ຖວທ ເຊກອງ ເຜີຍແຜ່ເອກະສານກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ

ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງເຊກອງ ໄດ້ຈັດກອງປະຊຸມເຜີຍແຜ່ເອກະສານການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກຂຶ້ນໃນວັນທີ 20 ພະຈິກຜ່ານມາ, ໂດຍການເປັນປະທານຂອງສະຫາຍ ບຸນທົງ ຖິ່ນດອນໂຂງ ປະທານກວດກາຄະນະພັກຮາກຖານ ຮັກສາການຫົວໜ້າພະແນກ ຖວທ ແຂວງ, ມີຄະນະພັກຮາກຖານ, ຄະນະໜ່ວຍພັກ, ສະມາຊິກພັກ-ພະນັກງານນໍາພາຫຼັກແຫຼ່ງເຂົ້າຮ່ວມ. 
    ກອງປະຊຸມຄັ້ງນີ້ຈັດຂຶ້ນເພື່ອສ້າງຄວາມຮັບຮູ້-ເຂົ້າໃຈ, ມີຄວາມເປັນເອກະພາບ ແລະ ຈັດຕັ້ງປະຕິບັດການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກໃຫ້ຖືກຕ້ອງສອດຄ່ອງມີປະສິດທິພາບ, ປະສິດທິຜົນ.
    ໂອກາດນີ້, ກອງປະຊຸມໄດ້ຮັບການເຜີຍແຜ່ຄໍາສັ່ງຂອງຄະນະປະຈໍາພັກແຂວງ ສະບັບເລກທີ 16/ຄປພຂ, ລົງວັນທີ 18 ກັນຍາ 2023 ວ່າດ້ວຍການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ; ຄໍາແນະນໍາຂອງຄະນະຈັດຕັ້ງແຂວງສະບັບເລກທີ 60/ຄຈຂ.ຊກ, ລົງວັນທີ 18 ກັນຍາ 2023 ວ່າດ້ວຍການຈັດຕັ້ງຜັນຂະຫຍາຍຄໍາສັ່ງຂອງຄະນະປະຈໍາພັກແຂວງກ່ຽວກັບການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ໂດຍສະເພາະຂັ້ນຕອນການກະກຽມດ້ານຂະບວນການ, ດ້ານເນື້ອໃນລາຍງານການເມືອງ, ແຜນພັດທະນາເສດຖະກິດ-ສັງຄົມຫຼື ແຜນພັດທະນາຂະແໜງການ, ດ້ານບຸກຄະລາກອນ, ການດຳເນີນຊີວິດການເມືອງທ້າຍສະໄໝ, ການເລືອກເຟັ້ນບຸກຄະລາກອນ, ການກໍານົດຈໍານວນຄະນະບໍລິຫານງານພັກຫຼືຄະນະພັກແຕ່ລະຂັ້ນ, ການກໍານົດຄະນະປະຈໍາພັກການກະກຽມຜູ້ແທນສົມບູນ-ສໍາຮອງ, ເງື່ອນໄຂ, ຂໍ້ຫ້າມ ແລະ ການສິ້ນສຸດການເປັນຜູ້ແທນສົມບູນ-ສໍາຮອງ ແລະ ໄລຍະເວລາດຳເນີນກອງປະຊຸມໃຫຍ່ຄະນະພັກແຕ່ລະຂັ້ນ.
    ໂອກາດນີ້,ສະຫາຍ ບຸນທົງ ຖິ່ນດອນໂຂງ ໄດ້ເນັ້ນໜັກໃຫ້ຄະນະພັກຮາກຖານ, ຄະນະໜ່ວຍພັກ, ພະນັກງານນໍາພາຫຼັກແຫຼ່ງຈົ່ງສືບຕໍ່ຄົ້ນຄວ້າເຊື່ອມຊຶມ, ກໍາແໜ້ນເນື້ອໃນຈິດໃຈ ແລະ ຈັດຕັ້ງປະຕິບັດ, ຜັນຂະຫຍາຍອອກມະຕິຕົກລົງແຕ່ງຕັ້ງຄະນະຮັບຜິດຊອບລວມ, ອະນຸກຳມະການຊ່ວຍວຽກກະກຽມດຳເນີນກອງປະຊຸມໃຫຍ່ຂັ້ນຂອງຕົນ, ປຸກລະດົມຂະບວນການ, ກະກຽມຮ່າງລາຍງານການເມືອງ, ບົດສໍາຫຼວດການນໍາພາລວມ ແລະ ແຜນພັດທະນາຂະແໜງການຂອງຄະນະພັກ-ຄະນະໜ່ວຍພັກ, ຄົ້ນຄວ້າຂຶ້ນແຜນງົບປະມານ ແລະ ສ້າງແຜນການລະອຽດໃນການກະກຽມ ແລະ ດຳເນີນກອງປະຊຸມໃຫຍ່ໃຫ້ທັນຕາມເວລາທີ່ກຳນົດໄວ້.
ຂ່າວ-ພາບ: ສັນຍາ