ຊ່າງຕັດຜົມ ສ້າງລາຍຮັບເຂົ້າສູ່ຄອບຄົວ

ໂດຍ: ພັດ ລໍວັນໄຊ
ຈະເຮັດອາຊີບໃດກໍຕາມຖ້າໃຈຮັກ-ມັກ, ມີຫົວຄິດປະລິດສ້າງ, ໃນການບໍລິຫານເວລາ ໃນແຕ່ລະມື້ໃຫ້ເໝາະສົມ ກັບວຽກທີ່ຈະລົງທຶນເຮັດ ອາຊີບນັ້ນໆກໍຈະພາສ້າງລາຍຮັບເຂົ້າມາສູ່ຄອບໄດ້ ຄືດັ່ງຄອບຄົວ ຂອງຊ່າງຕັດຜົມ ຄຳຫຼ້າ ສີສົມບັດ ທີ່ປະສົບຜົນສຳເລັດ ໃນການເປັນຊ່າງຕັດຜົມ.
ຊ່າງຕັດຜົມ ຄຳຫຼ້າ ສີສົມບັດ ໃຫ້ສຳພາດຕໍ່ຜູ້ຂຽນວ່າ: ປັດຈຸບັນ ອາຍຸ 37 ປີ ຢູ່ບ້ານໂພນປ່າເປົ້າເມືອງສີສັດຕະນາກ ນະຄອນຫຼວງວຽງຈັນ. ອາຊີບເມື່ອກ່ອນແມ່ນພະນັກງານ, ໄດ້ມີໂອກາດໄປສຶກສາຕໍ່ປະລິນຍາໂທຢູ່ ສສ ຫວຽດນາມ ສາຂາວິຊາຄຸ້ມຄອງການຂົນສົ່ງ ເປັນເວລາ 3 ປີ ຂະນະທີ່ກຳລັງສຶກສາ ໄດ້ໃຊ້ເວລາວ່າງຕັດຜົມໃຫ້ໝູ່ເພື່ອນນັກສຶກສາດ້ວຍກັນ, ຮຽນຮູ້ປະສົບການຕາມຮ້ານຕັດຜົມ ຊຶ່ງເປັນຮ້ານອ້າຍຮັກ ຢູ່ ສສ ຫວຽດນາມ ແລະ ໄດ້ເຮັດໃຫ້ຕົນເອງມີຄວາມຊຳນານຂຶ້ນເລື້ອຍໆ. ຫຼັງຈາກນັ້ນກັບມາ ສປປ ລາວ ກໍມາປະຈຳການເປັນປົກກະຕິ ແລະ ໃຊ້ເວລາວ່າງຕັດຜົມເປັນອາຊີບເສີມຄຽງຄູ່ກັບວຽກປະຈຳເປັນເວລາ 2 ປີ, ເນື່ອງຈາກວ່າມີຄວາມຈຳເປັນທາງທາງຄອບຄົວ ຈຶ່ງໄດ້ຕັດສິນໃຈລາອອກຈາກວຽກປະຈຳ, ມາລົງລົງທຶນ ແລະ ເປີດກິດຈະການຮ້ານຕັດຜົມຂຶ້ນໃນປີ 2021 ໂດຍຕັ້ງຊື່ຮ້ານວ່າ: ຮ້ານຕັດຜົມຊາຍ ຊົງຫຼໍ່ 168 ສາຂາທຳອິດແມ່ນ ແມ່ນຢູ່ບ້ານໂພນປ່າເປົ້າ, ເຫັນວ່າມີການຕອບຮັບຈາກລູກຄ້າ ໂດຍສະເພາະແມ່ນໄວໜຸ່ມມາໃຊ້ບໍລິການຫຼາຍສົມຄວນ, ມື້ໜຶ່ງມີລູກຄ້າເຂົ້າຮ້ານບໍ່ຕ່ຳກວ່າ 30 ຄົນ.  ເລີ່ມເຫັນຄວາມເປັນໄປໄດ້. ສະນັ້ນ, ຈຶ່ງໄດ້ຂະຫຍາຍສາຂາອອກຕື່ມອີກ 3 ຄື: ສາຂາບ້ານໜອງໜ່ຽງ, ສາຂາບ້ານໂນນສະຫງ່າ ແລະ ສາຂາດົງປາແຫຼບ ລວມທັງໝົດມີ 4 ສາຂາ, ມີພະນັກງານ 10 ຄົນ, ລາຄາຕັດຜົມເລີ່ມຕົ້ນແມ່ນ 20 ພັນກີບ ເຖິງ 30 ພັນກີບ ຜ່ານການເຮັດກິດຈະການຮ້ານຕັດຜົມ ເຮັດຄອບຄົວມີຢູ່ມີກິນ, ມີການພັດທະນາດີຂຶ້ນເລື້ອຍໆ ແລະ ຍັງມີເງິນເກັບແຮໄວ້ເພື່ອໃຊ້ຈ່າຍໃນສິ່ງທີ່ຈຳເປັນ ແລະ ໄວ້ຕໍ່ຍອດເພື່ອຂະຫຍາຍກິດຈະການດັ່ງກ່າວ. 
