ຊີ້ແຈງການເກັບຄ່າຜ່ານເຂົ້າຈອດລົດຢູ່ສະຖານີລົດໄຟ

ທ່ານກ່າວໃຫ້ຮູ້ອີກວ່າ: ສໍາລັບກົນໄກການຄຸ້ມຄອງຜ່ານມາ, ບໍລິສັດທາງລົດໄຟລາວ-ຈີນໄດ້ມອບໃຫ້ໜ່ວຍງານຮັບຜິດຊອບ ກໍຄືໜ່ວຍບໍລິການຕິດພັບກັບການຮັກສາຄວາມປອດໄພ ຄວາມເປັນລະບຽບຮຽບຮ້ອຍຢູ່ນອກສະຖານີເປັນຜູ້ຮັບຜິດຊອບ ຊຶ່ງໜ່ວຍງານດັ່ງກ່າວມີພັນທະໜ້າທີ່ຕໍ່ກັບບໍລິສັດໃນການຄຸ້ມຄອງພື້ນທີ່ສາທາລະນະ ໃນການຮັກສາ ຄວາມສະອາດ, ຈັດແຈງຄວາມເປັນລະບຽບຮຽບຮ້ອຍ ຕະຫຼອດເຖິງຫ້ອງນໍ້າ ແລະ ອື່ນໆ. ສະນັ້ນ, ໃນພັນທະດັ່ງກ່າວ ຈຶ່ງໄດ້ມີການເກັບຄ່າຜ່ານປະຕູເຂົ້າແຕ່ລະສະຖານີ ຊຶ່ງໃນໄລຍະ 10 ເດືອນຂອງການເປີດໃຫ້ບໍລິການ ພວກເຮົາບໍ່ໄດ້ເກັບຄ່າຜ່ານປະຕູ, ພາຍຫຼັງເປີດມາໄດ້ 11 ເດືອນຈຶ່ງໄດ້ກຳນົດເອົາລາຄາໃນການຈອດລົດຢູ່ໃນສະຖານີລົດໄຟຂຶ້ນມາ ໂດຍມີຄວາມເປັນເອກະພາບກັບບັນດາສະມາຄົມລົດຕ່າງໆ ຈຶ່ງໄດ້ມີການເກັບຄ່າຜ່ານເຂົ້າຈອດລົດຢູ່ສະຖານີລົດໄຟ ຊຶ່ງການເກັບແມ່ນລາຄາລົດເກັງ 10 ພັນກີບ, ລົດປະເພດອື່ນໆແມ່ນໄດ້ເກັບລາຄາທີ່ແຕກຕ່າງກັນ. ໃນໄລຍະຜ່ານມາ, ພວກເຮົາໄດ້ມີການປະຕິບັດ ແລະ ສຶກສາຂໍ້ມູນໄປນໍາ ຮ່ວມກັບພາກສ່ວນກ່ຽວຂ້ອງ ຊຶ່ງການເກັບແມ່ນມີຄວາມຈຳເປັນຕ້ອງໄດ້ເກັບເພື່ອເຮັດໃຫ້ການບໍລິຫານຈັດການມີຄວາມເປັນລະບຽບຮຽບຮ້ອຍ, ເກັບໃນອັດຕາທີ່ກຳນົດ ແລະ ມີຄວາມເປັນເອກະພາບ ຊຶ່ງມີ 6 ສະຖານີທີ່ພວກເຮົາໄດ້ເກັບຄ່າຜ່ານປະຕູເຂົ້າຈອດ ໃນນັ້ນມີສະຖານີນະຄອນຫຼວງວຽງຈັນ, ຫຼວງພະບາງ, ເມືອງໄຊ, ນາເຕີຍ, ວັງວຽງ ແລະ ບໍ່ເຕ່ນ ໃນກົນໄກການເກັບດ້ານສິ່ງອຳນວຍຄວາມສະດວກອາດຍັງບໍ່ຄົບຖ້ວນ. ການເກັບດັ່ງກ່າວມີທັງດ້ານຕັ້ງໜ້າ ແລະ ຫຍໍ້ທໍ້ທີ່ສັງຄົມໄດ້ສົ່ງຂ່າວມາ, ດ້ານຕັ້ງໜ້າເຮັດໃຫ້ການຄຸ້ມຄອງເປັນລະບົບຫຼາຍຂຶ້ນ, ຖ້າບໍ່ມີການເກັບສະພາບຂອງລົດທີ່ເຂົ້າມາກໍຈະບໍ່ມີຄວາມເປັນລະບຽບຮຽບຮ້ອຍ ມີຜູ້ມາຈອດລົດແຊ່ໄວ້ຫຼາຍຂຶ້ນ ແລະ ໄດ້ມີການທົດລອງສຶກສາມາຫຼາຍຮູບແບບ, ອີງໃສ່ສະພາບການຕົວຈິງພວກເຮົາຈຶ່ງໄດ້ຕົກລົງເປັນເອກະພາບໃຫ້ມີການເກັບເງິນ.

