ຊີ້ແຈງເຫດການ ທີ່ເກີດຂຶ້ນທີ່ ດ່ານ ຕມ ສາກົນຂົວມິດຕະພາບລາວ-ໄທ ແຫ່ງທີ 1

ຂປລ. ເຈົ້າໜ້າທີ່ດ່ານ  ຕໍາຫຼວດ ກວດຄົນເຂົ້າເມືອງ (ຕມ) ສາກົນຂົວມິດຕະພາບລາວ-ໄທ ແຫ່ງທີ 1 ຊີ້ແຈງເຫດການທີ່ເກີດຂຶ້ນທີ່  ໃນວັນທີ 12 ພະຈິກ 2023 ຜ່ານມາ ກຳລັງເປັນກະແສໃນສື່ສັງຄົມອອນລາຍ ທີ່ສັງຄົມໃຫ້ຄວາມສົນໃຈ ກ່ຽວກັບເຈົ້າໜ້າທີ່ຮຽກເກັບເງິນຈາກນັກທ່ອງທ່ຽວ.
  ທ່ານ ພັທ ກິດອນ ກິວົງໄຊ ຮອງຫົວໜ້າຄະນະຄຸ້ມຄອງດ່ານ ຫົວໜ້າດ່ານ ຕມ ສາກົນຂົວມິດຕະພາບລາວ-ໄທ ແຫ່ງທີ 1 ໃຫ້ສຳພາດຕໍ່ສື່ມວນຊົນໃນວັນທີ 20 ພະຈິກ ນີ້ວ່າ: ເພື່ອໃຫ້ສັງຄົມຮັບຊາບ ແລະ ເຂົ້າໃຈ ລາຍລະອຽດຕໍ່ເຫດການທີ່ເກີດຂຶ້ນຊຶ່ງໃນຄັ້ງວັນທີ 12 ພະຈິກ 2023 ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ປະຈຳ ຢູ່ຂາອອກ ໄດ້ກວດກາໜັງສືຜ່ານແດນຂອງ ນາງ ນາພາພອນ ສຸກກະເສີມ (Ms NAPAPORNSUGKASEAM), ວັນເດືອນປີເກີດ: 18 ພະຈິກ 1981, ສັນຊາດໄທ, ໜັງສືຜ່ານແດນເລກທີ: AD1158593, ອອກໃຫ້ວັນທີ 30 ກັນຍາ 2023 ແລະ ໝົດອາຍຸໃນວັນທີ 29 ກັນຍາ 2028; ທີ່ຢູ່: ແຂວງໄຊຍະພູມ ປະເທດໄທ. ຜ່ານການກວດກາຂອງເຈົ້າໜ້າທີ່ ຕມ ເຫັນວ່າໜັງສືຜ່ານແດນຂອງຜູ້ກ່ຽວແມ່ນບໍ່ມີຕາປະທັບແຈ້ງເຂົ້າ ສປປ ລາວ ຊຶ່ງເປັນການລະເມີດ ກົດໝາຍວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ, ສະບັບເລກທີ 59/ສພຊ, ລົງວັນທີ 26 ທັນວາ 2014 ເປັນການເຂົ້າເມືອງຜິດກົດໝາຍ ຈະຖືກປັບໃໝ 2 ລ້ານກີບ ຕາມມາດຕາ 12 ຂອງດໍາລັດ ວ່າດ້ວຍການປັບໃໝ ແລະ ນໍາໃຊ້ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ສະບັບເລກທີ 21/ລບ, ລົງວັນທີ 20 ມັງກອນ 2021.
