 |
ສະຫາຍ ທອງລີ ສີສຸລິດ ໄດ້ກ່າວວ່າ: ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ເຂົ້າຮ່ວມໃນງານສະເຫຼີມສະຫຼອງວັນຄົບຮອບ 95 ປີ ແຫ່ງການສ້າງຕັ້ງສູນກາງຊາວໜຸ່ມກອມມູນິດໂຮ່ຈິມິນ ແລະ ເປັນປີມິດຕະພາບລາວ-ຫວຽດນາມ, ຫວຽດນາມ-ລາວ ຈະຮ່ວມກັນລະນຶກເຖິງປະເພນີ ແລະ ປະຫວັດສາດແຫ່ງການສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດລາວ-ຫວຽດນາມ, ປະທານໂຮ່ຈິມິນ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ໄດ້ວາງພື້ນຖານ ແລະ ເປັນຕົວຢ່າງທີ່ສະຫງ່າງາມໃນການບຳລຸງລ້ຽງ ແລະ ພັດທະນາມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ການເຊື່ອມຕໍ່ຍຸດທະສາດທີ່ເຕີບໃຫຍ່ຂະຫຍາຍຕົວຢ່າງເຂັ້ມແຂງ, ສອງຊາດ ລາວ-ຫວຽດນາມ, ຫວຽດນາມ-ລາວ ເປັນບ້ານໃກ້ເຮືອນຄຽງຕິດຈອດກັນດ້ວຍສາຍພູສາຍນ້ຳທີ່ຍືດຍາວທາງທຳມະຊາດ, ປະຊາຊົນສອງຊາດບໍ່ສະເພາະທີ່ມີຊີວິດຢູ່ຮ່ວມກັນຢ່າງສັນຕິສຸກເທົ່ານັ້ນ ແຕ່ຍັງໄດ້ຮ່ວມກັນຕໍ່ສູ້ຕ້ານການຮຸກຮານ, ການຢຶດຄອງ ແລະ ການປົກຄອງຂອງຈັກກະພັດຕ່າງດ້າວ ແລະ ລະບອບເຈົ້າສັກດີນາຢ່າງອົງອາດກ້າແກ່ນ, ບໍ່ຍອມຈຳນົນ, ຍາດເອົາສິດເປັນເຈົ້າອອກຈາກແອກຄອບຄອງຂອງລະບອບລ່າເມືອງຂຶ້ນ ແລະ ສັກດີນາຂຸນເສິກ ເພື່ອປົດປ່ອຍປະເທດຊາດ; ສະຫາຍ ທອງລີ ສີສຸລິດ ໄດ້ກ່າວຕື່ມວ່າ: ການຮ່ວມສຳພັນສູ້ຮົບລະຫວ່າງສອງຊາດ ລາວ-ຫວຽດນາມ, ຫວຽດນາມ-ລາວ ເປັນອັນພິເສດທີ່ຫາຍາກ, ບໍ່ພຽງແຕ່ເປັນການຮ່ວມສຳພັນອັນໜຶ່ງທີ່ໄດ້ຮັບການສ້າງຕັ້ງຂຶ້ນບົນພື້ນຖານຂອງສາຍພົວພັນພິເສດເທົ່ານັ້ນ, ແຕ່ຫາກຍັງເປັນການຮ່ວມສຳພັນອັນໜຶ່ງທີ່ຕັດສິນການຄົງຕົວ ແລະ ຂະຫຍາຍຕົວຂອງສອງຊາດ ລາວ-ຫວຽດນາມ, ຫວຽດນາມ-ລາວ ໃນການປົກປັກຮັກສາ ແລະ ເສີມຂະຫຍາຍມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ທີ່ ສອງພັກ-ສອງລັດ ໄດ້ກຳນົດໄວ້ນຳກັນນັ້ນຈະນຳຊາດທັງສອງໃຫ້ມີສະຖຽນລະພາບຢ່າງໝັ້ນຄົງ, ມີການພັດທະນາ, ຂະຫຍາຍຕົວໄປສູ່ຄວາມວັດທະນາຖາວອນ ກ້າວສູ່ສັງຄົມນິຍົມໃນອະນາຄົດ, ປະທານ ໄກສອນ ພົມວິຫານ ໄດ້ກ່າວຕໍ່ກອງປະຊຸມໃຫຍ່ພັກກອມມູນິດ ຫວຽດນາມໃນປີ 1976 ວ່າ: “ໃນປະຫວັດສາດຂອງການປະຕິວັດໂລກໄດ້ມີແວ່ນແຍງທີ່ໃສແຈ້ງແຫ່ງນ້ຳໃຈສາກົນກຳມະຊີບມາຫຼາຍແລ້ວ, ແຕ່ບໍ່ທັນມີຢູ່ໃສ ແລະ ເວລາໃດທີ່ຄວາມສາມັກຄີ, ການສຳພັນສູ້ຮົບແບບພິເສດ, ຍາວນານ, ຮອບດ້ານຄືການພົວພັນລະຫວ່າງສອງຊາດລາວ-ຫວຽດນາມ ”, ປະທານ ໂຮ່ຈິມິນ ຜູ້ຍິ່ງໃຫຍ່ທີ່ເປັນຜູ້ຮ່ວມສ້າງຕຳລາແຫ່ງນ້ຳໃຈມິດຕະພາບ ແລະ ຄວາມສຳພັນສູ້ຮົບ, ຄວາມສາມັກຄີພິເສດລາວ-ຫວຽດນາມ ແລະ ຫວຽດນາມ-ລາວ ໄດ້ປະພັນບົດກອນທີ່ເປັນອຳມະຕະໄວ້ວ່າ: “ຮັກຫອມກັນໝາຍໝັ້ນ ຫຼາຍສັນພູກໍປີນໄຕ່, ຫຼາຍນ້ຳໃຫຍ່ ແລະ ໂຄກຄ້ອຍຂວາງກັ້ນກໍ່ເດີນດຸ່ງໄປ, ສອງຊາດລາວ-ຫວຽດນາມ ໄດ້ຝັງຄວາມຮັກຢູ່ໃນໃຈ, ຮົ່ງຮ່າທັງແມ່ຂອງບໍ່ເລິກປຸນປານໄດ້ ”, ປະທານ ໄກສອນ ພົມວິຫານ ຍັງໄດ້ປະພັນໄວ້ອີກວ່າ: “ ພູອາດຈະຖືກເຊາະເຈື່ອນ, ແມ່ນ້ຳລຳເຊອາດຈະເຫືອດແຫ້ງ, ແຕ່ສາຍພົວພັນມິດຕະພາບລາວ-ຫວຽດນາມ ຈະໝັ້ນຄົງຂະໜງແກ່ນຊົ່ວກາລະນານ”, ປະທານ ສຸພານຸວົງ ກໍໄດ້ມີຄຳເວົ້າຕີລາຄາການພົວພັນລາວ-ຫວຽດນາມ ໄວ້ຢ່າງເລິກເຊິ່ງໃນໂອກາດຢ້ຽມຢາມ ຫວຽດນາມ ເມື່ອປີ 1971 ວ່າ: “ການພົວພັນລາວ-ຫວຽດນາມ ແມ່ນຍິ່ງໃຫຍ່, ມະຫາສານ, ບໍ່ມີບົດເພງ ແລະ ບົດກາບກອນໃດໆທີ່ສາມາດພັນລະນາໄດ້, ມິດຕະພາບດັ່ງກ່າວສູງຍິ່ງກວ່າພູເຂົາ, ຍາວກວ່າແມ່ນ້ຳ, ກວ້າງໃຫຍ່ກວ່າມະຫາສະໝຸດ, ງາມກວ່າເດືອນເພັງ, ຫອມກວ່າດອກໄມ້ນາໆຊະນິດທີ່ຫອມຫວນທີ່ສຸດ”.
