 |
ທ່ານ ດາວເພັດ ເພັດສີລິແສງ ຮອງເລຂາທິການສະຫະພັນກິລາດອກປີກໄກ່ແຫ່ງຊາດລາວ ທັງເປັນຫົວໜ້າຄະນະນັກກິລາດອກປີກໄກ່ເຍົາວະຊົນທີມຊາດລາວ ໃຫ້ສຳພາດວ່າ: ສຳລັບຜົນງານທີ່ພວກເຮົາສາມາດຍາດໄດ້ 1 ຫຼຽນຄຳ, 3 ຫຼຽນເງິນ ແລະ 8 ຫຼຽນທອງ ຄັ້ງນີ້ ພວກເຮົາຍັງບໍ່ສາມາດເຮັດໄດ້ຕາມເປົ້າໝາຍ ໂດຍພວກເຮົາຕັ້ງໄວ້ກ່ອນໄປແມ່ນ 2 ຫຼຽນຄຳ ແລະ ກໍພາດເປົ້າໝາຍໄປໃນປະເພດຄູ່ຊາຍ ແຕ່ກໍເປັນອັນດີທີ່ທ້າວ ໄຊຍະລາດ ສຸກສະຫວັດ ສາມາດສ້າງປະຫວັດສາດໄຫຼຽນດ້ຄຳ ປະເພດດ່ຽວຊາຍ ສຳລັບສິ່ງທີ່ທ້າທາຍຂອງສະຫະພັນພວກເຮົາ ແມ່ນເລື່ອງງົບປະມານ ເພາະນັກກິລາທີ່ເດີນທາງເຂົ້າຮ່ວມແຂ່ງຂັນຄັ້ງນີ້ ຕ້ອງໄດ້ໃຊ້ງົບປະມານຕົນເອງໃນການເດີນທາງ ສະນັ້ນ ພວກເຮົາກໍຕ້ອງຂໍຂອບໃຈເປັນຢ່າງສູງມາຍັງພໍ່ແມ່ນັກກິລາ ແລະ ນັກກິລານະທີ່ນີ້ດ້ວຍ ເພາະປັດຈຸບັນ ທາງສະຫະພັນກໍໄດ້ມີການວາງແຜນ ໃນການລົງທຶນມະຫາສານ ເພື່ອກຽມຄວາມພ້ອມເປັນເຈົ້າພາບ ໃນການຈັດງານມະຫະກຳກິລາຊີເກມ ໃນປີ 2031 ສະນັ້ນ ຈຶ່ງເຮັດໃຫ້ພວກເຮົາມີງົບປະມານຈຳກັດໃນການສົ່ງນັກກິລາເຂົ້າຮ່ວມ.
ທ່ານ ດາວເພັດ ເພັດສີລິແສງ ໃຫ້ຮູ້ອີກວ່າ: ໃນການເຂົ້າຮ່ວມລາຍການນີ້ ນັກກິລາລາວເຮົາຍັງມີຂໍ້ບົກຜ່ອງຫຼາຍ ສະນັ້ນ ສິ່ງທີ່ຢາກປັບປຸງ ແມ່ນເລື່ອງການຝຶກຊ້ອມຂອງຮ່າງກາຍ ແລະ ແຜນການຕີ ຕ້ອງເລັ່ງປັບປຸງຫຼາຍຈຸດ ຂໍສະແດງຄວາມຊົມເຊີຍມາຍັງສະໂມສອນ ກັບຕັນ ທີ່ໄດ້ຝຶກຊ້ອມນັກກິລາໄດ້ດີຫຼາຍ. ແນວໃດກໍຕາມດີ, ສຳລັບແຜນໃນຕໍ່ໜ້າກໍມີແຜນຈະເຂົ້າຮ່ວມ ງານເອຊຽນເກມ ທີ່ປະເທດຍີ່ປຸ່ນ ທ້າຍເດືອນກັນຍານີ້ ຈະສົ່ງນັກກິລາປະເພດຄູ່ຊາຍ ທ້າວ ນາມບຸນ ຫຼວງອາມາດ ແລະ ທ້າວ ພອນສັກ ໂຊກທະວີ ນອກນັ້ນ ກໍຍັງຈະຮ່ວມແຂ່ງຂັນງານມະຫະກຳວິທະຍາໄລໂລກ ທີ່ປະເທດມາເລເຊຍ ຕື່ມອີກ.
ທ້າວ ໄຊຍະລາດ ສຸກສະຫວັດ ຮູ້ສຶກພາກພູມໃຈຫຼາຍ ທີ່ສາມາດໄດ້ຫຼຽນຄຳ ຖືເປັນການປົດລັອກໃຫ້ກັບຕົນເອງໄດ້ ດ້ວຍການເອົາຊະນະມືວາງອັນດັບ 1 ຂອງລາຍການຈາກມຽນມາ. ແນວໃດກໍຕາມ, ສຳລັບເປົ້າໝາຍຕໍ່ໄປຈະພະຍາຍາມສືບຕໍ່ຝຶກຝົນຕົນເອງໃຫ້ໜັກຂຶ້ນ ເພື່ອຈະພິສິດຄວາມຝັນຄວ້າແຊ້ມດ່ຽວຊາຍ ໃນການແຂ່ງຂັນດອກປີກໄກ່ຊີງແຊັມທົ່ວປະເທດ ຄັ້ງທີ XXV ປະຈຳປີ 2026ທີຈະຈັດຂຶ້ນໃນທ້າຍເດືອນສິງຫານີ້.
ການແຂ່ງຂັນກິລາດອກປີກໄກ່ເຍົາວະຊົນຊີງແຊັມອາຊຽນ ລາຍການ "Southeast Asia Badminton Regional Championships 2026" ທີ່ປະເທດກໍາປູເຈຍ ລະຫວ່າງວັນທີ 15-21 ສິງຫາ 2025 ມີ 7 ປະເທດເຂົ້າຮ່ວມ ປະກອບມີ ຫວຽດນາມ, ລາວ, ມຽນມາ, ບຣູໄນ, ຕີມໍເລດເຕ, ຟີລິບປິນ ແລະ ກໍາປະເຈຍ ພາບ-ຂ່າວ: ສົງການ
ຄໍາເຫັນ