 |
ສະຫະພາບໂຊວຽດ ເປັນກໍາລັງຫຼັກໃນການຕໍ່ສູ້ຕ້ານການຮຸກຮານຂອງຟາດຊິດເຢຍລະມັນຮິດເລີ ແລະ ພັນທະມິດ, ພ້ອມທັງໄດ້ມີບົດບາດສຳຄັນໃນການທຳລາຍລ້າງລັດທິຟາດຊິດ ແລະ ລັດທິຂຸນເສິກ. ປະຊາຊົນໂຊວຽດທີ່ໄດ້ອົດທົນຕໍ່ຄວາມທຸກຍາກຈາກການຮຸກຮານ ແລະ ຮັບຮູ້ເຖິງຄວາມໜ້າຢ້ານກົວຂອງສົງຄາມນັ້ນໄດ້ຕໍ່ສູ້ຢ່າງພິລະອາດຫານຕ້ານຜູ້ຮຸກຮານ ແລະ ໄດ້ເສຍສະຫຼະຢ່າງຫຼວງຫຼາຍ ເພື່ອຍາດມາໄດ້ຊຶ່ງໄຊຊະນະອັນຍິ່ງໃຫຍ່.
ເຫດການນີ້ມີຄວາມໝາຍສຳຄັນຕໍ່ທົ່ວໂລກ, ການທຳລາຍລ້າງນາຊີເຢຍລະມັນ ແລະ ລັດທິຂຸນເສິກຍີ່ປຸ່ນໄດ້ນໍາໄປສູ່ການລົ້ມສະຫຼາຍຂອງຜູ້ທີ່ຢຶດໝັ້ນໃນອຸດົມການຕ້ານມວນມະນຸດຂອງລັດທິຟາດຊິດທີ່ຕ້ອງການຄອບງຳໂລກ ແລະ ຄວາມປາຖະໜາຂອງພວກເຂົາທີ່ຕ້ອງການເຮັດໃຫ້ປະຊາຊົນທັງໝົດຕົກຢູ່ໃນສະພາວະເປັນທາດ.
ໃນປັດຈຸບັນ, ສ ຣັດເຊຍ ແລະ ບັນດາປະເທດເພື່ອນມິດ ທີ່ມີຈຸດຢືນດຽວກັນກຳລັງຮ່ວມກັນປະຕິບັດພາລະກິດ ໂດຍໝູນໃຊ້ທຸກອໍານາດທີ່ມີ ດ້ວຍຄວາມຮັບຜິດຊອບ, ຮອບຄອບ ແລະ ມີເຫດຜົນ, ເຮັດທຸກສິ່ງທຸກຢ່າງທີ່ເປັນໄປໄດ້ເພື່ອຮັກສາຄວາມເປັນຈິງທາງປະຫວັດສາດຂອງສົງຄາມໂລກຄັ້ງທີສອງ. ປະເທດຂອງພວກເຮົາຈະລະນຶກເຖິງວິລະກຳອັນຍິ່ງໃຫຍ່ຂອງປະຊາຊົນສະຫະພາບໂຊວຽດ, ຈີນ ແລະ ບັນດາປະເທດພັນທະມິດອື່ນໆທີ່ໄດ້ຮ່ວມກັນປົກປ້ອງສັນຕິພາບໂລກຕະຫຼອດມາ. ໃນວັນທີ 9 ພຶດສະພາ, ພວກເຮົາສະແດງຄວາມລະນຶກເຖິງທະຫານໂຊວຽດ 27 ລ້ານຄົນລວມທັງປະຊາຊົນຜູ້ບໍລິສຸດ ທີ່ໄດ້ຕໍ່ສູ້ເສຍສະຫຼະຊີວິດ ເພື່ອອິດສະລະພາບ ແລະ ຄວາມເປັນເອກະລາດຂອງຄົນຮຸ່ນຫຼັງ. ພວກເຮົາຂໍສະແດງຄວາມເຄົາລົບນັບຖືຢ່າງສຸດຊຶ້ງ ຕໍ່ທະຫານທັງໃນແນວໜ້າ ແລະ ແນວຫຼັງ, ຜູ້ທີ່ອຸທິດຕົນຕໍ່ສູ້ເສຍສະຫຼະຊີວິດໃນໄລຍະສົງຄາມ. ໃນປະເທດຣັດເຊຍແມ່ນມີການເອົາໃຈໃສ່ເປັນພິເສດຕໍ່ການສຶກສາອົບຮົມຊາວໜຸ່ມໂດຍການຍົກເອົາຄົນຮຸ່ນກ່ອນມາເປັນຕົວຢ່າງທີ່ສະແດງໃຫ້ເຫັນເຖິງການທີ່ມີນໍ້າໃຈຮັກຊາດ, ຮັກປະຊາຊົົນ ແລະ ຄວາມພ້ອມທີ່ຈະເສຍສະຫຼະເພື່ອອະນາຄົດ ແລະ ຄວາມຈະເລີນຮຸ່ງເຮື່ອງ.
