ວັນທີ 20 ກຸມພາ ຜ່ານມາ ທີ່ຫ້ອງການບ້ານໜອງບົກ ເມືອງໜອງບົກ ແຂວງຄໍາມ່ວນ, ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຄໍາມ່ວນ ໄດ້ມອບຊຸດເຄື່ອງນຸ່ງປະຈໍາເຜົ່າ ຊຶ່ງປະກອບມີ: ເສື້ອດຳໝໍ້, ຜ້າສະໂລ່ງ, ຜ້າພັນແອວ ຈໍານວນ 15 ຊຸດ ແລະ ເງິນຊຸກຢູ້ການສະແດງສິລະປະ ລວມມູນຄ່າ 4 ລ້ານກວ່າກີບ ໃຫ້ແກ່ບ້ານໜອງບົກ. ຕາງໜ້າຮັບໂດຍທ່ານ ລຳພອນ ພົມມະວົງ ນາຍບ້ານໜອງບົກ, ມີຄະນະຫ້ອງການ ຖວທ ເມືອງ ແລະ ພໍ່ແມ່ປະຊາຊົນພາຍໃນບ້ານເຂົ້າຮ່ວມ.
ໂອກາດນີ້, ທ່ານຫົວໜ້າພະແນກ ຖວທ ແຂວງຍັງໄດ້ຮຽກຮ້ອງມາຍັງຂະແໜງການກ່ຽວຂ້ອງຂັ້ນເມືອງ ແລະ ອຳນາດການປົກຄອງບ້ານ ໃຫ້ເອົາໃຈໃສ່ໃນການຄຸ້ມຄອງທາງດ້ານວຽກງານສິລະປະ-ວັນນະຄະດີ ພາຍໃນເມືອງ, ສືບຕໍ່ຊຸກຍູ້, ສົ່ງເສີມວຽກງານດ້ານວັດທະນະທຳ, ຮີດຄອງປະເພນີຂອງທ້ອງຖິ່ນໃຫ້ແຂງແຮງຂຶ້ນກວ່າເກົ່າ, ມີການຄົ້ນຄວ້າ ແລະ ຈັດກິດຈະກຳທາງດ້ານວັດທະນະທຳ, ຮີດຄອງປະເພນີ ໃຫ້ຕິດພັນກັບການທ່ອງທ່ຽວ ທີ່ມີຫຼາກຫຼາຍສີສັນ ເພື່ອສ້າງການດຶງດູດນັກທ່ອງທ່ຽວ ໃຫ້ເຂົ້າມາທ່ຽວພາຍໃນເມືອງນັບມື້ຫຼາຍຂຶ້ນ ເພື່ອເປັນການປະກອບສ່ວນສ້າງລາຍຮັບ, ສ້າງວຽກເຮັດງານທຳໃຫ້ພໍ່ແມ່ປະຊາຊົນ.
(ຂ່າວ-ພາບ: ກອງຄໍາ)
ຄໍາເຫັນ