![]() |
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອປຶກສາຫາລື, ເຈລະຈາ ແລະ ຮັບຮອງເອົາວຽກງານສໍາຄັນຕ່າງໆພາຍໃຕ້ ສົນທິສັນຍາ ສະຫະປະຊາຊາດ ວ່າດ້ວຍ ການປ່ຽນແປງດິນຟ້າອາກາດ (UNFCCC) ແລະ ສັນຍາປາຣີ ວ່າດ້ວຍ ການປ່ຽນແປງດິນຟ້າອາກາດ (Paris Agreement). ກອງປະຊຸມ COP31 ໄດ້ເນັ້ນໃສ່ແນວທາງ “Dialogue, Consensus and Action” ຫຼື ການສົນທະນາ, ການສ້າງຄວາມເອກະພາບຮ່ວມກັນ ແລະ ການລົງມືປະຕິບັດ ໂດຍເນັ້ນໃສ່ການຮ່ວມມືລະຫວ່າງບັນດາປະເທດ ເພື່ອຜັກດັນຜົນການເຈລະຈາໃຫ້ນຳໄປສູ່ການປະຕິບັດຢ່າງເປັນຮູບປະທຳ. ບຸລິມະສິດສຳຄັນປະກອບມີການຫັນປ່ຽນດ້ານພະລັງງານໄປສູ່ພະລັງງານສະອາດ, ການພັດທະນາໂຄງລ່າງພື້ນຖານດ້ານພະລັງງານສະອາດ, ການລະດົມທຶນ ແລະ ການຖ່າຍທອດເຕັກໂນໂລຊີ, ການເສີມສ້າງຂີດຄວາມສາມາດ ໃນການຮັບມືຕໍ່ຜົນກະທົບຈາກການປ່ຽນແປງດິນຟ້າອາກາດ ໂດຍສະເພາະບັນດາປະເທດ ແລະ ຊຸມຊົນທີ່ມີຄວາມສ່ຽງ ແລະ ມີຄວາມບອບບາງສູງ. ພ້ອມນີ້, ຍັງເນັ້ນໜັກໃສ່ການຫຼຸດຜ່ອນການປ່ອຍທາດອາຍເຮືອນແກ້ວ, ຮັກສາເປົ້າໝາຍຈຳກັດການເພີ່ມຂຶ້ນຂອງອຸນຫະພູມໂລກບໍ່ໃຫ້ເກີນ 1.5 ອົງສາເຊ ແລະ ສະໜັບສະໜູນໃຫ້ບັນດາປະເທດກຳລັງພັດທະນາ ເຂົ້າເຖິງແຫຼ່ງທຶນດ້ານການປ່ຽນເເປງດິນຟ້າອາກາດໄດ້ຢ່າງມີປະສິດທິຜົນ.