 |
ແຕ່ໜ້າເສຍດາຍ, ຕະຫຼອດໄລຍະ 8 ທົດສະວັດທີ່ຜ່ານມາ, ບາງກຸ່ມຄົນໄດ້ລືມບົດຮຽນອັນໂຫດຮ້າຍຂອງສົງຄາມນັ້ນ ແລະໃນມື້ນີ້, ພວກເຮົາຕ້ອງປົກປ້ອງຜົນຂອງໄຊຊະນະສົງຄາມໂລກຄັ້ງທີສອງຢ່າງເດັດຂາດອີກຄັ້ງ, ສະກັດກັ້ນຄວາມພະຍາຍາມໃນການບິດເບືອນປະຫວັດສາດ, ການດູໝິ່ນ ຫຼື ການບໍ່ຮັບຮູ້ການປະກອບສ່ວນທາງປະຫວັດສາດຂອງສະຫະພາບໂຊວຽດຕໍ່ໄຊຊະນະດັ່ງກ່າວ ພ້ອມທັງການທຳລາຍຊື່ສຽງຂອງຜູ້ຮັກຫອມເສລີພາບ. ພວກເຮົາເຫັນວ່າບາງປະເທດໄດ້ມີການຟື້ນຟູແນວຄິດ ລັດທິນາຊີ ແລະ ການຈໍາແນກເຊື້ອຊາດຢ່າງເປີດເຜີຍ ແລະ ໄດ້ຍົກຍໍພວກນາຊີ ແລະ ພັນທະມິດວ່າເປັນວິລະບູລຸດ. ລັດທິນາຊີໃໝ່ ແລະ ລັດຂຸນເສິກກຳລັງກໍາເນີດຂຶ້ນ ຊຶ່ງນໍາໄປສູ່ການເພີ່ມຂຶ້ນໃນຫຼາຍຮູບແບບຕ່າງໆຂອງການຈຳແນກເຊື້ອຊາດ, ລັດທິຊາດນິຍົມລວມທັງການຈຳແນກທາງສີຜິວ, ການກຽດຊັງຄົນຕ່າງດ້າວ ແລະ ການບໍ່ຍອມຮັບຄວາມຄິດທີ່ແຕກຕ່າງ. ຕົວຢ່າງທີ່ສາມາດເຫັນໄດ້ຊັດເຈນຂອງການຟືນຄືນຂອງລັດທິນາຊີ ແມ່ນ ການບໍ່ຮັບຮູ້ກ່ຽວກັບສິດໃນການນໍາໃຊ້ພາສາແມ່ ແລະ ຄວາມເຊື່ອດັ້ງເດີມ ຂອງກຸ່ມຄົນທີ່ເວົ້າພາສາຣັດເຊຍ, ລວມທັງການຈູດປຶ້ມວັນນະກໍາທີ່ຂຽນໂດຍຄົນຣັດເຊຍ ແລະ ການທໍາລາຍບັນດາອະນຸສອນສະຖານທີ່ລະນຶກແກ່ວິລະຊົນ ແລະ ຜູ້ທີ່ໄດ້ເສຍສະຫຼະຊີວິດໃນໄລຍະສົງຄາມໂລກຄັ້ງທີ 2 ບົນພື້ນຖານການຫວັງທໍາລາຍເອກະລັກຊາດ.
ໃນສະພາບການດັ່ງກ່າວ ສ ຣັດເຊຍ ໄດ້ຮຽກຮ້ອງຢ່າງຕໍ່ເນື່ອງໃຫ້ປະຊາຄົມໂລກເຄົາລົບ ແລະ ປົກປ້ອງຫຼັກການແນໃສ່ການສະກັດກັ້ນການເກີດສົງຄາມ, ການຂ້າລ້າງເຜົ່າພັນ, ອາຊະຍາກຳສົງຄາມ, ການທໍລະມານ ແລະ ອາຊະຍາກຳອື່ນໆຕໍ່ມະນຸດຊາດທີ່ພັດທະນາໂດຍສານຕຸລາການທະຫານສາກົນ ຢູ່ນະຄອນນູເຣນເບິກ ແລະ ສານຕຸລາການທະຫານສາກົນສຳລັບຕາເວັນອອກ. ຄຳຕັດສິນຂອງທັງສອງສານແມ່ນພື້ນຖານທີ່ໝັ້ນຄົງ ແລະ ບໍ່ສາມາດປ່ຽນແປງໄດ້ຂອງກົດໝາຍສາກົນ ແລະ ລະບຽບໂລກໃນປັດຈຸບັນ.
