ທນບ ສາຂາຈໍາປາສັກສຸມແຫຼ່ງທຶນໃສ່ຂະແໜງກະສິກໍາ

ໃນ 5 ເດືອນປ່ອຍກູ້ໄດ້ 25,466 ຕື້ກີບ ແລະຕົ້ນເດືອນ 6 ໄດ້ຮັບອະນຸມັດອີກ 12 ຕື້ກີບ ໝາຍຄວາມວ່າ ການປ່ອຍເງິນກູ້ຮອດກາງເດືອນ 6/2025 ໄດ້ທັງໝົດ 37,466 ຕື້ກີບທຽບໃສ່ແຜນການປີປະຕິບັດໄດ້ 23%. ສາມາດເກັບກູ້ໜີ້ສິນໄດ້ທັງໝົດ 51.4 ຕື້ກີບທຽບໃສ່ແຜນປີປະຕິບັດໄດ້ 26.7% (ຕົ້ນທຶນ 36.55 ຕື້ກີບ ແລະດອກເບ້ຍ 14.85 ຕື້ກີບ) ເກັບໜີ້ NPL 21.44 ຕື້ກີບ ທຽບໃສ່ແຜນການປີປະຕິບັດໄດ້ 30% (70 ຕື້ກີບ) ຊຶ່ງຜົນປະກອບການໃນ 6 ເດືອນ ປີ 2025 ສາມາດສ້າງຜົນກໍາໄລໄດ້ 24.72 ຕື້ກີບ.

ການສະໜອງສິນເຊື່ອ ຂອງສາຂາໃນຊຸມປີຜ່ານມາ ແລະປະຈຸບັນ ໄດ້ສຸມໃສ່ຂະແໜງກະສິກໍາ (ການປູກຝັງ ແລະລ້ຽງສັດ) ແລະບໍລິການຈໍານວນໜຶ່ງ ເພື່ອສົ່ງເສີມການຜະລິດເປັນສິນຄ້າສົ່ງອອກ ເປັນຕົ້ນໂຄງການປູກກາເຟ, ຢາງພາລາ, ມັນຕົ້ນ, ນາປີ, ນາ ແຊງ ແລະລ້ຽງສັດໃຫຍ່ (ງົວ, ຄວາຍ); ໃນປີ 2024 ຜ່ານມາໂຄງການ ທີ່ພົ້ນເດັ່ນ ແລະສ້າງລາຍຮັບໃຫ້ກັບສະມາຊິກຜູ້ກູ້ຢືມທຶນໂຄງການປູກກາເຟ ສະເລ່ຍລາຄາ 170 ລ້ານກີບ/ໂຕນ ຮອງລົງມາຢາງພາລາ ແລະນາແຊງ ຕາມລໍາດັບທຸກເປົ້າໝາຍ ມີຕະຫຼາດພາຍໃນ ຮອງຮັບສາມາດສ້າງລາຍຮັບໄດ້ຈໍານວນຫຼາຍ ຄາດຄະເນໃນການປະເມີນໂຄງການຕົວແບບ ແລະຄອບຄົວຕົວແບບຕ້ອງລື່ນແຜນການປີ.

ສ່ວນໂຄງການປູກມັນຕົ້ນ ກໍ່ເຫັນໄດ້ວ່າໃນປີ 2024 ສາຂາປ່ອຍກູ້ທັງໝົດ 84.41 ຕື້ກີບ ໃນເນື້ອທີ່ 5,628 ເຮັກຕາ ມີ 322 ກຸ່ມຜະລິດ, 2,635 ຄອບຄົວ ກວມ 2 ແຂວງ, 14 ເມືອງ, ສາມາດເກັບກູ້ຜົນຜະລິດໄດ້ທັງໝົດ 140,693 ໂຕນ ຄິດເປັນມູນຄ່າ 122.55 ຕື້ກີບ, ຖ້າລົບກັບຕົ້ນທຶນ ທີ່ລົງທຶນໄປສະມາຊິກຍັງມີລາຍຮັບເຫຼືອ 38.14 ຕື້ກີບ ຖືວ່າເປັນລາຍຮັບທີ່ສາມາດມີກໍາໄລໄດ້, ແຕ່ເມື່ອສົມທຽບໃສ່ລາຄາມັນຕົ້ນ ປີ 2023 ເຫັນວ່າລາຍຮັບຫຼຸດລົງເຖິງ 50% ເກີດຈາກປັດໃຈທາງການຕະຫຼາດທີ່ສົ່ງມັນຕົ້ນດິບ, ແຫ້ງໄປສປຈີນຫຼຸດລົງ. ລາຄາຮັບຊື້ພາຍໃນຕົກຕໍ່າ ຖ້າສົມທຽບປີຜ່ານມາ ແຕ່ຂໍ້ດີຍັງມີຜູ້ເກັບຊື້ພາຍໃນປົກກະຕິ ເຮັດໃຫ້ບໍ່ມີຜົນຜະລິດຕົກຄ້າງ ສະມາຊິກຍັງສາມາດຊໍາລະໜີ້ສິນຂອງ ທນບ ໄດ້ເປັນປົກກະຕິທັງຕົ້ນທຶນ ແລະດອກເບ້ຍ.