ຄະນະຊາວໜຸ່ມປະຊາຊົນປະຕິວັດລາວ ແລະ ຄະນະຊາວໜຸ່ມກອມມູນິດໂຮ່ຈິມິນ ໃນໄລຍະຜ່ານມາ ຄະນະຊາວໜຸ່ມສອງຊາດຈະໄດ້ສືບຕໍ່ຮໍ່າຮຽນເອົາຄຸນສົມບັດສິນທໍາປະຕິວັດອັນດີງາມຂອງ ປະທານໂຮ່ຈິມິນ, ປະທານ ໄກສອນ ພົມວິຫານ, ປະທານ ສຸພານຸວົງ ແລະ ສືບຕໍ່ຮັດແໜ້ນສາຍພົວພັນຂອງສອງຊາດໃຫ້ໝັ້ນຄົງຂະໜົງແກ່ນຕະຫຼອດໄປ. ສູນກາງຊາວໜຸ່ມປະຊາຊົນ ປະຕິວັດລາວ ແລະ ຊາວໜຸ່ມ-ເຍົາວະຊົນລາວບັນດາເຜົ່າ ຈະສືບຕໍ່ຮ່ວມມືຢ່າງໃກ້ຊິດກັບ ຄະນະຊາວໜຸ່ມກອມມູນິດ ໂຮ່ຈິມິນ ແລະ ຊາວໜຸ່ມ-ເຍົາວະຊົນບັນດາເຜົ່າ ຫວຽດນາມ ອ້າຍນ້ອງ ເພື່ອປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນແບບພິເສດ ທີ່ຫາໄດ້ຍາກໃນການພົວພັນຮ່ວມມືກັບສາກົນ.
ສະຫາຍ ຫງວຽນ ມິງ ເຕິມ ໄດ້ກ່າວວ່າ: ພິທີສະເຫຼີມສະຫຼອງ ແຫ່ງວັນສ້າງຕັ້ງ ຄະນະຊາວໜຸ່ມກອມມູນິດໂຮ່ຈິມິນ ຄົບຮອບ 95 ປີ, ຈະຫວນຄືນມູນເຊື້ອອັນເປັນກຽດສະຫງ່າຂອງຄະນະຊາວໜຸ່ມ, ເພື່ອສະແດງຄວາມຮູ້ບຸນຄຸນຕໍ່ຄຸນງາມຄວາມດີຂອງສະມາຊິກຊາວໜຸ່ມຂອງການປະຕິວັດຮຸ່ນຕ່າງໆ ແລະ ສືບຕໍ່ເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ, ຫຸ້ນສ່ວນຍຸດທະສາດລະຫວ່າງ ຫວຽດນາມ ແລະ ລາວ, ນັບມື້ໄດ້ຮັບການປັບປຸງ ແລະ ພັດທະນາ. ພິເສດ, ຄະນະຊາວໜຸ່ມຂອງສອງປະເທດ ຍາມໃດກໍມີຄວາມຕິດພັນໃກ້ຊິດແໜ້ນ ແລະ ກ້າວເດີນຄຽງບ່າຄຽງໄຫຼ່ພ້ອມກັບປະຫວັດສາດຂອງສອງຊາດ ແລະ ພັກກອມມູນິດຫວຽດນາມ ແລະ ພັກປະຊາຊົນ ປະຕິວັດລາວ ມີຕົ້ນກຳເນີດຮ່ວມກັນແມ່ນ ພັກກອມມູນິດ ອິນດູຈີນ, ແລະ ຄະນະຊາວໜຸ່ມ ກອມມູນິດໂຮ່ຈິມິນ ແລະ ຄະນະຊາວໜຸ່ມປະຊາຊົນປະຕິວັດລາວ ລ້ວນແຕ່ເປັນກອງກຳລັງສຳຮອງທີ່ໄດ້ຮັບຄວາມເຊື່ອໝັ້ນ, ມີອຸດົມການດຽວກັນ ແລະ ຕະລຸມບອນໃນທຸກຂົງເຂດ. ທັງສອງອົງການຈັດຕັ້ງແມ່ນລ້ວນແຕ່ມີສອງພັກນໍາພາໂດຍກົງ, ໂດຍປະທານ ໂຮ່ຈິມິນ ຜູ້ຍິ່ງໃຫຍ່ ແລະ ປະທານ ໄກສອນ ພົມວິຫານ ທີ່ແສນເຄົາລົບຮັກ, ຜູ້ນຳທີ່ດີເດັ່ນ ແລະ ສະຫຼາດສ່ອງໃສຂອງສອງຊາດພວກເຮົາ, ການສ້າງຕັ້ງຄະນະຊາວໜຸ່ມກອມມູນິດ ໂຮ່ຈິມິນ ຂຶ້ນ ແມ່ນຄວາມຈຳເປັນພາວະວິໄສທາງປະຫວັດສາດ ຊຶ່ງໄດ້ຕອບສະໜອງກັບຄວາມຮຽກຮ້ອງຕ້ອງການອັນຮີບດ່ວນຂອງຂະບວນການຊາວໜຸ່ມຮັກຊາດ; ພ້ອມກັນນັ້ນທັງເປັນການຢືນຢັນວິໄສທັດຍຸດທະສາດຂອງພັກທີ່ມີບົດບາດຂອງຊາວໜຸ່ມຕໍ່ກັບຊາຕາກຳຂອງປະເທດຊາດ; ພ້ອມສະແດງໃຫ້ເຫັນເຖິງຄວາມກ້າຫານ, ຈິນຕະນາການ ແລະ ສະຕິປັນຍາອັນສະຫຼາດສ່ອງໃສທີ່ກ້າວລໍ້າຍຸກສະໄໝຂອງ ພັກກອມມູນິດ ຫວຽດນາມ.
ຕະຫຼອດໄລຍະ 95 ປີແຫ່ງການສ້າງຕັ້ງ ແລະ ເຕີບໃຫຍ່ຂະຫຍາຍຕົວ, ຄະນະຊາວໜຸ່ມໄດ້ ເຕີບໂຕໃຫຍ່ ກາຍເປັນກອງກຳລັງທີ່ເຂັ້ມແຂງມະຫາສານ, ມີບົດບາດເປັນແຂນຂວາພ້ອມຮັບໃຊ້ທຸກພາລະກິດ, ກອງກຳລັງສຳຮອງທີ່ໄດ້ຮັບຄວາມເຊື່ອໝັ້ນຈາກພັກກອມມູນິດ ຫວຽດນາມ; ເປັນກຳລັງຕະລຸມບອນໃນທຸກຂົງເຂດ, ຕັ້ງແຕ່ການປົກປ້ອງປະເທດຈົນເຖິງການສ້າງສາ ແລະ ພັດທະນາເສດຖະກິດ; ເປັນ "ໂຮງຮຽນ" ສັງຄົມນິຍົມ ສະພາບແວດລ້ອມເພື່ອໃຫ້ຊາວໜຸ່ມຫຼໍ່ຫຼອມຄວາມກ້າຫານ, ຄຸນສົມບັດ ແລະ ທັກສະ; ເປັນຂົວຕໍ່ລະຫວ່າງພັກ, ອຳນາດການປົກຄອງກັບ ຊາວໜຸ່ມ, ເປັນຕົວແທນໃຫ້ແກ່ສິດ ແລະ ຜົນປະໂຫຍດທີ່ຖືກຕ້ອງຕາມກົດໝາຍຂອງໄວໜຸ່ມຫວຽດນາມ.
(ຂ່າວ-ພາບ: ບຸນອູ້ມ)
ຄໍາເຫັນ