ໃນຖານະເປັນເອກອັກຄະລັດຖະທູດ ແຫ່ງ ສ ຣັດເຊຍ ປະຈຳສາທາລະນະລັດ ປະຊາທິປະໄຕ ປະຊາຊົນລາວ ແລະ ເປັນພົນລະເມືອງຂອງ ສ ຣັດເຊຍ ຂ້າພະເຈົ້າຮູ້ສຶກດີໃຈເປັນພິເສດໃນມື້ນີ້ທີ່ໄດ້ຮັບຮູ້ວ່າສອງປະເທດຂອງພວກເຮົາຢືນຢູ່ຝ່າຍດຽວກັນຂອງປະຫວັດສາດໂລກ, ເປັນເອກະພາບກັນໃນການເຄົາລົບອະດີດ ແລະ ຄຳໝັ້ນສັນຍາໃນການຮັກສາຄວາມເປັນຈິງທາງປະຫວັດສາດ ແລະ ສະກັດກັ້ນຄວາມພະຍາຍາມທີ່ຈະບິດເບືອນມັນ.
ປະຊາຊົນລາວໄດ້ຜ່ານຜ່າຄວາມຫຍຸ້ງຍາກລຳບາກຈາກສົງຄາມໃນໄລຍະການຕໍ່ສູ້ກູ້ຊາດຕ້ານຜູ້ຮຸກຮານຕ່າງດ້າວ ແລະ ປັດຈຸບັນຜົນກະທົບຈາກສົງຄາມ ກໍຍັງສືບຕໍ່ເປັນໄພຂົ່ມຂູ່ ແລະ ກີດຂວາງ ຕໍ່ການດໍາລົງຊີວິດຂອງປະຊາຊົນ ເນື່ອງຈາກວ່າມີການຖິ້ມລະເບີດໃສ່ ລາວ ຫຼາຍກວ່າ 3 ລ້ານລູກ ແລະ ລູກລະເບິີດຈໍານວນຫຼາຍ ຍັງຕົກຄ້າງຢູ່ໃນດິນແດນລາວ.ໃນໄລຍະເວລາທີ່ຍາກລຳບາກທີ່ສຸດຂອງລາວ, ໄດ້ສະແດງໃຫ້ເຫັນເຖິງສາຍພົວພັນທີ່ໃກ້ຊິດລະຫວ່າງປະຊາຊົນສອງປະເທດເຖິງແມ່ນວ່າຈະມີທີ່ຕັ້ງພູມສາດທີ່ຫ່າງໄກກັນ, ສະຫະພາບໂຊວຽດ ໄດ້ປະກອບສ່ວນຢ່າງຕັ້ງໜ້າໃນກອງປະຊຸມເຈນີວາໃນປີ 1953 ທີ່ເຮັດໃຫ້ລັດທິລ່າເມືອງຂຶ້ນໃນອິນດູຈີນສິ້ນສຸດລົງ, ໄດ້ໃຫ້ການສະໜັບສະໜູນຢ່າງຫຼວງຫຼາຍແກ່ກອງກຳລັງຮັກຊາດຂອງລາວໃນໄລຍະສົງຄາມປິດລັບ, ປະກອບສ່ວນຍາດເອົາໄຊຊະນະ, ພ້ອມທັງໄດ້ຊ່ວຍຮັບປະກັນຄວາມອາດສາມາດໃນການປ້ອງກັນປະເທດ ແລະ ການພັດທະນາເສດຖະກິດ ພາຍຫຼັງການສະຖາປະນາ ເປັນ ສາທາລະນະລັດ ປະຊາທິປະໄຕ ປະຊາຊົນລາວ.
ຝ່າຍຣັດເຊຍສະແດງຄວາມຂອບໃຈຢ່າງສຸດຊຶ້ງຕໍ່ ສປປ ລາວ ທີ່ໄດ້ລະນຶກເຖິງວິລະກໍາອັນພິລະອາດຫານຂອງນັກບິນສາກົນນິຍົມໂຊວຽດໃນອະນຸສອນສະຖານທີ່ສ້າງຂຶ້ນໃນປີ 2022 ທີ່ນະຄອນຫຼວງວຽງຈັນ ແລະ ເມືອງແປກແຂວງຊຽງຂວາງ. ພວກເຮົາຮັບຮູ້ເຖິງນະໂຍບາຍທີ່ເປັນເອກະລາດ ແລະ ມີເຫດມີຜົນຂອງລາວ ຊຶ່ງຮ່ວມກັບ ສ ຣັດເຊຍ ແລະ ບັນດາປະເທດທີ່ມີຈຸດຢືນດຽວກັນລວມທັງພາຍໃນກຸ່ມປະເທດເພື່ອນມິດໃນການປົກປ້ອງກົດບັດສະຫະປະຊາຊາດ, ໄດ້ຮັບຮອງເອົາມະຕິຂອງສະຫະປະຊາຊາດ ແລະ ອົງການຕ່າງໆຢ່າງຕໍ່ເນື່ອງກ່ຽວກັບການຕໍ່ສູ້ຕ້ານການສັນລະເສີນລັດທິນາຊີ, ການຕໍ່ຕ້ານລັດທິລ່າເມືອງຂຶ້ນແບບໃໝ່ໃນທຸກຮູບແບບ ແລະ ປະກົດການ, ຄວາມສຳຄັນຂອງສົນທິສັນຍາສາກົນວ່າດ້ວຍສິດທິມະນຸດ ແລະ ອື່ນໆ.
 |
ໃນປີ 2025 ຣັດເຊຍ ແລະ ລາວສະເຫຼີມສະຫຼອງວັນຄົບຮອບທີ່ສຳຄັນຂອງຊາດ ແລະ ຂອງສອງປະເທດ ຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນແຫ່ງໄຊຊະນະໃນສົງຄາມປ້ອງກັນປິຕຸພູມ ຄົບຮອບ 80 ປີ, ວັນຄົບຮອບ 65 ປີຂອງການສ້າງຕັ້ງສາຍພົວພັນທາງການທູດລະຫວ່າງສອງປະເທດຂອງພວກເຮົາ ແລະ ວັນສະຖາປະນາ ສປປ ລາວ ຄົບຮອບ 50 ປີ.ໃນປີທີ່ຜ່ານມາ, ບັນດາຄະນະຜູ້ແທນຂັ້ນສູງຈາກ ສປປ ລາວ ທີ່ໄດ້ເຂົ້າຮ່ວມໃນການສະເຫຼີມສະຫຼອງວັນທີ 9 ພຶດສະພາທີ່ນະຄອນຫຼວງມົສກູປະກອບມີ: ທ່ານ ທອງສະຫວັນ ພົມວິຫານລັດຖະມົນຕີກະຊວງການຕ່າງປະເທດ ແລະ ທ່ານພົນເອກ ຄຳລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ຊຶ່ງໃນປັດຈຸບັນໄດ້ດຳລົງຕຳແໜ່ງເປັນຮອງນາຍົກລັດຖະມົນຕີແຫ່ງ ສປປ ລາວ. ກ້ອນກໍາລັງກອງທັບປະຊາຊົນລາວກໍໄດ້ເດີນຂະບວນສວນສະໜາມຜ່ານຈະຕຸລັດແດງ. ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ຢ້ຽມຢາມນະຄອນຫຼວງມົສກູຢ່າງເປັນທາງການ (ເດືອນກໍລະກົດ), ທ່ານ ສອນໄຊ ສີພັນດອນນາຍົກລັດຖະມົນຕີແຫ່ງ ສປປ ລາວ ໄດ້ເຂົ້າຮ່ວມກອງປະຊຸມເສດຖະກິດຕາເວັນອອກທີ່ເມືອງວລາດີວອດສະຕົກ (ເດືອນກັນຍາ). ໃນໂອກາດຄົບຮອບ 50 ປີວັນສະຖາປະນາ ສປປ ລາວ (ເດືອນທັນວາ) ຄະນະຜູ້ແທນຂັ້ນສູງຂອງ ສ ຣັດເຊຍ ກໍໄດ້ເດີນທາງມາຮ່ວມງານນຳໂດຍທ່ານ ນິໂກລາຍ ຊູຣາວະໂລບ ຮອງປະທານສະພາສູງຣັດເຊຍ ແລະ ທ່ານ ວາຊີລີ ໂອຊີມາກົບ ຮອງລັດຖະມົນຕີກະຊວງປ້ອງກັນປະເທດຣັດເຊຍ. ນອກຈາກນັ້ນ, ຍັງໄດ້ຕ້ອນຮັບການຢ້ຽມຢາມຂອງທ່ານ ເຊຣເກ ໂຊຍກູ ເລຂາທິການສະພາຄວາມໝັ້ນຄົງແຫ່ງສະຫະພັນຣັດເຊຍ (ເດືອນທັນວາ).