ທ່ານຫົວໜ້າ ທນບ ສາຂາ ແຂວງຈໍາປາສັກ ຍັງຢືນຢັນ ກ່ຽວກັບການຈັດຕັ້ງປະຕິບັດຕົວຈິງຍັງມີຂໍ້ສະດວກຫຼາຍດ້ານຍ້ອນຄະນະພັກ-ຄະນະອໍານວຍການ ຕະຫຼອດຮອດອໍານາດການປົກຄອງແຕ່ລະຂັ້ນ ມີແນວທາງທີ່ສອດຄ່ອງກັນ ເຮັດໃຫ້ການປະຕິບັດວຽກງານສະດວກສະບາຍ; ມີການເອົາໃຈໃສ່ຊີ້ນໍາຢ່າງໃກ້ຊິດຈາກຂັ້ນເທິງ ຕໍ່ກັບສາຂາຢ່າງສະໝ່ໍ່າສະເໝີ; ບັນດາສະມາຊິກພັກ-ພະນັກງານພາຍໃນສາຂາ ມີຄວາມກະຕືລືລົ້ນ ດຸໝັ້ນ ພ້ອມທັງມີຄວາມສາມັກຄີ ບວກໃສ່ກັບແບບແຜນການນໍາພາ ທີ່ສອດຄ່ອງກັບສະພາບທ້ອງຖິ່ນ ເຮັດໃຫ້ໝາກຜົນຂອງວຽກງານອອກມາໄດ້ຕາມເປົ້າໝາຍທີ່ວາງໄວ້.ຄຽງຄູ່ກັນນັ້ນກໍ່ຍັງມີຂໍ້ຫຍຸ້ງຍາກຈຳນວນໜຶ່ງ ຍ້ອນປັດໄຈເລື່ອງລາຄາຜົນຜະລິດບໍ່ແນ່ນອນ ເຮັດໃຫ້ຄວາມຍືນຍົງ ຂອງໂຄງການບໍ່ໝັ້ນຄົງ; ພາກສ່ວນກ່ຽວຂ້ອງບໍ່ສາມາດສະໜອງປັດໄຈການຜະລິດ ເປັນຕົ້ນແນວພັນທີ່ດີມີຄຸນນະພາບໃຫ້ກັບປະຊາຊົນໄດ້ ຍັງເຮັດຕາມຄວາມເຂົ້າໃຈແບບເກົ່າ ເຮັດໃຫ້ຜົນຜະລິດ ບໍ່ສູງເທົ່າທີ່ຄວນ.

ສ່ວນການສະໜອງສິນເຊື່ອໃນໄລຍະໃໝ່ ສາຂາ ໄດ້ມີມາດຕະການປ້ອງກັນຄວາມສ່ຽງແຕ່ຫົວທີໂລດເຊັ່ນ: ສິນເຊື່ອລາຍກຸ່ມກ່ອນຈະສ້າງແຜນສິນເຊື່ອຂັ້ນບ້ານທຸກໆບ້ານ ພະນັກງານຕ້ອງໄດ້ເຜີຍແຜ່ນະໂຍບາຍສິນເຊື່ອເລກທີ 01/ທຫລ ເຊິ່ງເປັນຄູ່ມືໃນການປະຕິບັດວຽກງານສິນເຊື່ອຂອງ ທນບ ໃນປັດຈຸບັນ ໃຫ້ປະຊາຊົນເຂົ້າໃຈ ຕໍ່ກົດລະບຽບຂອງສິນເຊື່ອ ແລະຄວາມຮັບຜິດຊອບ ຕໍ່ໜີ້ສິນ, ບັນດາຂໍ້ຫ້າມໃນການນໍາໃຊ້ເງິນກູ້, ຖ້າເປັນສິນເຊື່ອ ອກສກ ກໍ່ເຜີຍແຜ່ກົດລະບຽບສິນເຊື່ອເລກທີ 1695/ທນບ ພ້ອມເລີຍ; ໂດຍສ້າງຂໍ້ມູນປະຈັກຕາໃຫ້ຜູ້ເຂົ້າຮ່ວມຮັບຟັງລົງທະບຽນ ເພື່ອກວດກາເບີ່ງລາຍຊື່ຜູ້ສະເໜີກູ້ຢືມໄດ້ເຂົ້າຮ່ວມຮັບຟັງບໍ່ ຖ້າບໍ່ໄດ້ເຂົ້າຈະຕັດຊື່ອອກທັນທີ, ຂັ້ນຕອນນີ້ໄດ້ເຊີນຄະນະກໍາມະການຂັ້ນເມືອງ, ຂັ້ນບ້ານລົງເຮັດວຽກຮ່ວມເລີຍ, ການອະນຸມັດເງິນກູ້ ຕ້ອງຜ່ານຄະນະກໍາມະການຮັບຮອງຂັ້ນບ້ານ ເພື່ອປ້ອງກັນການຖິ້ມຄວາມຮັບຜິດຊອບໃສ່ກັນໃນຕໍ່ໜ້າກໍລະນີເກີດມີບັນຫາຕາມມາ, ການເຜີຍແຜ່ນະໂຍບາຍຕ່າງໆນີ້ ເວລາມີກອງປະຊຸມຄະນະກໍາມະການຂັ້ນແຂວງ, ຂັ້ນເມືອງໄດ້ເຜີຍແຜ່ ເພື່ອໃຫ້ຄະນະກໍາມະການກໍາໄດ້ນະໂຍບາຍສິນເຊື່ອຂອງ ທນບ ເວລາລົງຮາກຖານຊີ້ນໍາກຸ່ມບ້ານ ຈິ່ງສາມາດອະທິບາຍໃຫ້ປະຊາຊົນເຂົ້າໃຈໄດ້ຢ່າງຖືກຕ້ອງ.

