 |
ຈຸດປະສົງເພື່ອເປັນການລະນຶກເຖິງມູນເຊື້ອຜົນງານໃນຂົງເຂດວຽກງານການພິມຈໍາໜ່າຍ ແລະ ທັງເປັນເວທີພົບປະແລກປ່ຽນປະສົບການ ແລະ ຖອດຖອນບົດຮຽນ ຊຶ່ງກັນລະຫວ່າງຜູ້ຄຸ້ມຄອງບໍລິຫານລັດ ແລະ ຜູ້ປະກອບການທຸລະກິດດ້ານການພິມຈໍາໜ່າຍໃນໄລຍະຜ່ານມາໃຫ້ມີການພັດທະນາຍິ່ງຂຶ້ນ.
ທ່ານ ພະຂັນໄຊ ສີຄັນໄຊ ໄດ້ກ່າວວ່າ: ຕະຫຼອດໄລຍະແຫ່ງການນໍາພາຕໍ່ສູ້ປົດປ່ອຍຊາດພັກປະຊາຊົນ ປະຕິວັດລາວ ເພື່ອຍາດເອົາຄວາມເປັນເອກະລາດແຫ່ງຊາດ ແລະ ເພື່ອນໍາເອົາຄວາມເປັນອິດສະຫຼະພາບມາສູ່ປວງຊົນລາວທັງຊາດ, ຕະຫຼອດໄລຍະ 76 ປີ ພັກເຮົາໄດ້ຖືເອົາວຽກງານໂຄສະນາ, ສຶກສາອົບຮົມ, ປຸກລະດົມປະຊາຊົນ ເພື່ອຈັດຕັ້ງປະຕິບັດແນວທາງນະໂຍບາຍຂອງພັກໃຫ້ໄປສູ່ການບັນລຸໝາກຜົນຂອງການປະຕິວັດ. ເນື່ອງໃນໂອກາດສະເຫຼີມສະຫຼອງວັນການພິມຈຳໜ່າຍຄົບຮອບ 76 ປີ ຊຶ່ງແມ່ນການຫວນຄືນມູນເຊື້ອແຫ່ງການກຳເນີດການເຕີບໃຫ່ຍຂະຫຍາຍຕົວທາງດ້ານຜົນງານຜະລິດຕະພັນສິ່ງພິມຕ່າງໆ, ທັງດ້ານເຄື່ອງຈັກພິມ, ເຕັກນິກການຜະລິດກໍໄດ້ມີການຂະຫຍາຍຕົວທາງດ້ານປະລິມານ ແລະ ຄຸນນະພາບກ້າວໄປສູ່ຄວາມທັນສະໄໝເທື່ອລະກ້າວ. ບັນດາໂຮງພິມ, ສຳນັກພິມ ແລະ ຮ້ານຈໍາໜ່າຍ ໄດ້ເພີ່ມຂຶ້ນ ສິ່ງພິມໄດ້ຮັບການພັດທະນາຢ່າງຕໍ່ເນື່ອງ.
 |
ກອງປະຊຸມຄັ້ງນີ້, ແມ່ນຂະບວນການໜຶ່ງທີ່ສໍາຄັນໃນການສະເຫຼີມສະຫຼອງວັນສໍາຄັນຂອງວຽກງານພິມຈຳໜ່າຍ, ບໍ່ພຽງແຕ່ການສະເຫຼີມສະຫຼອງເທົ່ານັ້ນ ທີ່ສໍາຄັນຜູ້ເຂົ້າຮ່ວມໄດ້ຮັບຟັງການບັນຍາຍໃນຫຼາຍຫົວຂໍ້: ຍົກສູງບົດບາດການຄຸ້ມຄອງວຽກງານພິມຈໍາໜ່າຍ; ສິ່ງທ້າທາຍວຽກງານການພິມ; ກາລະໂອກາດ ແລະ ສິ່ງທ້າທາຍວຽກງານສໍານັກພິມ; ກົນໄກ ແລະ ສິ່ງທ້າທາຍວຽກງານຈໍາໜ່າຍ ແລະ ບົດຮຽນທາງດ້ານການຄຸ້ມຄອງວຽກງານພິມຈຳໜ່າຍ, ການພິມ ການຈໍາໜ່າຍ ຈາກວິທະຍາກອນມາຖ່າຍຖອດຄວາມຮູ້ ແລະ ແລກປ່ຽນປະສົບການທີ່ເຕັມໄປດ້ວຍເນື້ອຫາທີ່ເປັນປະໂຫຍດ ພ້ອມກັນແລກປ່ຽນບົດຮຽນໃນວຽກງານດັ່ງກ່າວໃຫ້ມີການພັດທະນາດີຂຶ້ນເລື້ອຍໆ.
ຂ່າວ-ພາບ: ຍຸພິນທອງ-ບຸນຕອມ
ຄໍາເຫັນ