ໂດຍສະເພາະໂທລະພາບຊ່ອງ 5 ເອັມວີລາວ ສະເໜີໃຫ້ອົງກອນຕ່າງໆ ຈົ່ງສືບຕໍ່ພັດທະນາໃຫ້ຄວາມຮ່ວມມືກັບສື່ມວນຊົນຢ່າງໃກ້ຊິດ.
ທ່ານນາງ ອາດີນາ ມະຫາວົງ ປະທານໂທລະພາບຊ່ອງ 5 ເອັມວີລາວ ໄດ້ກ່າວມີຄໍາເຫັນຕໍ່ກອງປະຊຸມສະຫຼຸບວຽກງານ ຖວທ ທົ່ວປະເທດປະຈຳປີ 2024 ແລະ ທິດທາງແຜນການປີ 2025 ໃນວັນທີ 6 ກຸມພາຜ່ານມານີ້ ທີ່ຫໍວັດທະນະທໍາແຫ່ງຊາດວ່າ: ສື່ມວນຊົນມີບົດບາດສໍາຄັນຫຼາຍ ເນື່ອງຈາກ "ສື່ມວນຊົນ ເປັນຜູ້ນໍາສົ່ງຂ່າວສານສະທ້ອນເຖິງຄວາມຈິງ ແລະ ການເຄື່ອນໄຫວຂອງສັງຄົມ. ການປ້ອນຂໍ້ມູນທີ່ຖືກຕ້ອງ ແລະ ການຮ່ວມມືຈາກອົງກອນຕ່າງໆ ຈະເຮັດໃຫ້ວຽກງານສື່ມວນຊົນມີປະສິດທິພາບຫຼາຍຂຶ້ນ". ສິ່ງສໍາຄັນທຸກມື້ນີ້ສື່ມວນຊົນ (ນັກຂ່າວ) ຕ້ອງແຂ່ງຂັນກັບຂ່າວສານອອນລາຍ ທີ່ເຜີຍແຜ່ຢ່າງວ່ອງໄວ ຊຶ່ງມີທັງຂໍ້ມູນຄວາມຈິງ, ບິດເບືອນ ແລະ ຕົວະຍົວະຫຼອກລວງ. ສະນັ້ນ, ສະເໜີໃຫ້ທຸກພາກສ່ວນອົງກອນຕ່າງໆໃຫ້ການຮ່ວມມື, ຮ່ວມສົ່ງເສີມ ແລະ ອໍານວຍຄວາມສະດວກໃຫ້ສື່ມວນຊົນໃນດ້ານຕ່າງໆ, ການເຂົ້າເຖິງຂໍ້ມູນເພື່ອຈະນໍາໄປເຜີຍແຜ່ອອກສູ່ສັງຄົມຮັບຮູ້.
ທ່ານນາງ ອາດີນາ ມະຫາວົງ ຍັງໄດ້ເວົ້າເຖິງຄວາມທ້າທາຍຂອງນັກຂ່າວໃນສັງຄົມດີຈີຕອນ, ພ້ອມເນັ້ນຢໍ້າໃຫ້ທຸກອົງກອນເຂົ້າໃຈ ແລະ ສ້າງຄວາມຮ່ວມມືທີ່ແຂງແຮງຂຶ້ນ. ພ້ອມດຽວກັນນີ້, ຍັງໄດ້ຍົກຄໍາເວົ້າທີ່ວ່າ: "ໄມ້ຄໍ້າກ້ວຍ, ກ້ວຍຄໍ້າໄມ້" ຄືຄໍາເຕືອນໃຈວ່າການຮ່ວມມື ແລະ ຄວາມພະຍາຍາມເປັນປັດໃຈສໍາຄັນທີ່ສຸດ ທຸກສິ່ງທຸກຢ່າງຈະສໍາເລັດໄດ້ເມື່ອພວກເຮົາຮ່ວມແຮງຮ່ວມໃຈກັນ.
ຄໍາເຫັນ