ສຳລັບສິນເຊື່ອລາຍບຸກຄົນ, ນິຕິບຸກຄົນ ສາຂາໄດ້ແຕ່ງຕັ້ງຄະນະປະເມີນຫຼັກຊັບ ຂັ້ນສາຂາລົງປະເມີນຮ່ວມກັບໜ່ວຍບໍລິ ການທຸກລາຍ ຖ້າເຫັນວ່າບໍ່ເໝາະສົມ ກໍ່ສາມາດປະຕິເສດກັບທີ່ໄດ້ເລີຍ; ໜ່ວຍບໍລິການ, ຫ້ອງການປະສານງານ ບໍ່ມີສິດປະເມີນຫຼັກຊັບເອງ ແຕ່ມີສິດຮັບຄໍາຮ້ອງຂໍກູ້ຢືມ ແລະສໍາພາດຂໍ້ມູນລູກຄ້າໃນເບື້ອງຕົ້ນ ແລ້ວຈິ່ງສະເໜີຫາສາຂາ ເພື່ອລົງກວດກາໂຄງການ ແລະປະເມີນຫຼັກຊັບຄໍ້າປະກັນ ທັງນີ້ກໍ່ເພື່ອປ້ອງກັນບັນຫາປະເມີນບໍ່ໄປ ຕາມຫຼັກການຂອງສິນເຊື່ອ.

ຜ່ານການນໍາໃຊ້ແບບແຜນການບໍລິຫານ-ຈັດການຄືດັ່ງກ່າວ ສັງເກດເຫັນໄດ້ຈະແຈ້ງວ່າ ການສະໜອງສິນເຊື່ອ ມີຄຸນນະ ພາບ ສາມາດເກັບກູ້ດອກເບ້ຍ ແລະຕົ້ນທຶນໄດ້ ຕາມສັນຍາເປັນປົກກະຕິ ສະມາຊິກຜູ້ກູ້ຢືມນໍາໃຊ້ເງິນກູ້ຖືກຕ້ອງຕາມເປົ້າໝາຍ; ສາມາດສ້າງລາຍຮັບເພີ່ມຂຶ້ນຈາກການຂາຍຜົນຜະລິດ, ຫຼາຍໂຄງການ ຖືກຮັບຮອງເອົາເປັນຕົວແບບ ແລະ ຄອບຄົວຕົວແບບຂອງ ທນບ ໃນແຕ່ລະປີ; ບັນຫາທີ່ສໍາຄັນທີ່ສຸດຄືເຮັດໃຫ້ການຜະລິດຢູ່ຂັ້ນບ້ານເປັນຂະບວນຟົດຟື້ນ ສາມາດສະກັດກັ້ນບັນຫາຫຍໍ້ທໍ້ຮູບແບບຕ່າງໆ ທີ່ເກີດຂຶ້ນກັບວຽກສິນເຊື່ອໄດ້ ເຮັດໃຫ້ການຜະລິດສິນຄ້າອຸປະໂພກ-ບໍລິໂພກຈໍານວນໜຶ່ງສາມາດທົດແທນການນໍາເຂົ້າຂອງເມືອງ, ແຂວງໄດ້ເທື່ອລະກ້າວ ເຮັດໃຫ້ ສາຂາຈໍາປາສັກ ມີສະພາບຄ່ອງທາງການເງິນສາມາດກຸ້ມຕົນເອງ ຕາມແຜນທຸລະກິດປະຈໍາປີດັ່ງທີ່ຕົວເລກໄດ້ລາຍງານມາຂ້າງເທິງ.

(ຂ່າວ: ຣັດສະໝີ ດວງສັດຈະ)