ຊາວກະສິກອນ ແຂວງພາກເໜືອ ແລກປ່ຽນບົດຮຽນ ຄວາມສາມາດປັບໂຕກັບການປ່ຽນແປງດິນຟ້າອາກາດ

ກອງປະຊຸມຄັ້ງນີ້, ຈັດຂຶ້ນເປັນເວລາ 2 ວັນ ເພື່ອເອື້້ອອຳນວຍໃຫ້ເປັນບ່ອນທີ່ສາມາດຮຽນຮູ້ຈາກກັນ ແລະກັນ, ແບ່ງປັນປະສົບການຕົວຈິງ ແລະ ກຳນົດຮ່ວມກັນ ກ່ຽວກັບການສະໜັບສະໜູນສີ່ງທີ່ມີຄວາມຈໍາເປັນ ເພື່ອຜັນຂະຫຍາຍ ກິດຈະກຳໃຫ້ກວ້າງຂວາງ. ທ່ານ ສຸວັນທອງ ນາມວົງ ກ່າວເປີດກອງປະຊຸມວ່າ: “ການປ່ຽນແປງດິນຟ້າອາກາດ ກຳລັງກາຍເປັນອຸປະສັກອັນສຳຄັນ ຕໍ່ການຜະລິດກະສິກຳ ຈື່ງຮຽກຮ້ອງໃຫ້ຜູ້ເຂົ້າຮ່ວມກອງປະຊຸມຄັ້ງນີ້, ນຳໃຊ້ໂອກາດເປັນເວທີ ທີ່ຊາວກະສິກອນໄດ້ແລກປ່ຽນປະສົບການ, ຖ່າຍທອດບົດຮຽນທີ່ເກີດຈາກຕົວຈິງ.

ໃນກອງປະຊຸມ, ຜູ້ເຂົ້າຮ່ວມໄດ້ມີການຮຽນຮູ້ ແລະ ແລກປ່ຽນບົດຮຽນໃນຫົວຂໍ້: ສຽງຈາກພາກສະໜາມ - ນະວັດຕະກຳຂອງຊາວກະສິກອນກ່ຽວກັບ ການເຮັດກະສິກຳທີ່ສາມາດປັບໂຕໄດ້ ກັບການປ່ຽນແປງດິນຟ້າອາກາດ (CSA). ໃນນັ້ນ, ປະກອບມີ ປະສົບການກ່ຽວກັບຜົນກະທົບຕໍ່ສະພາບອາກາດ ແລະການເຮັກກະສິກຳແບບ CSA, ການນຳສະເໜີຕົວຢ່າງຈາກຄູ່ຮ່ວມງານ, ວິທີແກ້ໄຂທີ່ໃຊ້ໄດ້ຈິງ, ນະວັດຕະກໍາ ແລະ ໝາກຜົນທີ່ໄດ້ຮັບຕົວຈິງຈາກພາກສະໜາມ, ພ້ອມນັ້ນ ໄດ້ມີການສົນທະນາເປັນກຸ່ມ ຮ່ວມກັບບັນດາ, ໜ່ວຍງານສົ່ງເສີມທ້ອງຖິ່ນ, ອົງການຈັດຕັ້ງສາກົນ, ຄູ່ຮ່ວມງານຄົ້ນຄວ້າສຶກສາ, ພາກເອກະຊົນ ແລະ ອົງການພັດທະນາທີ່ເຂົ້າຮ່ວມເປັນຜູ້ສັງເກດການ ໂດຍລົງເລິກນະວັດຕະກໍາທີ່ຊາວກະສິກອນພາເຮັດ, ການກະສິກຳທີ່ຫຼຸດຄວາມສ່ຽງ, CSA ໃນແຜນງານສົ່ງເສີມຂອງເມືອງ/ແຂວງ, ການເສີມສ້າງຄວາມເຂັ້ມແຂງໃຫ້ແກ່ລະບົບການສົ່ງເສີມ, ການເງິນດ້ານສະພາບອາກາດ ແລະ ບົດບາດຂອງພາກເອກະຊົນ, ຄວາມຕ້ອງການດ້ານນະໂຍບາຍສຳລັບການຂະຫຍາຍ ແລະ ການສົ່ງເສີມ CSA. ນອກຈາກການແລກປ່ຽນບົດຮຽນແລ້ວ, ຍັງໄດ້ຈັດການເປີດຕະຫຼາດນັດ ແລະ ຢ້ຽມຊົມຮ້ານວາງສະແດງ, ຂາຍສິນຄ້າກະສິກຳ ຂອງຊາວກະສິກອນ ແລະ ຄູ່ຮ່ວມງານ ຕື່ມອີກ.

(ແຫຼ່ງຂ່າວ: ແຂວງຫຼວງພະບາງ)