ້າງຊາດ, ກະຊວງວັດ ທະນະທຳ ແລະ ການທ່ອງທ່ຽວ ແລະ ພາກສ່ວນອື່ນໆ.

ທ່ານ ນາງ ແສງແກ້ວ ໄດ້ກ່າວຕື່ມວ່າ: ດ້ວຍບົດຮຽນ, ປະສົບການໃນການເດີນສາຍຮູບເງົາຕະຫຼອດ 10 ປີຜ່ານມາ ບວກກັບຄວາມຮຽກຮ້ອງຕ້ອງການຢາກຊົມຮູບເງົາຂອງພໍ່ແມ່ປະຊາຊົນລາວບັນດາເຜົ່າ, ທີມງານພວກ

ເຮົາຈະສືບຕໍ່ຈັດງານເທດສະ ການສາຍຮູບເງົາດີເດັ່ນ ລາວ-ຈີນ ຕະຫຼອດໄປ.

ສັງລວມແລ້ວ ການຈັດງານ ເທດສະການຮູບເງົາດີເດັ່ນ ລາວ-ຈີນ ບໍ່ແມ່ນຈັດຂຶ້ນໂດຍບັງເອີນ, ແຕ່ຈັດຂຶ້ນຕາມຄວາມຮຽກຮ້ອງຕ້ອງການຂອງສັງຄົມລາວທີ່ຢາກຊົມ ໂດຍສະເພາະໃນເຂດຊົນນະບົດຫ່າງໄກສອກຫຼີກທີ່ຍາກຈະມີໂອກາດໄດ້ຊົມຮູບເງົາ ເຄື່ອນທີ່ຄືແນວນີ້, ພ້ອມນັ້ນ ການຈັດງານຍັງເປັນການສ້າງນັກ ພາກສຽງຮູບເງົາເປັນພາສາລາວຂອງຄົນລາວໃຫ້ກາຍເປັນມືອາຊີບທີ່ມີມາດຕະຖານສູງ, ຄຸນນະພາບສູງຕື່ມອີກ. ພິເສດການຈັດງານເທດສະການສາຍຮູບເງົາດີເດັ່ນລາວ-ຈີນຍັງແມ່ນໜຶ່ງໃນການຈັດຕັ້ງປະຕິບັດວຽກງານພາຍໃຕ້ຂອບການຮວ່ມມືແລກ ປ່ຽນວັດທະນະທຳ ລາວ-ຈີນ, ຈີນ-ລາວ ໃນການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການສ້າງຄູ່ຮ່ວມຊາຕາກຳ ລາວ-ຈີນ ໃຫ້ມີມາດຕະຖານສູງ, ຄຸນນະພາບສູງ ແລະ ລະດັບສູງກວ່າເກົ່າຕາມທິດ 4 ດີຄື: “ບ້ານໃກ້ເຮືອນຄຽງທີ່ດີ, ໝູ່ເພື່ອນທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ” ຢ່າງແທ້ຈິງ.