ຊ່າງຕັດຜົມ ຄຳຫຼ້າ ຍັງໄດ້ກ່າວຕື່ມອີກວ່າ: ໃນຍຸກເສດຖະກິດໂລກກໍຄືເສດຖະກິດພາຍໃນພົບຄວາມຫຍຸ້ງຍາກທາງດ້ານເງິນ, ອັດຕາແລກປ່ຽນຂຶ້ນໆລົງໆ, ພົບກັບພາວະເງິນເຟີ້ແຕ່ຮ້ານເຮົາຍັງລາຄາເປັນກັນເອງ, ຈຸດພິເສດຂອງຮ້ານແມ່ນເປັນຫ້ອງຕິດແອ ທຸກ 4 ສາຂາ, ການບໍລິການລູກຄ້າດ້ວຍໃຈ ແລະ ຈະຕັດໃຫ້ລູກຄ້າຕາມຄີວ, ມີລູກຄ້າໂທຈອງລ່ວງໜ້າ ແລະ ທັກມາທາງເຟສບຸກ, ແບບອອນລາຍ ແລະ ອັອບລາຍ. ຮ້ານຕັດຜົມຊາຍຊົງຫຼໍ່ ພວກເຮົາຍັງໄດ້ຮັບສອນຕັດຜົມ ລາຄາການລົງທະບຽນຮຽນແມ່ນເປັນລາຄາລົມກັນໄດ້, ທີ່ຜ່ານມາທາງຮ້ານແມ່ນໄດ້ມອບໃບຢັ້ງຢືນໃຫ້ນັກຮຽນຈົບໄປແລ້ວຈຳນວນໜຶ່ງ,  ຖ້າຫາກຮຽນຈົບ, ເປັນແລ້ວທາງຮ້ານຍິນດີຮັບເຂົ້າບັນຈຸເປັນພະນັກງານໃນຮ້ານເລີຍ. ນອກຈາກນັ້ນທາງຮ້ານຍັງສ້າງກິດຈະກຳຄືການລົງໄປຕັດຜົມໃຫ້ເດັກນ້ອຍຊາຍຕາມໂຮງຮຽນຕ່າງໆ ໂດຍບໍ່ໄດ້ເສຍເງິນ.ສຳລັບແຜນໃນຕໍ່ໜ້າແມ່ນຈະຂະຫຍາຍສາຂາຮ້ານອອກຕື່ມເພື່ອຄວາມສະໜອງຕາມຄວາມຮຽກຮ້ອງຕ້ອງການຂອງລູກຄ້າ.
ທ້າຍນີ້, ຊ່າງຕັດຜົມ ຄຳຫຼ້າ ສີສົມບັດ ຍັງໄດ້ສະແດງຄວາມຮູ້ບຸນຄຸນມາຍັງພັກ-ລັດ ທີ່ອຳນວຍຄວາມສະດວກໃຫ້ນັກທຸລະກິດຂະໜາດນ້ອຍໄດ້ສະແດງຄວາມສາມາດດ້ວຍຕົນເອງ ແລະ ໄດ້ທຳມາຄ້າຂາຍ ເພື່ອສ້າງລາຍຮັບເຂົ້າສູ່ຄອບຄົວ ແລະ ໄດ້ມີໂອກາດຊ່ວຍເຫຼືອສັງຄົມຕາມກຳລັງແຮງທີ່ມີ