ເພື່ອເປັນການເຊີດຊູກຽດສັກສີ ແລະ ເຫັນໄດ້ຄວາມສຳຄັນຂອງວິລະຊົນແຮງງານແຫ່ງຊາດໜຶ່ງດຽວຂອງສປປລາວ, ໃນວັນທີ 25 ຕຸລາຜ່ານມາ, ທ່ານ ໂພສີ ສ້ອຍກຸທິລາດ ຫົວໜ້າພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວ (ຖວທ) ແຂວງສະຫວັນນະເຂດ ພ້ອມດ້ວຍນັກປະພັນເພງຊື່ດັງ (ອາຈານດອກເພັກແດນຈຳພອນ) ແລະ ນັກຮ້ອງທີ່ມີຊື່ສຽງ (ລັ່ງແສງອຳພອນ) ພ້ອມດ້ວຍຂະແໜງການທີ່ກ່ຽວຂ້ອງໄດ້ນຳເອົາເພງທີ່ມີຊື່ວ່າ: ‘ວິລະຊົນແຮງງານຕົວຈິງ” ມອບໃຫ້ແກ່ທ່ານ ເກຍ ອູ໊ສິດທິເດດ ວິລະຊົນແຮງງານແຫ່ງຊາດ ທັງເປັນເຈົ້າຂອງໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳຢ່າງເປັນທາງການ.
ໃນໂອກາດດັ່ງກ່າວ, ທ່ານ ທັດ ສີຫາວົງ ຮອງຫົວໜ້າຫ້ອງການບໍລິຫານພະແນກ ຖວທ ແຂວງໄດ້ຜ່ານຂໍ້ຕົກລົງຂອງທ່ານຫົວໜ້າພະແນກ ຖວທ ແຂວງ ວ່າດ້ວຍການອະນຸຍາດນຳໃຊ້ເພງ ‘ວິລະຊົນແຮງງານຕົວຈິງ’ ແລະ ມອບລິຂະສິດເພງດັ່ງກ່າວໃຫ້ຄອບຄົວທ່ານ ເກຍ ອູ໊ສິດທິເດດ ເພື່ອເປັນການເຜີຍແຜ່ຜົນງານອັນໂດດເດັ່ນຂອງວິລະຊົນແຮງງານຄົນທຳອິດຂອງ ສປປລາວ ອອກສູ່ສັງຄົມຢ່າງກວ້າງຂວາງ ໂດຍຜ່ານສື່ຕ່າງໆຢ່າງຖືກຕ້ອງຕາມລະບຽບກົດໝາຍ ພ້ອມນັ້ນພະແນກ ຖວທ ແຂວງ ຍັງໄດ້ມອບໃບສັນລະເສີນໃຫ້ແກ່ທ່ານ ເກຍ ອູ໊ສິດທິເດດ ທີ່ໄດ້ປະກອບສ່ວນວຽກງານເຂົ້າໃນການພັດທະນາວຽກງານ ຖວທ ຢ່າງຮອບດ້ານຕື່ມອີກ.
ທ່ານ ໂພສີ ສ້ອຍກຸທິລາດ ໄດ້ກ່າວມີຄຳເຫັນ ແລະ ສະແດງຄວາມຂອບໃຈມາຍັງທ່ານ ເກຍ ອູ໊ສິດທິເດດ ທີ່ມີນໍ້ໃຈເສຍສະຫຼະ ປະກອບສ່ວນເຂົ້າໃສ່ການພັດທະນາປະເທດຊາດ ໂດຍສະເພາະການແກ້ໄຂຄວາມທຸກຍາກຂອງປະຊາຊົນຢູ່ແຂວງສະຫວັນນະເຂດ ກໍຄືການປະກອບສ່ວນຊ່ວຍເຫຼືອສັງຄົມດ້ວຍຄວາມສະໝັກໃຈ.
ໂອກາດນີ້, ທ່ານ ເກຍ ອູ໊ສິດທິເດດ ໄດ້ສະແດງຄວາມຂອບໃຈຕໍ່ທ່ານ ໂພສີ ສ້ອຍກຸທິລາດ ແລະ ທ່ານ ຄຳສິດ ພົມມະຈັນ ອາຈານຜູ້ແຕ່ງເພງ, ທ່ານ ລັ່ງ ແສງອຳພອນ ນັກຮ້ອງເພງ ພ້ອມດ້ວຍການຈັດຕັ້ງທຸກພາກສ່ວນທີ່ໄດ້ເອົາໃຈໃສ່ເຫັນໄດ້ເຖິງຜົນງານຂອງຂ້າພະເຈົ້າ ປະດິດແຕ່ງເພງອອກມາເພື່ອໂຄສະນາຜົນ
ງານໃຫ້ສັງຄົມໄດ້ຮັບຮູ້, ການໄດ້ຮັບນາມມະຍົດ ຍ້ອນການຊຸກຍູ້ຂອງສັງຄົມ ແລະ ການປະກອບສ່ວນຂອງ ທຸກໆພາກສ່ວນ ລວມໄປເຖິງປະຊາຊົນໃນແຕ່ລະທ້ອງຖິ່ນ ກໍຄືປະຊາຊົນໃນ 2 ໂຄງການຄື: ການແກ້ໄຂລຶບ ລ້າງຄວາມທຸກຍາກຂອງປະຊາຊົນບ້ານຄໍາປ່າແໜ ເມືອງຊົນນະບູລີ, ບ້ານປ່າກ້ວຍ ເມືອງຈຳພອນ, ບ້ານຕະ ຍົງ ແລະ ບ້ານປະແນະ ຈຸດສຸມຕັງອາໄລ-ລະແບງ ເມືອງນອງ ແຂວງສະຫວັນນະເຂດ, ຕະຫຼອດໄລຍະ 5 ປີ (2016-2021) ເປັນໂອກາດດີທີ່ປະເທດຊາດ ກໍຄືແຂວງສະຫວັນະເຂດໃນເວລານັ້ນ ໄດ້ເປີດຂະບວນການແຂ່ງ ຂັນຮັກຊາດ ແລະ ພັດທະນາ, ໃນປີ 2015 ຂ້າພະເຈົ້າຈຶ່ງໄດ້ຮັບນາມມະຍົດເປັນນັກພັດທະນາດີເດັ່ນ ແລະ ໄດ້ຮັບຫຼຽນນາມມະຍົດວິລະຊົນແຮງງານແຫ່ງຊາດລາວໃນໄລຍະປີຕໍ່ມາ. ໃນພິທີທ່ານຍັງໄດ້ມອບປື້ມບອກເລົ່າ ປະສົບການໂດຍຫຍໍ້ກ່ອນຈະມີວັນນີ້ຂອງທ່ານ ເກຍ ອູ໊ສິດທິເດດ ໃຫ້ພະແນກ ຖວທ ແຂວງນຳອີກ.
ຂ່າວ: ສະຫວັນນະເຂດ
ຄໍາເຫັນ