ຕໍ່ກັບຄຣິບວິດີໂອ ທີ່ນັກທ່ອງທ່ຽວໄທ ໄດ້ເຜີຍແຜ່ລົງໃນສື່ສັງຄົມອອນລາຍ ວ່າເຈົ້າໜ້າທີ່ ຕມ ຮຽກເກັບເງິນ ຈໍານວນ 5.000 ບາດ ໃນເບື້ອງຕົ້ນນັ້ນ ເປັນພຽງການອະທິບາຍ ຂອງເຈົ້າ
ໜ້າທີ່ ຕມ ເພື່ອໃຫ້ນັກທ່ອງທ່ຽວຮັບຊາບ. ຈາກນັ້ນ, ເຈົ້າໜ້າທີ່ ຕມ ໄດ້ເຊີນຜູ້ກ່ຽວເຂົ້າໄປຫ້ອງການຕາມລະບຽບ ເພື່ອດຳເນີນການສືບສວນ-ສອບສວນ ເກັບກຳຂໍ້ມູນໃນເບື້ອງຕົ້ນ ຈຶ່ງສາມາດຮູ້ໄດ້ວ່າ ໜັງສືຜ່ານແດນຂອງຜູ້ກ່ຽວບໍ່ມີຕາປະທັບແຈ້ງເຂົ້າ ສປປ ລາວ ແທ້ ຊຶ່ງເປັນການເຂົ້າເມືອງລະເມີດກົດໝາຍວ່າດ້ວຍການ ເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ມາດຕາ 52 ຂໍ້ 1 ແລະ ຈະຖືກປັບໃໝ ເປັນຈຳນວນເງິນ 2 ລ້ານກີບ ຕາມດຳລັດ ວ່າດ້ວຍ ການປັບໃໝ ແລະ ນໍາໃຊ້ມາດຕະການອື່ນຕໍ່ຜູ້ລະເມີດ ກົດໝາຍ ແລະ ລະບຽບການກ່ຽວກັບການເຂົ້າ-ອອກ ແລະ ການຄຸ້ມ ຄອງຄົນຕ່າງປະເທດ ຢູ່ ສປປ ລາວ ສະບັບເລກທີ 21/ລບ, ລົງ ວັນທີ 20 ມັງກອນ 2021 ມາດຕາ 12 ການຫຼົບຫຼີກການກວດກາ ຫຼື ບໍ່ປະທັບຕາແຈ້ງເຂົ້າ-ອອກ ຈາກເຈົ້າໜ້າທີ່ຕໍາຫຼວດ ກວດຄົນເຂົ້າ-ອອກເມືອງ ປະຈຳດ່ານຊາຍແດນ ແລະ ສະໜາມບິນສາກົນ ພົນລະເມືອງລາວ, ຄົນຕ່າງດ້າວ, ຄົນຕ່າງປະເທດ ແລະ ຄົນບໍ່ມີສັນຊາດ ທີ່ເດີນທາງເຂົ້າ-ອອກ ສປປ ລາວ ໂດຍຜ່ານ ດ່ານຊາຍແດນ ແລະ ສະໜາມບິນສາກົນ ທີ່ທາງການກຳນົດໄວ້ ແຕ່ມີເຈດຕະນາເມີນເສີຍ ຫຼົບຫຼີກການກວດກາ ຫຼື ບໍ່ປະທັບຕາແຈ້ງເຂົ້າ-ອອກ ຈາກເຈົ້າໜ້າທີ່ຕຳຫຼວດກວດຄົນເຂົ້າ-ອອກເມືອງ ປະຈໍາດ່ານຊາຍແດນ ແລະ ສະໜາມບິນສາກົນ ຈະຖືກປັບໃໝ ສອງລ້ານກີບ ພ້ອມທັງເຮັດບົດບັນທຶກ ແລະ ສຶກສາອົບຮົມ.
ໃນຕົວຈິງ ເຈົ້າໜ້າທີ່ ຕມ ຂອງພວກເຮົາໄດ້ປັບໃໝ ຜູ້ກ່ຽວເປັນຈໍານວນເງິນ 700.000 ກີບ ຕາມການສະເໜີຂອງຜູ້ກ່ຽວ ແລະ ຝ່າຍເຈົ້າໜ້າທີ່ ຕມ ຂອງພວກເຮົາກໍເຫັນດີນໍາ ຊຶ່ງເປັນການປະຕິບັດນະໂຍບາຍຜ່ອນຜັນຕໍ່ຜູ້ກ່ຽວ ຊຶ່ງພວກເຮົາບໍ່ເອົາການປັບໃໝເປັນຫຼັກ, ແຕ່ຖືເອົາການສຶກອົບຮົມກ່າວເຕືອນ ອະທິບາຍໃຫ້ເຂົ້າໃຈຕໍ່ກົດໝາຍ-ລະບຽບການເປັນສໍາຄັນ ພ້ອມທັງໄດ້ດຳເນີນປະທັບຕາແຈ້ງເຂົ້າ-ອອກ ສປປ ລາວ ໃຫ້ຜູ້ກ່ຽວແລ້ວ ອະນຸຍາດໃຫ້ເດີນທາງອອກ ສປປ ລາວ ໃນວັນດຽວກັນ.
