ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ບໍລິສັດວີຊາ ອິງ ຊຶ່ງເປັນຜູ້ໃຫ້ບໍລິການຊຳລະເງິນລະດັບໂລກຈາກອາເມຣິກາ ໄດ້ເປີດເຜີຍບົດລາຍງານໂດຍລະບຸວ່າ: ກຳໄລໃນໄຕມາດທີ 4 ຂອງສົກປີງົບປະມານ 2022-2023 ສູງກວ່າທີ່ມີການຄາດຄະເນໄວ້ ເນື່ອງຈາກຜູ້ບໍລິໂພກຍັງຄົງໃຊ້ບັດເຄຣດິດໃນການໃຊ້ຈ່າຍໃນການເດີນທາງ ແລະ ຮັບປະທານອາຫານນອກບ້ານ.
ບົດລາຍງານລະບຸວ່າ: ກຳໄລໃນໄຕມາດທີ 4 ຂອງສົກປີງົບປະມານ 2022-2023 ສູງກວ່າທີ່ມີການຄາດຄະເນໄວ້ ເນື່ອງຈາກຜູ້ບໍລິໂພກຍັງຄົງໃຊ້ບັດເຄຣດິດໃນການໃຊ້ຈ່າຍດ້ານການເດີນທາງ ແລະ ຮັບປະທານອາຫານນອກບ້ານ ເຖິງແມ່ນວ່າຈະປະເຊີນກັບບັນຫາເງິນເຟີ້ ແລະ ວິກິດຄ່າຄອງຊີບສົ່ງຜົນໃຫ້ຫຸ້ນວີຊາເພີ່ມຂຶ້ນເກືອບ 3% ໃນການຊື້-ຂາຍ ນອກເວລາການເຮັດວຽກປົກກະຕິ. ການໃຊ້ຈ່າຍຂອງຜູ້ບໍລິໂພກທີ່ຮັ່ງມີ ແລະ ການເດີນທາງທີ່ຟື້ນຕົວ ຫຼັງຜ່ານພົ້ນວິກິດຈາກການແຜ່ລະບາດຂອງພະຍາດໂຄວິດ-19 ຊ່ວຍປ້ອງກັນບໍ່ໃຫ້ກຸ່ມບັດເຄຣດິດລາຍໃຫຍ່ຂອງອາເມຣິກາໄດ້ຮັບຜົນກະທົບຈາກຄວາມບໍ່ແນ່ນອນທາງດ້ານເສດຖະກິດ. ວີຊາ ອິງ ລະບຸວ່າ: ປະລິມານການຊຳລະເງິນເພີ່ມຂຶ້ນ 9% ໃນໄຕມາດທີ 4 ຂອງສົກປີ 2022-2023 ຂະນະທີ່ປະລິມານການຊຳລະເງິນຂ້າມຊາຍແດນ ຊຶ່ງບໍ່ນັບລວມການເຮັດທຸລະກຳພາຍໃນເອີຣົບທີ່ຂັບເຄື່ອນລາຍໄດ້ຈາກການເຮັດທຸລະກຳສາກົນປັບຕົວເພີ່ມຂຶ້ນ 18%. ເຖິງແມ່ນວ່າລາຄາສິນຄ້າທຸກຊະນິດຕັ້ງແຕ່ສິນຄ້າອຸປະໂພກບໍລິໂພກໄປຈົນເຖິງໄຟຟ້າທີ່ເພີ່ມສູງຂຶ້ນໄດ້ເລີ່ມສົ່ງຜົນກະທົບຕໍ່ງົບປະມານຂອງພາກຄົວເຮືອນ ໂດຍສະເພາະກຸ່ມຄົນທີ່ມີລາຍໄດ້ນ້ອຍ ແຕ່ການໃຊ້ຈ່າຍຜູ້ບໍລິໂພກຍັງຄົງແຂງແຮງ ສ່ວນທາງດ້ານເສດຖະກິດເລີ່ມມີການຫຼຸດລົງ. ວີຊາ ອິງ ລະບຸວ່າ: ລາຍໄດ້ສຸດທິເພີ່ມຂຶ້ນ 11% ສູ່ລະດັບ 8,6 ພັນລ້ານໂດລາ ໃນໄຕມາດທີ 4 ຂອງສົກປີງົບປະມານ 2022-2023. ຂະນະທີ່ກຳໄລຢູ່ທີ່ 2,33 ໂດລາຕໍ່ຫຸ້ນໃນໄຕມາດທີ 4 ຂອງສົກປີງົບປະມານ 2022-2023 ຊຶ່ງສູງກວ່າທີ່ນັກວິເຄາະໄດ້ຄາດຄະເນໄວ້ໂດຍສະເລ່ຍຢູ່ທີ່ 2,24 ໂດລາຕໍ່ຫຸ້ນ.
ສຳລັບໝົດສົກປີ 2022-2023 ວີຊາ ອິງ ໄດ້ເປີດເຜີຍບົດລາຍງານກຳໄລ ຢູ່ທີ່ 8,77 ໂດລາຕໍ່ຫຸ້ນ ຊຶ່ງສູງກວ່າການຄາດຄະເນຂອງນັກວິເຄາະ ທາງດ້ານລາຍໄດ້ຕະຫຼອດທັງໝົດສົກປີງົບປະມານ 2022-2023 ເພີ່ມຂຶ້ນ 11% ສູ່ລະດັບ 3,27 ໝື່ນລ້ານໂດລາ.
ຄໍາເຫັນ