 |
ທ່ານ ໄຊສົມພອນ ພົມວິຫານ ໄດ້ກ່າວວ່າ: ຄະນະກຳມະການເລືອກຕັ້ງລະດັບຊາດ ແລະ ອົງຄະນະພັກ, ອຳນາດການປົກຄອງ ແລະ ຄະນະກຳມະການເລືອກຕັ້ງຂັ້ນຕ່າງໆ ໄດ້ນໍາພາ-ຊີ້ນໍາ ຢ່າງໃກ້ຊິດ ຕໍ່ກັບການກະກຽມ ແລະ ດໍາເນີນການເລືອກຕັ້ງຄັ້ງນີ້ ຊຶ່ງໄດ້ສ້າງເງື່ອນໄຂສະດວກ ແລະ ຮັບປະກັນໃຫ້ແກ່ການເລືອກຕັ້ງດໍາເນີນໄປຢ່າງຖືກຕາມຫຼັກການ ແລະ ຂັ້ນຕອນ ທີ່ໄດ້ກຳນົດໄວ້ໃນກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ, ເຮັດໃຫ້ຜູ້ມີສິດເລືອກຕັ້ງໃນທົ່ວປະເທດ ມີຄວາມຕື່ນຕົວໄປໃຊ້ສິດຂອງຕົນຢ່າງຄົບຖ້ວນ ດ້ວຍບັນຍາກາດເບີກບານມ່ວນຊື່ນ ແລະ ມີຄວາມເປັນລະບຽບຮຽບຮ້ອຍ ແລະ ເຮັດໃຫ້ການເລືອກຕັ້ງຄັ້ງນີ້ ບັນລຸໄດ້ 4 ຄາດໝາຍໃຫຍ່ ຕາມມະຕິ ຂອງກົມການເມືອງສູນກາງພັກວາງອອກ. ຜົນສໍາເລັດດັ່ງກ່າວນັ້ນ ເປັນຂີດໝາຍອັນສໍາຄັນໃນການສືບຕໍ່ປັບປຸງບູລະນະລັດປະຊາທິປະໄຕປະຊາຊົນ ໃຫ້ມີຄວາມເຂັ້ມແຂງ ແລະ ໜັກແໜ້ນ ເຮັດໃຫ້ອໍານາດລັດຂອງພວກເຮົາ ກາຍເປັນລັດຂອງປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ.
ໃນກອງປະຊຸມສະຫຼຸບຖອດຖອນບົດຮຽນ ກ່ຽວກັບການເລືອກຕັ້ງສະມາຊິກສະພາແຫ່ງຊາດຊຸດ ທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ຄັ້ງນີ້, ພວກເຮົາໄດ້ພ້ອມກັນຮັບຟັງການລາຍງານກ່ຽວກັບການກະກຽມ ແລະ ການດໍາເນີນການເລືອກຕັ້ງ, ການປະກອບຄໍາເຫັນຈາກຜູ້ຕາງໜ້າອະນຸກຳມະການຢູ່ສູນກາງ ແລະ ທ້ອງຖິ່ນ ຈໍານວນໜຶ່ງ ແລະ ມີການອະທິບາຍຊີ້ແຈງຕໍ່ຄວາມສົນໃຈ ຊຶ່ງມີເນື້ອໃນຄື: ຮັບຟັງການລາຍງານຂອງຄະນະກຳມະການເລືອກຕັ້ງລະດັບຊາດກ່ຽວກັບສະພາບການກະກຽມ ແລະ ດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນ ຂັ້ນແຂວງ ຊຸດທີ V; ຮັບຟັງການປະກອບຄໍາເຫັນຂອງບັນດາອະນຸກໍາມະການ ຂອງຄະນະກໍາມະການເລືອກຕັ້ງລະດັບຊາດ; ຮັບຟັງການປະກອບຄໍາເຫັນ ຂອງຄະນະກໍາມະການເລືອກຕັ້ງຂັ້ນແຂວງ ຈໍານວນ 8 ແຂວງຄື: ນະຄອນຫຼວງວຽງຈັນ, ແຂວງຜົ້ງສາລີ, ໄຊຍະບູລີ, ຫົວພັນ, ສະຫວັນນະເຂດ, ຈໍາປາສັກ, ເຊກອງ ແລະ ແຂວງໄຊສົມບູນ.
ທ່ານ ໄຊສົມພອນ ພົມວິຫານ ຍັງໄດ້ກ່າວອີກວ່າ: ບັນດາເນື້ອໃນທີ່ກອງປະຊຸມຂອງພວກເຮົາໄດ້ນໍາມາພິຈາລະນາໃນຄັ້ງນີ້ ແມ່ນມີຄວາມສໍາຄັນຫຼາຍ. ສະນັ້ນ, ຈຶ່ງສະເໜີໃຫ້ຜູ້ແທນກອງປະຊຸມ ຈົ່ງໄດ້ຍົກສູງຄວາມຮັບຜິດຊອບການເມືອງຂອງຕົນ ເຂົ້າໃນການຄົ້ນຄວ້າ ແລະ ປະກອບຄວາມເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີ, ຂໍ້ຄົງຄ້າງ ກໍຄືບັນດາສາເຫດທີ່ພາໃຫ້ມີດ້ານດີ, ຂໍ້ຄົງຄ້າງ ແລະ ບົດ ຮຽນທີ່ຖອດຖອນໄດ້ ພ້ອມທັງສະເໜີມາດຕະການ ແລະ ວິທີການແກ້ໄຂ ເພື່ອເປັນບົດຮຽນທີ່ດີໃຫ້ແກ່ການກະກຽມການເລືອກຕັ້ງໃນຊຸດຕໍ່ໄປ.
(ຂ່າວ: ສົມຫວັງ; ແຫຼ່ງຂ່າວ: ຂປລ;)
ຄໍາເຫັນ