ໄຊຍະບູລີ ສະເຫຼີມສະຫຼອງວັນປ່ອຍປາ ແລະ ສັດນໍ້າແຫ່ງຊາດ

ໃນພິທີ ທ່ານ ຄໍາຫຼ້າ ຜິວວັນນາ ຄະນະປະຈໍາພັກແຂວງ ເລຂາພັກເມືອງ ໄດ້ກ່າວເປີດພິທີສະເຫຼີມສະຫຼອງວັນປ່ອຍປາ ແລະ ສັດນໍ້າແຫ່ງຊາດ ບາງຕອນທ່ານກ່າວວ່າ: ເພື່ອເປັນການ ຈັດຕັ້ງຜັນຂະຫຍາຍກົດໝາຍວ່າດ້ວຍສັດນໍ້າ ແລະ ການປະມົງ, ບັນດານິຕິກຳຕ່າງໆທີ່ກ່ຽວຂ້ອງ ໃນໄລຍະທີ່ຜ່ານມາ ການນໍາຂັ້ນຕ່າງໆ ໄດ້ເອົາໃຈໃສ່ ຊີ້ນໍາ ແລະ ນໍາພາ ຕໍ່ການປົກປັກຮັກສາ, ການອະນຸລັກປ່າໄມ້, ສັດນໍ້າ ແລະ ສັດປ່າ ເພື່ອແນໃສ່ເຮັດໃຫ້ຊັບພະຍາກອນປ່າໄມ້, ສັດນໍ້າ ແລະ ສັດປ່າ ໄດ້ຮັບການຄຸ້ມຄອງ ແລະ ເພີ່ມຄວາມອຸດົມສົມບູນໃຫ້ແກ່ທຳມະຊາດ, ມີການຄຸ້ມຄອງນໍາໃຊ້ແບບຍືນຍົງ ຕາມນະໂຍບາຍວາງອອກ.

ສະເພາະເມືອງໄຊຍະບູລີ ແມ່ນມີແຜນຈະປ່ອຍປາທັງໝົດ ຈຳນວນ 10 ລ້ານກ່ວາໂຕ, ໃນນີ້ໄດ້ປ່ອຍປາກ່ອນວັນທີ 13 ກໍລະກົດ 2026 ແລ້ວຈໍານວນ 3 ລ້ານກ່ວາໂຕ, ປ່ອຍໃນວັນທີ 13 ກໍລະກົດ 2026 ຈໍານວນ 2 ລ້ານກ່ວາໂຕ ແລະ ຈຸດອື່ນໆທີ່ໄດ້ກຳນົດ ຍັງຈະໄດ້ສືບຕໍ່ປ່ອຍພາຍຫຼັງວັນທີ 13 ກໍລະກົດ 2026 ຈໍານວນ 5 ລ້ານກວ່າໂຕ. ຊະນິດປາທີ່ປ່ອຍໃນປີນີ້ປະກອບມີ 6 ຊະນິດ ຄື: ປານິນ, ປາໄນ, ປາກປາກ, ປາມາລີການ, ປາແກັດແລບ ແລະ ປາອິນເດຍ. ຈຸດປະສົງກໍເພື່ອເປັນການສົ່ງເສີມການລ້ຽງປາແບບຄອບຄົວ, ແບບເປັນໜອງ ແລະ ປ່ອຍປາລົງສູ່ແມ່ນໍ້າທໍາມະຊາດ ເພື່ອຄືນຄວາມອຸດົມສົມບູນຂອງລະບົບນິເວດ.