ໃນຕອນເຊົ້າວັນທີ 17 ພະຈິກຜ່ານມາ, ທ່ານ ລັດຖະມົນຕີ ກະຊວງກະສິກຳ ແລະສິ່ງແວດລ້ອມ, ຫົວໜ້າຄະນະຜູ້ແທນລາວ ໄດ້ຕາງໜ້າລັດຖະບານ ແຫ່ງ ສປປ ລາວ ຂຶ້ນກ່າວປາໄສ ໃນກອງປະຊຸມລະດັບສູງ (High-Level Segment) ຂອງ COP31 ຊຶ່ງມີທັງໝົດ 85 ປະເທດ ຂຶ້ນກ່າວປາໄສ, ໃນນັ້ນ ລະດັບລັດຖະມົນຕີ ມີ 76 ປະເທດ ເເລະ ລະດັບຮອງລັດຖະມົນຕີ 9 ປະເທດ.ໃນກອງປະຊຸມ ທ່ານ ລັດຖະມົນຕີ ໄດ້ຍົກໃຫ້ເຫັນວ່າ: ຜົນກະທົບຈາກການປ່ຽນແປງດິນຟ້າອາກາດ ໃນລະດັບໂລກ ບໍ່ແມ່ນໄພຂົ່ມຂູ່ທີ່ຢູ່ໄກຕົວອີກຕໍ່ໄປ, ແຕ່ມັນແມ່ນຄວາມເປັນຈິງທີ່ບັນດາປະເທດທີ່ມີຄວາມບອບບາງສູງ ຕ້ອງໄດ້ພົບພໍ້ໃນປັດຈຸບັນ. ໃນຖານະເປັນປະເທດດ້ອຍພັດທະນາທີ່ບໍ່ມີທາງອອກສູ່ທະເລ ຊຶ່ງກຳລັງຈະກ້າວອອກຈາກສະຖານະພາບປະເທດດ້ອຍພັດທະນາ. ສປປ ລາວ ຕ້ອງປະເຊີນໜ້າກັບຄວາມສ່ຽງກັບ ການປ່ຽນແປງດິນຟ້າອາກາດຢ່າງຮຸນແຮງ ແລະ ການປ່ຽນແປງດິນຟ້າອາກາດດັ່ງກ່າວ ເປັນໄພຂົ່ມຂູ່ຢ່າງໜັກໜ່ວງຕໍ່ຂະແໜງກະສິກຳ, ໂຄງລ່າງພື້ນຖານ, ຊີວິດການເປັນຢູ່ຂອງປະຊາຊົນໃນເຂດຊົນນະບົດ ແລະ ການພັດທະນາເສດຖະກິດ-ສັງຄົມ ໃນໄລຍະຍາວ.
![]() |
ລັດຖະບານ ແຫ່ງ ສປປ ລາວ ໄດ້ເຫັນຄວາມສຳຄັນ ແລະ ຖືເອົາວຽກງານການແກ້ໄຂບັນຫາການປ່ຽນແປງດິນຟ້າອາກາດ ເປັນວຽກບຸລິມະສິດ ແລະ ໄດ້ກໍານົດເປົ້າໝາຍຫຼຸດຜ່ອນການປ່ອຍທາດອາຍເຮືອນແກ້ວ ທີ່ເປັນສາເຫດຕົ້ນຕໍ ເຮັດໃຫ້ເກີດການປ່ຽນແປງດິນຟ້າອາກາດ ຫຼຸດລົງໃຫ້ໄດ້ 60% ໃນປີ 2030 ທຽບໃສ່ລະດັບການປ່ອຍໃນເກນປົກກະຕິ ແລະ ຕັ້ງເປົ້າໝາຍການຫຼຸດຜ່ອນການປ່ອຍ ແລະ ເພີ່ມການດູດຊັບທາດອາຍເຮືອນແກ້ວໃຫ້ເປັນສູນ (Net Zero Emissions) ໃນປີ 2050. ສະນັ້ນ, ເພື່ອໃຫ້ສອດຄ່ອງກັບຄວາມພະຍາຍາມດັ່ງກ່າວ, ສປປ ລາວ ໄດ້ຮັບຮອງເອົາ ແຜນງານແຫ່ງຊາດ ການປະກອບສ່ວນແກ້ໄຂບັນຫາການປ່ຽນແປງດິນຟ້າອາກາດ ສະບັບທີ 3 (NDC 3.0). ແຜນງານດັ່ງກ່າວຈະເປັນທິດທາງໃນການຈັດຕັ້ງປະຕິບັດວຽກງານການຫຼຸດຜ່ອນການປ່ອຍທາດອາຍເຮືອນແກ້ວ ແລະ ການປັບຕົວເຂົ້າກັບການປ່ຽນແປງດິນຟ້າອາກາດໃນລະດັບຊາດຮອດປີ 2035. ສປປ ລາວ ຍັງຢຶດໝັ້ນຕໍ່ຄາດໝາຍໄລຍະຍາວໃນການບັນລຸການປ່ອຍ ແລະ ການດູດຊັບທາດອາຍເຮືອນແກ້ວ ໃຫ້ເປັນສູນໃນປີ 2050 ແລະ ຮຽກຮ້ອງໃຫ້ມີການເພີ່ມທະວີການຮ່ວມມືກັນຢ່າງເຂັ້ມແຂງ ເພື່ອຮັກສາລະດັບການເພີ່ມຂຶ້ນຂອງອຸນຫະພູມສະເລ່ຍຂອງໂລກ ບໍ່ໃຫ້ເກີນ 1.5°C. ນອກນັ້ນ, ສປປ ລາວ ຍັງໄດ້ຮຽກຮ້ອງການເລັ່ງຈັດຕັ້ງປະຕິບັດຕາມແຜນງານ ບາກູ ສູ່ ເບເລັມ (Baku to Belém Roadmap) ພ້ອມທັງຮຽກຮ້ອງການສະໜອງທຶນດ້ານການປ່ຽນແປງດິນຟ້າອາກາດ ທີ່ສາມາດຄາດຄະເນໄດ້ ແລະ ເຂົ້າເຖິງໄດ້ງ່າຍ ໂດຍຫຼີກລ່ຽງການເພີ່ມພາລະໜີ້ສິນໃຫ້ແກ່ບັນດາປະເທດກຳລັງພັດທະນາ. ໃນນັ້ນ, ການເງິນແບບປະສົມ, ທຶນຊ່ວຍເຫຼືອລ້າ ແລະ ການສະໜັບສະໜູນແບບມີເງື່ອນໄຂຜ່ອນຜັນ ຍັງຄົງມີຄວາມສຳຄັນຍິ່ງ ໃນການຊຸກຍູ້ການຈັດຕັ້ງປະຕິບັດ ວຽກງານການປ່ຽນແປງດິນຟ້າອາກາດ ໃນທົ່ວຂະແໜງການເສດຖະກິດ ຂອງ ສປປ ລາວ ຊຶ່ງກວມລວມທັງວຽກງານການຫຼຸດຜ່ອນທາດອາຍເຮືອນແກ້ວ ແລະ ການປັບຕົວເຂົ້າກັບການປ່ຽນແປງດິນຟ້າອາກາດ.
ສໍາລັບການເຂົ້າຮ່ວມກອງປະຊຸມ COP31 ຄັ້ງນີ້ ຄະນະຜູ້ແທນ ສປປ ລາວ ຍັງໄດ້ມີການພົບປະກັບບັນດາຄູ່ຮ່ວມພັດທະນາເພື່ອສືບຕໍ່ການປຶກສາຫາລື ແລະ ການຮ່ວມມື ທັງແບບສອງຝ່າຍ ແລະ ຫຼາຍຝ່າຍ ເຊັ່ນ: ພົບປະກັບຄະນະຜູ້ແທນກໍາປູເຈຍ ແລະ ອົງການ GGGI, ພ້ອມທັງ ເຂົ້າຮ່ວມກອງປະຊຸມປິ່ນອ້ອມຕ່າງໆເພື່ອແລກປ່ຽນ ແລະ ຖອດຖອນບົດຮຽນການຈັດຕັ້ງປະຕິບັດຕົວຈິງ ຊຶ່ງບໍ່ພຽງແຕ່ເປັນການສະແດງບົດບາດຄວາມຮັບຜິດຊອບຂອງ ສປປ ລາວ ຕໍ່ເວທີສາກົນເທົ່ານັ້ນ, ແຕ່ຍັງເປັນການເປີດປະຕູສູ່ ການລະດົມທຶນສີຂຽວ, ຕະຫຼາດກາກບອນ ແລະ ການຖ່າຍທອດເຕັກໂນໂລຊີ ເພື່ອການປັບປຸງຊີວິດການເປັນຢູ່ຂອງປະຊາຊົນລາວໃນຊົນນະບົດ.
(ແຫຼ່ງຂ່າວ: ກສ)


ຄໍາເຫັນ