ທູດລາວ ປະຈຳ ຫວຽດນາມ ເຂົ້າຢ້ຽມຂ່ຳນັບ ເລຂາຄະນະພັກນະຄອນຫຼວງຮ່າໂນ້ຍ

ສະຫາຍ ນາງ ຄຳເພົາ ເອີນທະວັນ    ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະ  ໄດ້ເຂົ້າຢ້ຽມຂ່ຳນັບ ແລະ ພົບປະ ກັບ ສະຫາຍ ດິງ ຕຽນ ຢຸງ ກຳມະການກົມການເມືອງ ເລຂາຄະນະພັກນະຄອນຫຼວງຮ່າໂນ້ຍ ເມື່ອບໍ່ດົນມານີ້ ທີ່ ນະຄອນຫຼວງຮ່າໂນ້ຍ, ໃນໂອກາດທີ່ສະຫາຍໄດ້ດໍາລົງຕໍາແໜ່ງເປັນເອກອັກຄະລັດຖະທູດລາວຄົນໃໝ່ປະຈໍາຫວຽດນາມ.
    ໃນໂອກາດນີ້, ສະຫາຍ ນາງ ຄຳເພົາ ເອີນທະວັນ ໄດ້ນຳເອົາຄຳຢື້ຢາມຖາມຂ່າວ ແລະ ຄຳອວຍພອນໄຊອັນປະເສີດ ຈາກສະຫາຍເລຂາພັກນະຄອນຫຼວງວຽງຈັນ ກໍຄືການນຳທຸກຂັ້ນຂອງ ສປປ ລາວ ມາຍັງ ສະຫາຍ ດິງ ຕຽນ ຢຸງ ພ້ອມດ້ວຍການນຳຂັ້ນສູງຂອງຫວຽດນາມ. ພ້ອມທັງໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ສະໜິດສະໜົມຂອງສະຫາຍເລຂາຄະນະພັກນະຄອນຫຼວງຮ່າໂນ້ຍ ແລະ ສະແດງຄວາມຮູ້ສຶກປິຕິຍິນດີເປັນຢ່າງຍິ່ງຕໍ່ຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມໃນໄລຍະຜ່ານມາ ຊຶ່ງສາມາດນຳພາປະເທດຊາດຫວຽດນາມ ເວົ້າລວມ, ເວົ້າສະເພາະແມ່ນນະຄອນຫຼວງຮ່າໂນ້ຍ ໄດ້ຮັບການພັດທະນາຢ່າງວ່ອງໄວ ແລະ ກ້າວກະໂດດ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນເຫັນໄດ້ຢ່າງຈະແຈ້ງ. ສະຫາຍ ນາງ ຄຳເພົາ ເອີນທະວັນ ໄດ້ຕີລາຄາສູງຕໍ່ຜົນສຳເລັດການເຄື່ອນໄຫວວຽກງານຕ່າງປະເທດຂອງຫວຽດນາມ ໂດຍສະເພາະແມ່ນນະຄອນຫຼວງຮ່າໂນ້ຍ ໄດ້ມີການເຄື່ອນໄຫວຢ່າງຫຼວງຫຼາຍຂອງບັນດາການນຳຫວຽດນາມ ໄດ້ເຄື່ອນໄຫວເຂົ້າຮ່ວມກອງປະຊຸມສາກົນໃນລະດັບສອງຝ່າຍ ແລະ ຫຼາຍຝ່າຍໃນໄລຍະຜ່ານມາ. ພ້ອມທັງໄດ້ຕ້ອນຮັບການມາຢ້ຽມຢາມຫວຽດນາມຢ່າງເປັນທາງການ, ການເຂົ້າຮ່ວມກອງປະຊຸມຫຼາຍຝ່າຍຂອງການນຳສູງສຸດຕ່າງປະເທດຫຼາຍຄະນະ ຊຶ່ງໄດ້ເຮັດໃຫ້ຖານະ ແລະ ບົດບາດຂອງ ສສ ຫວຽດນາມ ພົ້ນເດັ່ນຂຶ້ນໃນພາກພື້ນ ແລະ ສາກົນຢ່າງຈະແຈ້ງ. ສະຫາຍເຊື່ອໝັ້ນວ່າ, ສສ ຫວຽດນາມ ເວົ້າລວມ, ເວົ້າສະເພາະແມ່ນ ນະຄອນຫຼວງຮ່າໂນ້ຍ ຈະປະສົບຜົນສຳເລັດໃນວິໄສທັດ ແລະ ແຜນພັດທະນາເສດຖະກິດ-ສັງຄົມຂອງຕົນ ຕາມແຜນການທີ່ໄດ້ວາງໄວ້. 
ໃນໂອກາດດຽວກັນນີ້, ສະຫາຍທູດຍັງໄດ້ຕາງໜ້າໃຫ້ ພັກ, ລັດ ແລະ ປະຊາຊົນລາວບັນດາເຜົ່າ ສະແດງຄວາມຄວາມຮູ້ບຸນຄຸນ ແລະ ຂອບໃຈຢ່າງຈິງໃຈຕໍ່ການນຳ ພັກ, ລັດ ແລະ ປະຊາຊົນຫວຽດນາມເວົ້າລວມ, ເວົ້າສະເພາະແມ່ນນະຄອນຫຼວງຮ່າໂນ້ຍ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ສປປ ລາວ ໃນໄລຍະຜ່ານມາ ຊຶ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນ ມິດຕະພາບອັນຍິ່ງໃຫຍ່ ຄວາມສາມັກຄີພິເສດ  ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ຈະສືບຕໍ່ເປັນຂົວຕໍ່, ຮ່ວມມືກັບທຸກພາກສ່ວນຂອງທັງສອງຝ່າຍປະຕິບັດໜ້າທີ່ດັ່ງກ່າວນີ້ໃຫ້ນັບມື້ມີໝາກຜົນຍິ່ງໆຂຶ້ນ.
ສະຫາຍ ດິງ ຕຽນ ຢຸງ ໄດ້ສະແດງຄວາມຊົມເຊີຍທີ່ສະຫາຍ ນາງ ຄຳເພົາ ເອີນທະວັນ ໄດ້ມາດຳລົງຕຳແໜ່ງ ເປັນເອກອັກຄະລັດຖະທູດລາວປະຈໍາ ສສ ຫວຽດນາມ. ດ້ວຍຄວາມໄວ້ເນື້ອເຊື່ອໃຈຂອງການນຳ ຂັ້ນສູງພັກ, ລັດ ລາວ ສະຫາຍເອກອັກຄະລັດຖະທູດລາວຄົນໃໝ່ ຈະສືບຕໍ່ເປັນຂົວຕໍ່ ແລະ ປະຕິບັດໜ້າທີ່ການເມືອງ ຂອງຕົນທີ່ໄດ້ຮັບມອບໝາຍໃຫ້ສຳເລັດຜົນໃຫຍ່ຫຼວງກວ່າເກົ່າ. ສຳລັບນະຄອນຫຼວງຮ່າໂນ້ຍ ແມ່ນພ້ອມແລ້ວທີ່ຈະໃຫ້ການສະໜັບສະໜູນ, ຊຸກຍູ້ການຮ່ວມມືກັບນະຄອນຫຼວງວຽງຈັນ ໃນການພັດທະນາຊັບພະຍາກອນມະນຸດ, ບຳລຸງສ້າງພະນັກງານການນຳຂອງນະຄອນຫຼວງວຽງຈັນ.
ຂ່າວ-ພາບ: ສະຖານທູດລາວທີ່ຮ່າໂນ້ຍ