ໃນປີນີ້, ຣັດເຊຍມີຄວາມຍິນດີຈະຕ້ອນຮັບທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໃນໂອກາດການສະເຫຼີມສະຫຼອງວັນໄຊຊະນະສົງຄາມປົກປ້ອງປິຕຸພູມເມື່ອວັນທີ 9 ພຶດສະພາ 2026.
ການເປັນຄູ່ຮ່ວມມືທີ່ເຂັ້ມແຂງ ແລະ ໄວ້ເນື້ອເຊື່ອໃຈຊຶ່ງກັນ ແລະ ກັນໃນລະດັບສູງ ແລະ ລະດັບສູງສຸດ ສົ່ງເສີມໃຫ້ແກ່ການພັດທະນາການຮ່ວມມືລະຫວ່າງຣັດເຊຍ ແລະ ລາວໃນຫຼາຍຂົງເຂດຄື: ການປ້ອງກັນຊາດ ແລະ ປ້ອງກັນຄວາມສະຫງົບ, ການປະສານງານທັງໃນພາກພື້ນ ແລະ ສາກົນ, ລວມທັງໃນຂອບຂອງອົງການສະຫະປະຊາຊາດ ແລະ ຄູ່ເຈລະຈາຣັດເຊຍ-ອາຊຽນ, ການຮ່ວມມືດ້ານເສດຖະກິດທີ່ຫຼາກຫຼາຍ, ການສຶກສາ ແລະ ການຝຶກອົບຮົມ ແລະ ການແລກປ່ຽນດ້ານມະນຸດສະທຳ. ພວກເຮົາຫວັງຢ່າງຈິງໃຈວ່າໃນການກ້າວໄປຂ້າງໜ້າຕາມເສັ້ນທາງນີ້, ພວກເຮົາຈະສາມາດເສີມຂະຫຍາຍສາຍພົວພັນຂອງພວກເຮົາໃຫ້ມີເນື້ອໃນທີ່ມີຄຸນນະພາບໃໝ່ ແລະ ຍົກລະດັບໃໝ່ໃຫ້ສູງຂຶ້ນກວ່າເກົ່າ, ບົນພື້ນຖານມິດຕະພາບອັນເປັນມູນເຊື້ອແລະຄວາມເປັນອ້າຍນ້ອງທີ່ໄດ້ກໍານົດໄວ້ໃນສົນທິສັນຍາວ່າດ້ວຍພື້ນຖານຂອງການພົວພັນມິດຕະພາບ ໃນວັນທີ 9 ມີນາ 1994 ແລະ ຖະແຫຼງການວ່າດ້ວຍການເປັນຄູ່ຮ່ວມຍຸດທະສາດດ້ານຄວາມໝັ້ນຄົງ ໃນພາກພື້ນອາຊີ-ປາຊີຟິກ ໃນວັນທີ 14 ຕຸລາ 2011.
ຂ້າພະເຈົ້າເຊື່ອໝັ້ນວ່າການຮ່ວມມືລະຫວ່າງຣັດເຊຍ ແລະ ລາວ ຈະສືບຕໍ່ປະກອບສ່ວນເຂົ້າໃນການເສີມສ້າງຄວາມຍຸຕິທຳສາກົນປົກປ້ອງລະບຽບໂລກຫຼັງສົງຄາມຮ່ວມກັບປະຊາຊົນທີ່ຮັກຫອມສັນຕິພາບໃນທຸກປະເທດເພື່ອອະນາຄົດທີ່ສວຍງາມຂອງສອງປະເທດພວກເຮົາ ກໍຄືຂອງມວນມະນຸດທັງໝົດ ແລະ ການສະໜັບສະໜູນ, ພ້ອມກັບປະຊາຊົນທີ່ຮັກສັນຕິພາບຂອງທຸກປະເທດ, ເພື່ອຄວາມເປັນລະບຽບຮຽບຮ້ອຍຂອງໂລກຫຼັງສົງຄາມໃນນາມຂອງການສ້າງອະນາຄົດທີ່ສົດໃສສຳລັບສອງປະເທດຂອງພວກເຮົາ ແລະ ເພື່ອມະນຸດຊາດທັງໝົດ.
ຄໍາເຫັນ