ທ່ານ ອານົງເດດ ເພັດໄກສອນ ກ່າວເນັ້ນໃຫ້ຮູ້ອີກວ່າ: ສຳລັບມາດຕະການ ແລະ ວິທີການແກ້ໄຂໃນຕໍ່ໜ້າໂດຍສະເພາະຕິດພັນກັບຫາງສຽງທີ່ສັງຄົມໄດ້ສົ່ງຂ່າວມາ, ທາງບໍລິສັດລົດໄຟລາວ-ຈີນໄດ້ມີການປຶກສາຫາລືເພື່ອຊອກຫາທາງອອກ ຫຼຸດຜ່ອນຫາງສຽງຂອງສັງຄົມ ເພື່ອອຳນວຍຄວາມສະດວກໃຫ້ຜູ້ໂດຍສານທີ່ມາໃຊ້ບໍລິການມີຄວາມສະດວກສະບາຍວ່ອງໄວຍິ່ງຂຶ້ນ ອັນທີໜຶ່ງພວກເຮົາຈະມີການເຂັ້ມງວດກັບພະນັກງານເກັບເງິນຄ່າຜ່ານປະຕູເຂົ້າ ເກັບເງິນໃຫ້ໄວຂຶ້ນເພື່ອໃຫ້ມີຄວາມເປັນລະບຽບຮຽບຮ້ອຍ, ສອງ ຈະຄົ້ນຄວ້າທົດລອງການຫຼຸດລາຄາລົງຈາກ 10 ພັນກີບ ມາເປັນ 5 ພັນກີບ ໂດຍສະເພາະລົດເກງ ຄຽງຄູ່ກັບມາດຕະການບໍ່ໃຫ້ຈອດດົນ (ຜ່ານມາມີບາງຄັນເຂົ້າມາຈອດແຊ່ໄວ້ດົນ), ຄົ້ນຄວ້າເດີ່ນຈອດລົດຄ້າງຄືນໃຫ້ກວ້າງຂວາງຕື່ມ, ສໍາລັບແຜນຍາວນານ ພວກເຮົາໄດ້ຄົ້ນຄວ້າລະບົບໄມ້ກັ້ນອັດຕະໂນມັດທີ່ບໍ່ໃຊ້ຄົນເພື່ອໃຫ້ວ່ອງໄວ ໂປ່ງໃສຂຶ້ນ ໂດຍທົດລອງຢູສະຖານີນະຄອນຫຼວງວຽງຈັນ ຄາດຄະເນໃນເດືອນສິງຫາ-ກັນຍານີ້. ສະນັ້ນ, ຮຽກຮ້ອງມາຍັງສັງຄົມໃຫ້ເຂົ້າໃຈ ແລະ ສະໜັບສະໜູນບໍລິສັດທາງລົດໄຟລາວ-ຈີນ ຊຶ່ງຈຸດພິເສດການຊົມໃຊ້ລົດໄຟແມ່ນມາພ້ອມກັນ ລົງພ້ອມກັນ ຄົນຫຼາຍສະພາບແອອັດ ຖືເປັນສິ່ງທ້າທາຍໃນການແກ້ໄຂບັນຫາດັ່ງກ່າວໃຫ້ກັບພວກເຮົາ ຊຶ່ງໄລຍະຍາວພວກເຮົາຕ້ອງໄດ້ມີການຄົ້ນຄວ້າ ຄຽງຄູ່ກັບການພັດທະນາພື້ນຖານໂຄງລ່າງໄປພ້ອມກັນ ເພື່ອອຳນວຍຄວາມສະດວກໃຫ້ປະຊາຊົນເປັນຢ່າງດີ.