ທ່ານ ພັທ ກິດອນ ກິວົງໄຊ ໃຫ້ຮູ້ຕື່ມວ່າ: ສຳລັບ ຜູ້ໂດຍສານ ຫຼື ນັກທ່ອງທ່ຽວທີ່ນໍາໃຊ້ເອກະສານເດີນທາງເຂົ້າ-ອອກ ສປປ ລາວ ຫາກບໍ່ມີຕາປະທັບແຈ້ງເຂົ້າ- ອອກ ສປປ ລາວ ແມ່ນການເຂົ້າເມືອງຜິດກົດໝາຍ ຊຶ່ງເປັນການລະເມີດ ມາດຕາ 12 ຂອງດໍາລັດ ວ່າດ້ວຍການປັບໃໝ ແລະ ນໍາໃຊ້ມາດຕະການອື່ນຕໍ່ຜູ້ລະເມີດ ກົດໝາຍ ແລະ ລະບຽບການກ່ຽວກັບການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ສະບັບເລກທີ 21/ລບ, ລົງວັນທີ 20 ມັງກອນ 2021. ສ່ວນຜູ້ໂດຍສານ ຫຼື ນັກທ່ອງທ່ຽວ ທີ່ນໍາໃຊ້ເອກະສານເດີນທາງເຂົ້າ-ອອກ ສປປ ລາວ ຕ້ອງປະຕິບັດຕາມ ກົດໝາຍວ່າດ້ວຍ ການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວມາດຕາ 11 ຂໍ້ 4 ແລະ ມາດຕາ 3 ແລະ ມາດຕາ 5 ຂອງຄໍາແນະນໍາ ຂອງລັດຖະມົນຕີ ກະຊວງປ້ອງກັນຄວາມສະຫງົບ ກ່ຽວກັບການຈັດຕັ້ງຜັນຂະຫຍາຍບາງມາດຕາ ຂອງກົດໝາຍວ່າດ້ວຍ ການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ, ສະບັບເລກທີ 04/ປກສ, ລົງວັນທີ 16 ກຸມພາ 2022. "ຄົນລາວ, ຄົນຕ່າງດ້າວ, ຄົນຕ່າງປະເທດ ແລະ ຄົນບໍ່ມີສັນຊາດ ທີ່ເດີນທາງເຂົ້າ-ອອກ ສປປ ລາວ ຕ້ອງນໍາໃຊ້ເອກະສານເດີນທາງ ທີ່ຖືກຕ້ອງ, ຄົບຖ້ວນ ແລະ ສົມບູນ ແຈ້ງຕໍ່ເຈົ້າໜ້າທີ່ຕຳຫຼວດກວດຄົນເຂົ້າ-ອອກເມືອງ ປະຈໍາດ່ານຊາຍແດນ ແລະ ສະໜາມບິນສາກົນ ດ້ວຍຕົນເອງ.
   ສໍາລັບເຈົ້າໜ້າທີ່ ຕມ ທີ່ເຮັດໜ້າທີ່ນັ້ນ, ແມ່ນອີງຕາມ ກົດໝາຍ-ລະບຽບການ ທີ່ວາງອອກ ແຕ່ໃນກໍລະນີ ຫາກ ມີການລະເມີດກໍຕ້ອງຖືກສຶກສາອົບຮົມ, ກ່າວເຕືອນ ແລະ ປະຕິບັດວິໄນຕາມກໍລະນີໜັກເບົາ, ແຕ່ການປະຕິບັດໜ້າທີ່ນັ້ນ ອາດປາສະຈາກບໍ່ໄດ້ ໃນຂໍ້ຂາດຕົກບົກຜ່ອງ ແລະ ພວກເຮົາກໍພ້ອມຈະຮັບຟັງເອົາຄໍາຕໍານິຕິ ຊົມຈາກສັງຄົມ ເພື່ອນໍາມາປັບປຸງ ແລະ ແກ້ໄຂໃຫ້ດີຂຶ້ນກວ່າເກົ່າ. ສະນັ້ນ, ຂ້າພະເຈົ້າໃນນາມ ເປັນເຈົ້າໜ້າທີ່ ຕມ ຈຶ່ງຮຽກຮ້ອງມາຍັງບັນດາທ່ານຜູ້ໂດຍສານ ກໍຄື ນັກທ່ອງທ່ຽວ ທີ່ເດີນທາງເຂົ້າ-ອອກ ສປປ ລາວ ໂດຍຜ່ານດ່ານຊາຍແດນ ແລະ ສະໜາມບິນສາກົນ ຕ້ອງປະຕິບັດຕາມກົດໝາຍ-ລະບຽບການ ຢ່າງເຂັ້ມງວດ ກໍຄື ການແຈ້ງ ເອກະສານເດີນທາງຂອງຕົນຕໍ່ເຈົ້າໜ້າທີ່ ຕມ ປະຈໍາດ່ານດ້ວຍຕົນເອງທຸກຄັ້ງ ແລະ ຕ້ອງມີການກວດກາຄືນຢ່າງລະອຽດ.
ສຳລັບຜູ້ຊົມໃຊ້ສື່ສັງຄົມອອນລາຍປະເພດຕ່າງໆ ກໍຕ້ອງເສບຂ່າວຢ່າງມີສະຕິ ເບິ່ງຂໍ້ມູນໃນຫຼາຍດ້ານ ລວມທັງຊ່ອງ ລາຍການໂທລະພາບ, ວິທະຍຸ ແລະ ອື່ນໆ ກໍຕ້ອງໃຫ້ມີຂໍ້ມູນຄົບຖ້ວນ, ພາວະວິໄສ ເພື່ອເຮັດໃຫ້ສັງຄົມບໍ່ມີຄວາມສັບສົນ ແລະ ເຂົ້າໃຈໄປໃນທາງທີ່ຖືກຕ້ອງ ແລະ ທຸກຄົນໃນສັງຄົມສາມາດ ເຂົ້າເຖິງຂໍ້ມູນກ່ຽວກັບການເຂົ້າ-ອອກ ສປປ ລາວ ຕາມເວັບໄຊ້ www.immigration.gov.la, ເບີໂທສອບຖາມສາຍດ່ວນ 1502. ຂ່າວ: ມະນີທອນ-ພາບ: ສຸກທະວີ