ພະນັກງານຫຼັກແຫຼ່ງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງສາລະວັນ ໄດ້ຮັບຟັງການເຜີຍແຜ່ເຊື່ອມຊຶມ 4 ເອກະສານສຳຄັນຂອງພັກຂອງຊາດຂຶ້ນໃນວັນທີ 26 ກັນຍາ ນີ້ ທີ່ພະແນກດັ່ງກ່າວ ໂດຍການໃຫ້ກຽດເຜີຍແຜ່ຂອງ ທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງ, ມີຄະນະພະແນກ, ຫົວໜ້າ-ຮອງຂະແໜງກ່ຽວຂ້ອງເຂົ້າຮ່ວມ.
ພາຍຫຼັງ ທ່ານ ມະໄລວອນ ສີປະເສີດ ໄດ້ໃຫ້ກຽດເຜີຍແຜ່ມະຕິກອງປະຊຸມຄົບຄະນະບໍລິຫານງານພັກແຂວງສາລະວັນ ເປີດກວ້າງຄັ້ງທີ XI ສະໄໝທີ IX ໄລຍະ 6 ເດືອນຕົ້ນປີ 2023 ຜ່ານມາ ແລະ ທິດທາງ ແຜນການຕໍ່ໜ້າ. ຈາກນັ້ນ,ທ່ານ ຄຳໄພ ໄຊຍະເດດ ຮອງຫົວໜ້າພະແນກ ຖວທ ແຂວງໄດ້ເຜີຍແຜ່ມະຕິກອງປະຊຸມອົງການປົກຄອງແຂວງສາລະວັນ ເປີດກວ້າງຄັ້ງທີ IX ຊຸດທີ IX ຊຶ່ງກອງປະຊຸມໄດ້ເຫັນດີຮັບຮອງເອົາບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2023 ແລະ ການແກ້ໄຂຄວາມທຸກຍາກທາງດ້ານເສດຖະກິດ-ການເງິນ, ຮັບຮອງເອົາທິດທາງ ແລະ ແຜນວຽກງານຈຸດສຸມ 2023, ສືບຕໍ່ຮັບປະກັນຄວາມມີສະຖຽນລະພາບທາງດ້ານການເມືອງ, ຮັບປະກັນໃຫ້ເສດຖະ ກິດມີການຂະຫຍາຍຕົວຕໍ່ເນື່ອງ, ສຸມໃສ່ແກ້ໄຂບັນດາຄາດໝາຍຂົງເຂດສາທາລະນະສຸກ, ຝຶກສີມືແຮງງານໃນສາຂາວິຊາຊີບຕ່າງໆ, ຂົງເຂດວຽກງານຖະແຫຼງຂ່າວແມ່ນສືບຕໍ່ສຸມໃສ່ໃນການໂຄສະນາ, ສົ່ງເສີມການທ່ອງທ່ຽວດ້ວຍຫຼາຍຮູບແບບ ເພື່ອເຮັດໃຫ້ບັນຍາກາດການທ່ອງທ່ຽວດີຂຶ້ນ, ດຶງດູດນັກທ່ອງທ່ຽວພາຍໃນ ແລະ ຕ່າງປະ ເທດໃຫ້ຫຼາຍກວ່າ 85.602 ເທື່ອຄົນ, ຄາດຄະເນລາຍຮັບຈາກການທ່ອງທ່ຽວໃຫ້ໄດ້ປະມານ 7 ລ້ານກວ່າໂດລາ, ສ້າງປະຕິທິນທ່ອງທ່ຽວຂອງບັນດາເມືອງ, ກະກຽມຄວາມພ້ອມໃນການເປີດປີທ່ອງທ່ຽວລາວ 2024. ໃນພິທີໄດ້ເຜີຍແຜ່ແຈ້ງການໆຊົມໃຊ້ໄຟຟ້າໃຫ້ມີຄວາມປອດໄພ, ປະຢັດພະລັງງານ ແລະ ການຊໍາລະຄ່າກະແສໄຟຟ້າຕື່ມອີກ. ກອງປະຊຸມຄັ້ງນີ້, ຈັດຂຶ້ນເພື່ອສ້າງຄວາມຮັບຮູ້-ເຂົ້າໃຈໃຫ້ພະນັກງານຫຼັກແຫຼ່ງ, ພະນັກງານລັດຖະກອນ ເປັນເຈົ້າການນຳເອົາເນື້ອໃນຈິດໃຈຄັ້ງນີ້ ໄປຜັນຂະຫຍາຍເຂົ້າໃນວຽກງານຕົວຈິງໃຫ້ເກີດຜົນປະໂຫດສູງສຸດ.
ຂ່າວ: ລັດຕະນາ
ຄໍາເຫັນ